திரு காளத்தி

   

௨ 

திருஞானசம்பந்தர்  சுவாமிகள் அருளிச்செய்த
மூன்றாம்   திருமுறை

தகவல் பலகை	விவரம்
தலம்	திருக்காளத்தி
ஊர்	காலஹஸ்தி
நாடு	தொண்டை நாடு
ॐசுவாமி	காளத்திநாதர், குடும்பித் தேவர்
ॐஅம்பிகை	ஞானப் பூங்கோதை
பாடியவர்கள்	திருஞானசம்பந்தர்(2),         சந்தமார் அகிலோடு (3:36)         வானவர்கள் தான் அவர்கள்  (3:69) திருநாவுக்கரசர்(1),         விற்று ஊன் (6:8) சுந்தரர்(1)         செண்டாடும் விடையாய் (7:26)
ஸ்தல மரம்	மகிழ மரம்
தீர்த்தம்	பொன்முகலி
பண்	திருத்தாண்டகம்
குறிப்புகள்	பஞ்ச பூத தலங்களுள் வாயுத் தலம் கண்ணப்ப நாயனார் முத்தி தலம் முசுகுந்த சக்கரவர்த்தி, பரத்துவாச முனிவர், சிவகோசரியார் பூசித்து முத்தி பெற்றது
பதிக பலன்	அடியார்கள் பெருமை பெற
வரிசை எண்.	7                                          தொண்டை நாடு -32/19

திருச்சிற்றம்பலம்

வானவர்கள் தானவர்கள் வாதைபட வந்ததொரு மாகடல்விடம்
தானமுது செய்த அருள் புரிந்தசிவன்  மேவுமலை தன்னைவினவில்
ஏனமின மானினொடு கிள்ளைதினை கொள்ளஎழி லார்க்கவணினாற்
கானவர்தம் மாமகளிர் கனகமணி  விலகுகா ளத்திமலையே.  1  

முதுசினவில் அவுணர்புரம் மூன்றும் ஒரு நொடிவரையின் மூளஎரிசெய்
சதுரர்மதி பொதிசடையர் சங்கரர் விரும்புமலை தன்னைவினவில்
எதிர் எதிர வெதிர்பிணைய எழுபொறிகள் சிதறஎழில் ஏன முழுத
கதிர்மணியின் வளர் ஒளிகள் இருள் அகல நிலவுகா ளத்திமலையே.  2  

வல்லைவரு காளியைவ குத்துவலியாகிமிகு தாரகனைநீ
கொல்லென விடுத்தருள் புரிந்தசிவன் மேவுமலை கூறிவினவில்
பல்பல இருங்கனி பருங்கிமிக உண்டவை நெருங்கி இனமாய்க்
கல்லதிர நின்றுகரு மந்திவிளையாடு காளத்திமலையே.   3  

வேய் அனைய தோளுமை ஒர் பாகமது வாக விடை ஏறிசடைமேற்
தூயமதி சூடிசுடு காடில்நட மாடிமலை தன்னைவினவில்
வாய்கலச மாகவழி பாடுசெயும் வேடன்மல ராகுநயனம்
காய்கணையி னா இடந்து ஈசனடி கூடுகாளத்தி மலையே.  4  

மலையின்மிசை தனில்முகில்போல் வருவதொரு  மதகரியை மழைபோலலறக் 

கொலைசெய்து உமை அஞ்ச உரி போர்த்தசிவன் மேவுமலை கூறிவினவில்

அலைகொள்புனல் அருவிபல சுனைகள்வழி  இழியவயல் நிலவுமுதுவேய்
கலக என வொளிகொள்கதிர் முத்தம் அவை சிந்துகா ளத்திமலையே.  5  

பாரகம் விளங்கிய பகீரதன்  அருந்தவம் முயன்றபணிகண்டு 
ஆரருள் புரிந்து அலைகொள் கங்கைசடை ஏற்றஅரன் மலையைவினவில்
வார் அதர் இருங்குறவர் சேவலின் மடுத்தவர் எரித்தவிறகில்
கார் அகில் இரும்புகை விசும்புகமழ்கின்ற காளத்திமலையே.  6  

ஆரும் எதி ராதவலி யாகியசலந்தரனை ஆழியதனால்
ஈரும்வகை செய்தருள் புரிந்தவன் இருந்தமலை தன்னைவினவில்
ஊரும்அர வம்மொளிகொள் மாமணி உமிழ்ந்தவை உலாவிவரலால்
காரிருள் கடிந்துகன கம் எ\னவிளங்குகா ளத்திமலையே.  7  

எரியனைய சுரிமயிர் இராவணனை ஈடழிய எழில்கொள்விரலால்
பெரியவரை ஊன்றியருள் செய்தசிவன் மேவுமலை பெற்றிவினவில்
வரியசிலை வேடுவர்கள் ஆடவர்கள் நீடுவரை ஊடுவரலால்
கரியினொடு வரியுழுவை அரியினமும் வெருவுகா ளத்திமலையே.  8  

இனதளவில் இவனதடி இணையும் அடிஅறிதும் என இகலும் இருவர்
தனது உருவம் அறிவரிய சகலசிவன் மேவுமலை தன்னைவினவில்
புனவர்புன மயிலனைய மாதரொடு மைந்தரும ணம்புணரும்நாள்
கனகம் என மலர்கள் அணி வேங்கைகள் நிலாவுகா ளத்திமலையே.  9  

நின்றுகவ ளம்பலகொள் கையரொடு மெய்யி இடு போர்வையவரும்
நன்றியறி யாதவகை நின்றசிவன் மேவுமலை நாடிவினவில்
குன்றின்மலி துன்றுபொழில் நின்றகுளிர் சந்தின்முறி தின்றுகுலவிக்
கன்றினொடு சென்றுபிடி நின்றுவிளையாடுகா ளத்திமலையே.  10  

காடது இட மாக நட மாடுசிவன்  மேவுகா ளத்திமலையை
மாடமொடு மாளிகைகள் நீடுவளர் கொச்சைவயம் மன்னுதலைவன்
நாடுபல நீடுபுகழ் ஞானசம்பந்தன் உரை நல்லதமிழின்
பாடலொடு பாடுமிசை வல்லவர்கள் நல்லர்பர லோகம் எளிதே.

திருச்சிற்றம்பலம்