திருக்கழிப்பாலை

      

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருக்கழிப்பாலை
ஊர்
நாடு	காவிரி வடகரை (சோழ நாடு)
ॐசுவாமி	பால்வண்ணநாதேஸ்வரர்
ॐஅம்பிகை	வேதநாயகி
பாடியவர்கள்	திருஞானசம்பந்தர்(2),         புனலாடியபுன் (2:21)         வெந்த குங்குலிய (3:44) திருநாவுக்கரசர்(5),         வன பவள (4:06)         நங்கையைப் பாகம் (4:30)         நெய்தற் குருகுதன்(4:106)         வண்ணமும் வடிவும் (5:40)         ஊன் உடுத்தி (6:12) சுந்தரர்(1)         செடியேன் தீவினை (7:23)
ஸ்தல மரம்	வில்வம்
தீர்த்தம்	கொள்ளிடம்
பண்	திருத்தாண்டகம்
குறிப்புகள்	வால்மீகி முனிவர் வழிபட்ட தலம்
பதிக பலன்	இறையருள்  பெற
வரிசை எண்.	12                                              காவிரி (வ) -4/63

திருச்சிற்றம்பலம்

ஊன் உடுத்தி ஒன்பது வாசல் வைத்து 
ஒள்எலும்பு தூணா உரோமம் மேய்ந்து
தாம் எடுத்த கூரை தவிரப் போவார்
தயக்கம் பலபடைத்தார் தாம ரையினார்
கானெடுத்து மாமயில்க ளாலும் சோலைக் 
கழிப்பாலை மேய கபாலப் பனார்
வானிடத்தை ஊடறுத்து வல்லைச் செல்லும் 
வழிவைத்தார்க்கு அவ்வழியே போதும் நாமே.  1  

முறையார்ந்த மும்மதிலும் பொடியாச் செற்று
முன்னுமாய்ப் பின்னுமாய் முக்கண் எந்தை
பிறையார்ந்த சடைமுடிமேற் பாம்பு கங்கை
பிணக்கந்தீர்த் துடன்வைத்தார் பெரிய நஞ்சுக்
கறையார்ந்த மிடற்று அடங்கக் கண்ட எந்தை
கழிப்பாலை மேய கபாலப் பனார்
மறையார்ந்த வாய்மொழியான் மாய யாக்கை
வழிவைத்தார்க்கு அவ்வழியே போதும் நாமே.  2  

நெளிவு உண்டாக் கருதாதே நிமலன் தன்னை 
நினைமின்கள் நித்தலும்நே ரிழையாள் ஆய
ஒளிவண்டார் கருங்குழலி உமையாள் தன்னை 
ஒருபாகத்து அமர்ந்து அடியார் உள்கி ஏத்தக்
களிவண்டார் கரும்பொழில்சூழ் கண்டல் வேலிக் 
கழிப்பாலை மேய கபாலப் பனார்
வளி உண்டார் மாயக் குரம்பை நீங்க 
வழிவைத்தார்க்கு அவ்வழியே போதும் நாமே.  3  

பொடிநாறு மேனியர் பூதிப் பையர்
புலித்தோலர் பொங்கு அரவர் பூண நூலர்
அடிநாறு கமலத்தர் ஆரூர் ஆதி
ஆன் அஞ்சும் ஆடுமா திரையி னார்தாம்
கடிநாறு பூஞ்சோலை கமழ்ந்து நாறுங் 
கழிப்பாலை மேய கபாலப் பனார்
மடிநாறு மேனி இம் மாயம் நீங்க 
வழிவைத்தார்க்கு அவ்வழியே போதும் நாமே.  4  

விண்ணானாய் விண்ணவர்கள் விரும்பி வந்து
வேதத்தாய் கீதத்தாய் விரவி எங்கும்
எண்ணானாய் எழுத்தானாய் கடல் ஏழு ஆனாய்
இறையானாய் எம் இறையே என்று நிற்கும்
கண் ஆனாய் காரானாய் பாரும் ஆனாய்
கழிப்பாலை உள்ளுறையும் கபாலப் பனார்
மண் ஆனாய் மாயக் குரம்பை நீங்க 
வழிவைத்தார்க்கு அவ்வழியே போதும் நாமே.  5  

விண்ணப்ப விச்சா தரர்கள் ஏத்த
விரிகதிரோன் எரிசுடரான் விண்ணும் ஆகிப்
பண்ணப்பன் பத்தர் மனத்து ளேயும் 
பசுபதி பாசுபதன் தேச மூர்த்தி
கண்ணப்பன் கண்ணப்பக் கண்டு கந்தார்
கழிப்பாலை மேய கபாலப் பனார்
வண்ணப் பிணிமாய யாக்கை நீங்க 
வழிவைத்தார்க்கு அவ்வழியே போதும் நாமே.  6  

பிணம்புல்கு பீறற் குரம்பை மெய்யாப் 
பேதப் படுகின்ற பேதை மீர்காள்
நிணம்புல்கு சூலத்தர் நீல கண்டர்
எண்தோளர் எண்ணிறைந்த குணத்தி னாலே
கணம்புல்லன் கருத்துஉந்தார் காஞ்சி உள்ளார்
கழிப்பாலை மேய கபாலப் பனார்
மணம்புல்கு மாயக் குரம்பை நீங்க
வழிவைத்தார்க்கு அவ்வழியே போதும் நாமே.  7  

இயல்பாய ஈசனை எந்தை தந்தை
என்சிந்தை மேவி உறைகின் றானை
முயல்வானை மூர்த்தியைத் தீர்த்த மான 
தியம்பகன் திரிசூலத் தன்ன கையன்
கயல்பாயுங் கண்டல்சூழ் வுண்ட வேலிக் 
கழிப்பாலை மேய கபாலப் பனார்
மயலாய மாயக் குரம்பை நீங்க 
வழிவைத்தார்க்கு அவ்வழியே போதும் நாமே.  8  

செற்றதோர் மனமொழிந்து சிந்தை செய்து
சிவமூர்த்தி என்று எழுவார் சிந்தை யுள்ளால்
உற்றதோர் நோய்களைந்து இவ்வுலகம் எல்லாம்
காட்டுவான் உத்தமன்றா னோதா தெல்லாங்
கற்றதோர் நூலினன் களிறு செற்றான்
கழிப்பாலை மேய கபாலப் பனார்
மற்றிதோர் மாயக் குரம்பை நீங்க 
வழிவைத்தார்க்கு அவ்வழியே போதும் நாமே.  9  

பொருதலங்கல் நீண்முடியான் போர் அரக்கன்
புட்பகந்தான் பொருப்பின்மீ தோடா தாக
இருநிலங்கள் நடுக்கெய்த எடுத்தி டுதலும்
ஏந்திழையாள் தான்வெருவ இறைவன் நோக்கிக்
கரதலங்கள் கதிர்முடியாறு அஞ்சி னோடு 
கால்விரலால் ஊன்று கழிப்பா லையார்
வருதலங்க மாயக் குரம்பை நீங்க 
வழிவைத்தார்க்கு அவ்வழியே போதும் நாமே.

திருச்சிற்றம்பலம்