திருக்கோகர்ணம்

                 

௨ 

திருஞானசம்பந்தர்   சுவாமிகள் அருளிச்செய்த
இரண்டாம்   திருமுறை

தகவல் பலகை	விவரம்
தலம்	திருகோகர்ணம்
ஊர்/வேறுபெயர்
நாடு	துளுவ நாடு
ॐசுவாமி	பிராண லிங்கேஸ்வரர், கோகர்னேஸ்வர்
ॐஅம்பிகை	கோகர்னேஸ்வரி
பாடியவர்கள்	திருஞானசம்பந்தர்(1)         என்றும் அரியான் (3:79) திருநாவுக்கரசர்(1)        சந்திரனும் தண்புனலும்  (6:49)
ஸ்தல மரம்
தீர்த்தம்	கோடிதீர்த்தம்
பண்	சாதாரி
குறிப்புகள்	இலங்கேஸ்வரன் தவம் பெற்று பெற்ற பிரானலிங்கம் என சொல்லப்படுகிறது.   இத் தலத்தை அப்பர் திருஅங்கமாலையில் போற்றி பாடி உள்ளார்.    சிவராத்திரி வழிபாடு சிறப்புடையது.  இறைவன் திருமேனியை தீண்டி வழிபாடு செய்யலாம்.
பதிக பலன்	இறையருள் பெற; மூத்தோர் வழிபாடு
வரிசை எண்.	79                                                                               1/1

திருச்சிற்றம்பலம்

என்றுமரி யானயல வர்க்கியலிசைப்பொருள்க ளாகியெனதுள்
நன்றுமொளி யானொளிசி றந்தபொன்முடிக்கடவுள் நண்ணுமிடமாம்
ஒன்றிய மனத்தடியர் கூடியிமை யோர்பரவும் நீடரவமார்
குன்றுகள் நெருங்கிவிரி தண்டலை மிடைந்துவளர் கோகரணமே.  1  

பேதைமட மங்கையொரு பங்கிட மிகுத்திடப மேறியமரர்
வாதைபட வண்கடலெ ழுந்தவிட முண்டசிவன் வாழுமிடமாம்
மாதரொடும் ஆடவர்கள் வந்தடியிறைஞ்சிநிறை மாமலர்கள்தூய்க்
கோதைவரி வண்டிசைகொள் கீதமுரல் கின்றவளர் கோகரணமே.  2  

முறைத்திறம் உறப்பொருள் தெரிந்துமுனிவர்க்கருளி யாலநிழல்வாய்
மறைத்திறம றத்தொகுதி கண்டுசமயங்களைவ குத்தவனிடந்
துறைத்துறை மிகுத்தருவி தூமலர்சுமந்துவரை யுந்திமதகைக்
குறைத்தறையி டக்கரி புரிந்திடறு சாரல்மலி கோகரணமே.  3  

லைத்தலை மிகுத்தபடை யெண்கரம் விளங்கஎரி வீசிமுடிமேல்
அலைத்தலை தொகுத்தபுனல் செஞ்சடையில் வைத்தஅழ கன்றனிடமாம்
மலைத்தலை வகுத்தமுழை தோறும்உழை வாளரிகள் கேழல்களிறு
கொலைத்தலை மடப்பிடிகள் கூடிவிளை யாடிநிகழ் கோகரணமே.  4  

தொடைத்தலை மலைத்திதழி துன்னிய எருக்கலரி வன்னிமுடியின்
சடைத்தலை மிலைச்சிய தபோதனன் எமாதிபயில் கின்றபதியாம்
படைத்தலை பிடித்துமற வாளரொடு வேடர்கள் பயின்றுகுழுமிக்
குடைத்தலை நதிப்படிய நின்றுபழி தீரநல்கு கோகரணமே.  5  

நீறுதிரு மேனிமிசை யாடிநிறை வார்கழல்சி லம்பொலிசெய
ஏறுவிளை யாடவிசை கொண்டிடு பலிக்குவரும் ஈசனிடமாம்
ஆறுசம யங்களும் விரும்பியடி பேணியரன் ஆகமமிகக்
கூறுமனம் வேறிரதி வந்தடியர் கம்பம்வரு கோகரணமே.  6  

கல்லவடம் மொந்தைகுழல் தாளமலி கொக்கரைர் அக்கு அரைமிசை
பல்லபட நாகம்விரி கோவணவர் ஆளுநகர் என்பர் அயலே
நல்லமட மாதர் அர நாமமும் நவிற்றிய திருத்தமுழுகக்
கொல்லவிட நோயகல்த ரப்புகல்கொடுத்தருளு கோகரணமே.  7  

வரைத்தலம் நெருக்கிய முருட்டிருள் நிறத்தவன வாய்கள்அலற
விரற்றலை யுகிர்ச்சிறிது வைத்தபெரு மான் இனிது மேவும் இடமாம்
புரைத்தலை கெடுத்தமுனி வாணர்பொலிவாகிவினை தீரஅதன்மேல்
குரைத்தலை கழற்பணிய ஓமம்விலகும்புகைசெய் கோகரணமே.  8

வில்லிமையி னால்விறல் அரக்கன் உயிர் செற்றவனும் வேதமுதலோன்
இல்லை உளது என்று இகலி நேடஎரியாகி உயர் கின்றபரனூர்
எல்லையில் வரைத்தகடல் வட்டமும் இறைஞ்சிநிறை வாசம் உருவக்
கொல்லையில் இருங்குறவர் தம்மயிர் புலர்த்திவளர் கோகரணமே.  9  

நேசமில் மனச்சமணர் தேரர்கள்நிரந்தமொழி பொய்கள்அகல்வித்து
ஆசைகொள் மனத்தை அடி யாரவர் தமக்கருளும் அங்கணனிடம்
பாசமது அறுத்து அவனி யிற்பெயர்கள் பத்துடைய மன்னன்அவனைக்
கூசவகை கண்டுபின் அவற்கு அருள்கள் நல்கவல கோகரணமே.  10  

கோடலர வீனும்விரி சாரல்முன் நெருங்கிவளர் கோகரணமே
ஈடமினி தாகவுறை வானடிகள் பேணி அணி காழிநகரான்
நாடிய தமிழ்க்கிளவி இன்னிசைசெய் ஞானசம் பந்தன்மொழிகள்
பாடவல பத்தரவர் எத்திசையும் ஆள்வர்பர லோகம் எளிதே.

திருச்சிற்றம்பலம்