திருப் பாண்டிக் கொடுமுடி

                

௨ 

திருஞானசம்பந்தர்சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திருபாண்டி கொடுமுடி
ஊர் /வேறு பெயர்	கொடுமுடி
நாடு	கொங்கு நாடு
ॐசுவாமி	கொடுமுடி நாதர்
ॐஅம்பிகை	பண் மொழியம்மை
பாடியவர்கள்	திருஞானசம்பந்தர் (1),         பெண்ணமர் மேனியினாரும் (2-69)  அப்பர்(1)         சிட்டனைச் சிவனை (5-81) சுந்தரர் (1)         மற்றுப் பற்று எனக்கு  (7-48)
ஸ்தல மரம்	வன்னிமரம்
தீர்த்தம்	தேவ தீர்த்தம்
பண்	காந்தாரம்
குறிப்புகள்	மேருவின் சிகரங்கள் ஒன்று இங்கே விழுந்தது என்பது புராண வரலாறு  பராத்வசர் அகத்தியர் வழிபட்ட தலம். மும்மூர்த்திகள் தலம். முயலகன் இல்லாமல் நடனக்காட்சி அருளிய தலம்.
பதிக பலன்	ஞான மார்க்கத்தை அடைவார்கள்.
வரிசை எண்.	69                                                                6/7

திருச்சிற்றம்பலம்

பெண்ணமர் மேனியி னாரும்
            பிறைபுல்கு செஞ்சடை யாரும்
கண்ணமர் நெற்றியி னாரும்
            காதம ருங்குழை யாரும்
எண்ணம ருங்குணத் தாரும்
           இமையவர் ஏத்த நின்றாரும்
பண்ணமர் பாடலி னாரும்
            பாண்டிக் கொடுமுடி யாரே.  1  

தனைக்கணி மாமலர் கொண்டு
           தாள்தொழு வார் அவர் தங்கள்
வினைப்பகை ஆயின தீர்க்கும்
          விண்ணவர் விஞ்சையர் நெஞ்சில்
நினைத்து எழுவார் துயர் தீர்ப்பார்
         நிரைவளை மங்கை நடுங்கப்
பனைக்கைப் பகட்டு உரி போர்த்தார்
        பாண்டிக் கொடுமுடி யாரே.  2  

சடை அமர் கொன்றையி னாரும்
       சாந்தவெண் நீறு அணிந் தாரும்
புடையமர் பூதத்தி னாரும்
      பொறிகிளர் பாம்பு அசைத் தாரும்
விடையம ருங்கொடி யாரும்
      வெண்மழு மூவிலைச் சூலப்
படையமர் கொள்கையி னாரும்
      பாண்டிக் கொடுமுடி யாரே.  3  

நறைவளர் கொன்றையி னாரும்
      ஞாலம் எல்லாம் தொழுது ஏத்தக்
கறைவளர் மாமிடற் றாரும்
      காடு அரங்கா அனல் ஏந்தி
மறைவளர் பாடலி னோடு
      மண்முழ வம் குழல் மொந்தை
பறைவளர் பாடலி னாரும்
      பாண்டிக் கொடுமுடி யாரே.  4  

போகமும் இன்பமும் ஆகிப்
      போற்றி  என் பார் அவர் தங்கள்
ஆகம் உறைவிட மாக
      அமர்ந்தவர் கொன்றையி னோடும்
நாகமும்  திங்களும்  சூடி
      நன்னுதல் மங்கைதன் மேனிப்
பாகம் உகந்தவர் தாமும்
      பாண்டிக் கொடுமுடி யாரே.  5  

கடிபடு கூவிளம் மத்தம்
      கமழ்சடை மேலுடை யாரும்
பொடிபட முப்புரம் செற்ற
      பொருசிலை ஒன்றுடை யாரும்
வடிவுடை மங்கைதன் னோடு
      மணம்படு கொள்கையி னாரும்
படிபடு கோலத்தி னாரும்
      பாண்டிக் கொடுமுடி யாரே.  6  

ஊன் அமர் வெண்தலை ஏந்தி
      உண்பலிக்கு என்று உழல் வாரும்
தேன் அமரும் மொழி மாது
      சேர்திரு மேனியி னாரும்
கான் அமர் மஞ்ஞைக ளாலும்
      காவிரிக் கோலக் கரைமேல்
பானல நீறு அணி வாரும்
      பாண்டிக் கொடுமுடி யாரே.  7  

புரந்தரன் தன்னொடு வானோர்
      போற்றி என்று ஏத்த நின்றாரும்
பெருந்திறல் வாளரக் கன்னைப்
      பேரிடர் செய்து உகந் தாரும்
கருந்திரை மாமிடற் றாரும்
      காரகில் பன்மணி உந்திப்
பரந்திழி காவிரிப் பாங்கர்ப்
      பாண்டிக் கொடுமுடி யாரே.  8  

திருமகள் காதலி னானும்
      திகழ்தரு மாமலர் மேலைப்
பெருமக னும் அவர் காணாப்
      பேரழல் ஆகிய பெம்மான்
மருமலி மென்மலர்ச் சந்து
      வந்திழி காவிரி மாடே
பருமணி நீர்த்துறை யாரும்
      பாண்டிக் கொடுமுடி யாரே.  9  

புத்தரும் புந்தியி லாத
      சமணரும் பொய்ம்மொழி அல்லால்
மெய்த்தவம் பேசிட மாட்டார்
      வேடம் பலபல வற்றால்
சித்தரும் தேவரும் கூடிச்
      செழுமலர் நல்லன கொண்டு
பத்தர்கள் தாம்பணிந்து ஏத்தும்
      பாண்டிக் கொடுமுடி யாரே.  10  

கலமல்கு தண்கடல் சூழ்ந்த
      காழியுள் ஞானசம் பந்தன்         
பலமல்கு வெண்தலை ஏந்திப்
      பாண்டிக் கொடுமுடி தன்னைச்
சொலமல்கு பாடல்கள் பத்தும்
      சொல்ல வல்லார் துயர்தீர்ந்து
நலமல்கு சிந்தையர் ஆகி
      நன்னெறி எய்துவர் தாமே.

        

திருச்சிற்றம்பலம்