திரு பூவணம்

            

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருப்பூவணம்
ஊர்/வேறுபெயர்
நாடு	பாண்டிய
ॐசுவாமி	பூவணநாதர், புஷ்பவநேஸ்வரர்
ॐஅம்பிகை	சௌந்தரநாயகி, அழகிய நாயகி
பாடியவர்கள்	திருஞானசம்பந்தர்(2)         அறையார் புனலும் (1:64)         மாதமர் மேனியனாகி  (3:20) திருநாவுக்கரசர்(1)         வடியேறு திருசூலம் (6:18) சுந்தரர்(1)         திருவுடையார் திருமால் (7:11)
ஸ்தல மரம்	பலா
தீர்த்தம்
பண்	திருத்தாண்டகம்
குறிப்புகள்	வைகை ஆற்றங்கரையில் உள்ள பிரம்மன் வழிபட்ட தலம்  ஈசன் நேரே நின்று திருவுருவம் கட்டி அருளிய தலம்  அதனால் தோன்றும் தோன்றும் என பதிகம் தோறும் இடம் பெற்றுள்ளது  "கொடிமாடம்நிலவு திருப்பூவணத்து கோயிலினுள்" என்ற பெரியபுராணம் (பாடல்:407) அருளிச் செய்துள்ளமை சிந்திக்க தக்கது
	வினை தீர்க்கும் - தோஷ நிவர்த்தி தலம்
வரிசை எண்.	18                                     11/14

திருச்சிற்றம்பலம்

வடிவேறு திரிசூலம் தோன்றுந் தோன்றும்
வளர்சடைமேல் இளமதியம் தோன்றுந் தோன்றும்
கடியேறு கமழ்கொன்றைக் கண்ணி தோன்றும்
காதில்வெண் குழைதோடு கலந்து தோன்றும்
இடியேறு களிற்று உரிவைப் போர்வை தோன்றும்
எழில்திகழுந் திருமுடியும் இலங்கித் தோன்றும்
பொடியேறு திருமேனி பொலிந்து தோன்றும்
பொழில்திகழும் பூவணத்து எம் புனித னார்க்கே.  1  

ஆணாகிப் பெண்ணாய வடிவு தோன்றும்
அடியவர்கட்கு ஆரமுதம் ஆகித் தோன்றும்
ஊணாகி ஊர்திரிவான் ஆகித் தோன்றும்
ஒற்றைவெண் பிறைதோன்றும் பற்றார் தம்மேற்
சேணாக வரைவில்லால் எரித்தல் தோன்றும்
செத்தவர்தம் எலும்பினாற் செறியச் செய்த
பூணாணும் அரைஞாணும் பொலிந்து தோன்றும்
பொழில்திகழும் பூவணத்து எம் புனித னார்க்கே.  2  

கல்லாலின் நீழற் கலந்து தோன்றும் 
கவின்மறையோர் நால்வர்க்கு நெறிகள் என்று
சொல்லாகச் சொல்லியவா தோன்றும் தோன்றும்
சூழரவு மான்மறியும் தோன்றுந் தோன்றும்
அல்லாத காலனைமுன் அடர்த்தல் தோன்றும்
ஐவகையால் நினைவார்பால் அமர்ந்து தோன்றும்
பொல்லாத புலால் எலும்பு பூணாய்த் தோன்றும்
பொழில்திகழும் பூவணத்து எம் புனித னார்க்கே.  3  

படைமலிந்த மழுவாளு மானும் தோன்றும்
பன்னிரண்டு கண்ணுடைய பிள்ளை தோன்றும்
நடைமலிந்த விடையோடு கொடியும் தோன்றும்
நான்மறையின் ஒலிதோன்றும் நயனந் தோன்றும்
உடைமலிந்த கோவணமுங் கீளுந் தோன்று
மூரல்வெண் சிரமாலை உலாவித் தோன்றும்
புடைமலிந்த பூதத்தின் பொலிவு தோன்றும்
பொழில்திகழும் பூவணத்து எம் புனித னார்க்கே.  4  

மயலாகுந் தன்னடியார்க்கு அருளுந் தோன்றும்
மாசிலாப் புன்சடைமேல் மதியந் தோன்றும்
இயல்பாக இடுபிச்சை ஏற்றல் தோன்றும்
இருங்கடல்நஞ் சு உண்டு இருண்ட கண்டந் தோன்றுங்
கயல்பாயக் கடுங்கலுழிக் கங்கை நங்கை 
ஆயிரமா முகத்தினொடு வானில் தோன்றும்
புயல்பாயச் சடைவிரித்த பொற்புத் தோன்றும்
பொழில்திகழும் பூவணத்து எம் புனித னார்க்கே.  5  

பாராழி வட்டத்தார் பரவி யிட்ட 
பன்மலரும் நறும்புகையும் பரந்து தோன்றும்
சீராழித் தாமரையின் மலர்க ள் அன்ன 
திருந்தியமா நிறத்தசே வடிகள் தோன்றும்
ஓராழித் தேருடைய இலங்கை வேந்தன் 
உடல்துணித்த இடர்பாவங் கெடுப்பித் தன்று
போராழி முன்னீந்த பொற்புத் தோன்றும்
பொழில்திகழும் பூவணத்து எம் புனித னார்க்கே.  6  

தன்னடியார்க்கு அருள்புரிந்த தகவு தோன்றும்
சதுர்முகனைத் தலையரிந்த தன்மை தோன்றும்
மின்னனைய நுண்ணிடையாள் பாகந் தோன்றும்
வேழத்தின் உரிவிரும்பிப் போர்த்தல் தோன்றும்
துன்னியசெஞ் சடைமேலோர் புனலும் பாம்பும்
தூயமா மதியுடனே வைத்தல் தோன்றும்
பொன்னனைய திருமேனி பொலிந்து தோன்றும்
பொழில்திகழும் பூவணத்து எம் புனித னார்க்கே.  7  

செறிகழலுந் திருவடியும்தோன்றுந் தோன்றும்
திரிபுரத்தை எரிசெய்த சிலையுந் தோன்றும்
நெறி அதனை விரித்து உரைத்த நேர்மை தோன்றும்
நெற்றிமேல் கண்தோன்றும் பெற்றம் தோன்றும்
மறுபிறவி அறுத்து அருளும் வகையும் தோன்றும்
மலைமகளும்  சலமகளும் மலிந்து தோன்றும்
பொறியரவும் இளமதியும் பொலிந்து தோன்றும்
பொழில்திகழும் பூவணத்து எம் புனித னார்க்கே.  8  

அருப்போட்டு முலைமடவாள் பாகந் தோன்றும்
அணிகிளரும் உரும் அன்ன அடர்க்குங் கேழல்
மருப்போட்டு மணிவயிரக் கோவை தோன்றும்
மணமலிந்த நடந்தோன்றும் மணியார் வைகைத்
திருக்கோட்டில் நின்றதோர் திறமும் தோன்றும்
செக்கர்வான் ஒளிமிக்குத் திகழ்ந்த சோதிப்
பொருப்போட்டி நின்றதிண் புயமுந் தோன்றும்
பொழில்திகழும் பூவணத்து எம் புனித னார்க்கே.  9  

ஆங்கணைந்த சண்டிக்கும் அருளி அன்று
தன்முடிமேல் அலர்மாலை அளித்தல் தோன்றும்
பாங்கணைந்து பணிசெய்வார்க்கு அருளி அன்று
பலபிறவி அறுத்து அருளும் பரிசு தோன்றும்
கோங்கணைந்த கூவிளமும் மதமத் தமும் 
குழற்கணிந்த கொள்கையொடு கோலந் தோன்றும்
பூங்கணைவேள் உருவழித்த பொற்புத் தோன்றும்
பொழில்திகழும் பூவணத்து எம் புனித னார்க்கே.  10  

ஆர் ஒருவர் உள்குவார் உள்ளத்து உள்ளே 
அவ்வுருவாய் நிற்கின்ற அருளும் தோன்றும்
வாருருவப் பூண்முலைநன் மங்கை தன்னை 
மகிழ்ந்து ஒருபால் வைத்து உகந்த வடிவும் தோன்றும்
நீருருவக் கடல் இலங்கை அரக்கர் கோனை 
நெறுநெறென அடர்த்திட்ட நிலையும் தோன்றும்
போருருவக் கூற்று உதைத்த பொற்புத் தோன்றும்
பொழில்திகழும் பூவணத்து எம் புனித னார்க்கே.

திருச்சிற்றம்பலம்