திரு நெல்வாயில் அரத்துறை

                        

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திரு நெல்வாயில் அரத்துறை
ஊர் /வேறு பெயர்
நாடு	நடு நாடு
ॐசுவாமி	அரத்துறை நாதர், ஆனந்தீச்வரர்
ॐஅம்பிகை	அரத்துறை நாயகி, ஆனந்த நாயகி
பாடியவர்கள்	திருஞானசம்பந்தர் (1),         எந்தை ஈசன் எம் (2-90) அப்பர்(1)         கடவுளைக் கடலுள்  (5-3) சுந்தரர் (1)          கல் வாய் அகிலும் (7-3)
ஸ்தல மரம்	ஆல மரம்
தீர்த்தம்	நிவா நதி
பண்	இந்தளம்
குறிப்புகள்	திருஞானசம்பந்தருக்கு முத்து சிவிகை, மணிக்குடை, பொற்சின்னம்  அருளப் பெற்ற தலம்  வான்மீகி முனிவர், அரவான் வழிபட்ட தலம்  திரு அருள்துறை அரத்துறை என போற்றப் படுகிறது
பதிக பலன்	வினை நீங்கும்.,
வரிசை எண்.	3                                                                 1/22

திருச்சிற்றம்பலம்

கல்வாய் அகிலும் கதிர்மா மணியுங்
          கலந்து உந்தி வரும்  நிவவின் கரைமேல்
நெல்வாயில்அரத்துறை நீடுறையும்
          நிலவெண் மதி சூடிய நின்மலனே
நல்வாயில் செய்தார் நடந்தார் உடுத்தார்
          நரைத்தார் இறந்தார் என்று நானிலத்தில்
சொல்லாய்க் கழிகின்றது அறிந்து அடியேன்
          தொடர்ந்தேன்  உய்யப் போவது ஓர்சூழல் சொல்லே.  1  

கறிமா மிளகும் மிகுவன் மரமும்
          மிகவும் உந்தி வரும் நிவவின் கரைமேல்
நெறிவார் குழலார் அவர் காண நடஞ்செய்
          நெல்வா யில்அரத் துறைநின் மலனே
வறிதே நிலையாத இம்மண் உலகில்
          நரனா கவகுத் தனை நான் இலையேன்
பொறிவாயில் இவ் ஐந்தினையும் அவியப்
          பொருது உன் அடியே புகும் சூழல் சொல்லே.  2  

புற்று ஆடு  அரவம் அரை ஆர்த்து உகந்தாய்
          புனிதா பொரு வெள்விடை ஊர்தியினாய்
எற்றே ஒரு கண்ணிலன்நின்னை அல்லால்
          நெல்வாயில் அரத்துறை நின் மலனே
மற்றேல் ஒருபற் றிலன் எம் பெருமான்
          வண்டார் குழலாள் மங்கைபங் கினனே
அற்றார் பிறவிக் கடல்நீந்தி ஏறி
          அடியேன் உய்யப் போவதோர் சூழல் சொல்லே.  3  

கோடுயர் கோங்க லர்வேங்கை அலர்
          மிக உந்தி வரும் நிவவின் கரைமேல்
நீடுயர் சோலை நெல்வா யில் அரத்துறை
          நின்மலனே நினைவார் மனத்தாய்
ஓடு புனற்க ரையாம் இளமை
      உறங்கி விழித்தால் ஒக்கும் இப் பிறவி
வாடி இருந்து வருந்தல் செய்யாது
          அடியேன் உய்யப் போவதோர் சூழல் சொல்லே.  4  

உலவு முகிலில் தலைகல் பொழிய
          உயர்வே யொடு இழி நிவவின் கரைமேல்
நிலவு மயிலார் அவர்தாம் பயிலும்
          நெல்வா யில் அரத்துறை நின்மலனே
புலன் ஐந்தும் மயங்கி அகம் குழையப்
          பொருவே லோர் நமன் தமர் தாம் நலிய
அலமந்து மயங்கி அயர்வதன் முன்
          அடியேன் உய்யப் போவதோர் சூழல் சொல்லே.  5  

ஏலம் இலவங்கம் எழிற் கனகம்
          மிக உந்தி வரும் நிவவின் கரைமேல்
நீலம் மலர்ப் பொய்கையில் அன்னம் மலி
          நெல்வாயில் அரத்துறையாய் ஒருநெல்
வாலூன்ற வருந்தும் உடம் பிதனை
          மகிழாது அழகா அலந்தேன் இனியான்
ஆலந் நிழலில் அமர்ந்தாய் அமரா
          அடியேன் உய்யப் போவதோர் சூழல் சொல்லே.  6  

சிகரம் முகத்தில் திரளார் அகிலும்
          மிக உந்தி வரும் நிவவின் கரைமேல்
நிகரில் மயிலார் அவர்தாம் பயிலும்
          நெல்வா யில் அரத் துறைநின் மலனே
மகரக் குழையாய் மணக்கோ லம் அதே
          பிணக்கோலம் அது ஆம் பிறவி இதுதான்
அகரம் முதலின் எழுத்தாகி நின்றாய்
        அடியேன் உய்யப் போவதோர் சூழல் சொல்லே.  7  

திண்தேர் நெடு வீதி இலங் கையர்கோன்
         திரள் தோள் இருபஃ தும் நெரித்து அருளி
ஞெண்டாடு நெடு வயல் சூழ் புறவின்
         நெல்வாயில் அரத் துறைநின் மலனே
பண்டே மிகநான் செய்த பாக்கியத்தால்
         பரஞ்சோதி நின் நாமம் பயிலப் பெற்றேன்
அண்டா அமரர்க்கு அமரர் பெருமான்
        அடியேன் உய்யப் போவதோர் சூழல் சொல்லே.  8  

மாணா உருவாகி ஓர் மண்அளந்தான்
          மலர் மேலவன் நேடியும் காண் அரியாய்
நீணீள் முடிவானவர் வந்து இறைஞ்சும்
          நெல்வாயில் அரத் துறைநின் மலனே
வாணார் நுதலார் வலைப்பட்டு அடியேன்
          பலவின் கனி வீந்தது போல்வதன் முன்
ஆணோடு பெண்ணாம் உருவாகி நின்றாய்
          அடியேன் உய்யப் போவதோர் சூழல் சொல்லே.  9  

நீரூறும் நெடு வயல்சூழ் புறவின்
          நெல்வாயில் அரத் துறை நின்மலனைத்
தேரூர் நெடுவீதி நன்மா டமலி
          தென் நாவலர்கோன் அடித் தொண்டன் அணி
ஆரூரன் உரைத்தன நற்றமிழின்
          மிகுமாலை ஓர் பத்து இவைகற்று வல்லார்
காரூர் களி வண்டறையானை மன்னர்
          ஆவராகி ஓர் விண் முழுதுஆள்பவரே.

    திருச்சிற்றம்பலம்