திருச் செங்கோடு

              

௨ 

ஞானசம்பந்தர்  சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திருக்கொடிமாடச் செங்குன்றூர்
ஊர் /வேறு பெயர்	திருச்செங்கோடு, தெய்வத்திருமலை, நாககிரி
நாடு	கொங்கு நாடு
ॐசுவாமி	அர்த்தநாரீஸ்வரர்
ॐஅம்பிகை	பாகம்பிரியாள்
பாடியவர்கள்	சுந்தரர் (1),         வெந்த வெண் நீறு அணிந்து  (1-107)
ஸ்தல மரம்	இலுப்பை
தீர்த்தம்	பிரம தீர்த்தம்
பண்	வியாழக்குறிஞ்சி
குறிப்புகள்	கோவில் மலை குன்று மீது  உள்ளது  அவ்வினைக்கு இவ்வினை பதிகம் பெற்ற சிறப்பு பதி. முருகப் பெருமானை சிறப்பு செய்து வழிபடும் தளமாக போற்றப் படுகிறது.
பதிக பலன்	வினை அழியும்.
வரிசை எண்.	107                                                                4/7

திருச்சிற்றம்பலம்

வெந்தவெண் நீறு அணிந்து விரிநூல் 
          திகழ்மார்பின் நல்ல
பந்தணவும் விரலாள் 
        ஒருபாகம் அமர்ந்து அருளிக்
கொந்தணவும் பொழில்சூழ் கொடிமாடச் 
          செங்குன்றூர் நின்ற
அந்தணனைத் தொழுவார் 
          அவலம் அறுப்பாரே.  1  

அலைமலி தண்புனலோடு அரவம்
          சடைக்கு அணிந்து ஆகம்
மலைமகள் கூறு உடையான் 
          மலையார் இளவாழைக்
குலைமலி தண்பொழில்சூழ் கொடிமாடச் 
          செங்குன்றூர் நின்ற
தலைமகனைத் தொழுவார் 
          தடுமாற்று அறுப்பாரே.  2  

பாலன நீறுபுனை திருமார்பில் 
          பல்வளைக்கை நல்ல
ஏலம லர்க்குழலாள் 
          ஒருபாகம் அமர்ந்து அருளிக்
கோல மலர்ப்பொழில்சூழ் கொடிமாடச் 
          செங்குன்றூர் மல்கும்
நீலநன் மாமிடற்றான் 
          கழல் ஏத்தல் நீதியே.  3  

வாருறு கொங்கைநல்ல மடவாள் 
          திகழ்மார்பில் நண்ணும்
காருறு கொன்றையொடும் 
          கதநாகம் பூண்டு அருளிச்
சீருறும் அந்தணர்வாழ் கொடிமாடச் 
          செங்குன்றூர் நின்ற
நீருறு செஞ்சடையான் 
          கழல் ஏத்தல் நீதியே.  4  

பொன்திகழ் ஆமையொடு புரிநூல் 
          திகழ்மார்பில் நல்ல
பன்றியின் கொம்பு அணிந்து 
          பணைத்தோளியோர் பாகமாகக்
குன்றன மாளிகைசூழ் கொடிமாடச் 
          செங்குன்றூர் வானில்
மின் திகழ் செஞ்சடையான் 
          கழல் ஏத்தல் மெய்ப்பொருளே.  5  

ஓங்கிய மூவிலைநற் சூலம்  
          ஒரு கையன் சென்னி
தாங்கிய கங்கையொடு 
          மதியம் சடைக்கு அணிந்து
கோங்கண வும்பொழில்சூழ் கொடிமாடச் 
          செங்குன்றூர் வாய்ந்த
பாங்கன தாள்தொழுவார் 
          வினையாய பற்று அறுமே.  6  

நீடலர் கொன்றையொடு நிமிர்புன் 
          சடைதாழ வெள்ளை
வாடல் உடை தலையிற் 
          பலிகொள்ளும் வாழ்க்கையனாய்க்
கோடல் வளம்புறவில் கொடிமாடச் 
          செங்குன்றூர் நின்ற
சேடன தாள்தொழுவார் 
          வினையாய தேயுமே.  7  

மத்தநன் மாமலரும் மதியும்வளர் 
          கொன்றையுடன் துன்று
தொத்தலர் செஞ்சடைமேல் 
          துதைய உடன்சூடிக்
கொத்தலர் தண்பொழில்சூழ் கொடிமாடச் 
          செங்குன்றூர் மேய
தத்துவனைத் தொழுவார் 
          தடுமாற்று அறுப்பாரே.  8  

செம்பொனின் மேனியனாம் பிரமன்திரு 
          மாலும் தேட நின்ற
அம்பவ ளத்திரள் போல் 
          ஒளியாய ஆதிபிரான்
கொம்பண வும்பொழில்சூழ் கொடிமாடச் 
          செங்குன்றூர் மேய
நம்பன தாள்தொழுவார் 
          வினையாய நாசமே.  9  

போதியர் பிண்டியர் என்று இவர்கள் 
          புறங்கூறும் பொய்ந்நூல்
ஓதிய கட்டுரைகேட்டு 
          உழல்வீர் வரிக்குயில்கள்
கோதிய தண்பொழில்சூழ் கொடிமாடச் 
          செங்குன்றூர் நின்ற
வேதியனைத் தொழ நும் 
          வினையான வீடுமே.  10  

அலைமலி தண்புனல்சூழ்ந்து அழகார் 
          புகலிந்நகர் பேணும்
தலைமக னாகிநின்ற 
          தமிழ்ஞான சம்பந்தன்
கொலைமலி மூவிலையான் கொடிமாடச் 
          செங்குன்றூர் ஏத்தும்
நலம்மலி பாடல்வல்லார் 
          வினையான நாசமே.

        

திருச்சிற்றம்பலம்