திருநெல்வாயில் அரத்துறை

                       

௨ 

திருஞானசம்பந்தர் சுவாமிகள் அருளிச்செய்த
இரண்டாம்  திருமுறை

தகவல் பலகை	விவரம்
தலம்	திரு நெல்வாயில் அரத்துறை
ஊர் /வேறு பெயர்
நாடு	நடு நாடு
ॐசுவாமி	அரத்துறை நாதர், ஆனந்தீச்வரர்
ॐஅம்பிகை	அரத்துறை நாயகி, ஆனந்த நாயகி
பாடியவர்கள்	திருஞானசம்பந்தர் (1),         எந்தை ஈசன் எம் (2-90) அப்பர்(1)         கடவுளைக் கடலுள்  (5-3) சுந்தரர் (1)          கல் வாய் அகிலும் (7-3)
ஸ்தல மரம்	ஆல மரம்
தீர்த்தம்	நிவா நதி
பண்	பியந்தைக் காந்தாரம்
குறிப்புகள்	திருஞானசம்பந்தருக்கு முத்து சிவிகை, மணிக்குடை, பொற்சின்னம்  அருளப் பெற்ற தலம்  வான்மீகி முனிவர், அரவான் வழிபட்ட தலம்  திரு அருள்துறை அரத்துறை என போற்றப் படுகிறது
பதிக பலன்	வினை நீங்கும்.,
வரிசை எண்.	90                                                                 1/22

திருச்சிற்றம்பலம்

எந்தை ஈசன் எம் பெருமான்
          ஏறு அமர் கடவுள் என்று ஏத்திச்
சிந்தை செய்பவர்க்கு அல்லால்
          சென்றுகை கூடுவது அன்றால்
கந்த மாமலர்  உந்திக் கடும்புனல்
        நிவாமல்கு கரைமேல்
அந்தண் சோலைநெல் வாயில்
        அரத்துறை அடிகள்தம் அருளே.  1  

ஈர வார்சடை தன்மேல்
       இளம்பிறை அணிந்த எம்பெருமான்
சீரும்  செல்வமும் ஏத்தாச்
      சிதடர்கள் தொழச் செல்வது அன்றால்
வாரி மாமலர் உந்தி
      வருபுனல் நிவாமல்கு கரைமேல்
ஆருஞ் சோலைநெல் வாயில்
      அரத்துறை அடிகள்தம் அருளே.  2 

 பிணிக லந்தபுன் சடைமேல்
      பிறையணி சிவன் எனப் பேணிப்
பணி கலந்து செய் யாத
      பாவிகள் தொழச் செல்வது அன்றால்
மணிக லந்துபொன் உந்தி
      வருபுனல் நிவாமல்கு கரைமேல்
அணிக லந்தநெல் வாயில்
      அரத்துறை அடிகள்தம் அருளே.  3  

துன்ன ஆடை ஒன்று உடுத்துத்
      தூயவெண் நீற்றினர் ஆகி
உன்னி நைபவர்க்கு அல்லால்
      ஒன்றும் கைகூடுவது அன்றால்
பொன்னும் மாமணி உந்திப்
      பொருபுனல் நிவாமல்கு கரைமேல்
அன்ன மாருநெல் வாயில்
      அரத்துறை  அடிகள்தம் அருளே.  4  

வெருகு உரிஞ்சுவெங் காட்டில்
      ஆடிய விமலன் என்று உள்கி
உருகி நைபவர்க்கு அல்லால்
      ஒன்றும் கைகூடுவது அன்றால்
முருகு உரிஞ்சு பூஞ்சோலை
      மொய்ம்மலர் சுமந்திழி நிவாவந்து 
அருகு உரிஞ்சுநெல் வாயில்
      அரத்துறை அடிகள்தம் அருளே.  5  

உரவு நீர்சடைக் கரந்த
      ஒருவன் என்று உள் குளிர்ந்து ஏத்திப்
பரவி நைபவர்க்கு அல்லால்
      பரிந்து கைகூடுவது அன்றால்
குரவ நீடு உயர் சோலைக்
      குளிர்புனல் நிவாமல்கு கரைமேல்
அரவ மாருநெல் வாயில்
      அரத்துறை அடிகள்தம் அருளே.  6 

 நீல மாமணி மிடற்று
      நீறு அணி சிவன் எனப் பேணும்
சீல மாந்தர்கட்கு அல்லால்
      சென்று கைகூடுவது அன்றால்
கோல மாமலர் உந்திக்
      குளிர்புனல் நிவாமல்கு கரைமேல்
ஆளும் சோலை நெல் வாயில்
      அரத்துறை அடிகள்தம் அருளே.  7  

செழுந்தண் மால்வரை எடுத்த
      செருவலி இராவணன் அலற
அழுந்த ஊன்றிய விரலான்
     போற்றி என்பார்க்கு அல்லது அருளான்
கொழுங் கனி சுமந்து உந்திக்
      குளிர்புனல் நிவாமல்கு கரைமேல்
அழுந்தும் சோலைநெல் வாயில்
      அரத்துறை அடிகள்தம் அருளே.  8  

நுணங்கு நூல் அயன் மாலும்
      இருவரும் நோக்கு அரியானை
வணங்கி நைபவர்க்கு அல்லால்
      வந்து கைகூடுவது அன்றால்
மணங் கமழ்ந்து பொன் உந்தி
      வருபுனல் நிவாமல்கு கரைமேல்
அணங்கும் சோலைநெல் வாயில்
      அரத்துறை அடிகள்தம் அருளே.  9  

சாக்கி யப்படு வாரும்
      சமண்படு வார்களும் மற்றும்
பாக்கியப் படகில்லாப்
      பாவிகள் தொழச் செல்வது அன்றால்
பூக் கமழ்ந்து பொன் உந்திப்
     பொருபுனல் நிவாமல்கு கரைமேல்
ஆர்க்கும் சோலைநெல் வாயில்
      அரத்துறை அடிகள்தம் அருளே.  10  

கறையினார் பொழில் சூழ்ந்த
      காழியுள் ஞான சம்பந்தன்
அறையும் பூம்புனல் பரந்த
      அரத்துறை அடிகள்தம் அருளை
முறைமை யால் சொன்ன பாடல்
     மொழியும் மாந்தர் தம் வினை போய்ப்
பறையும் ஐயுறவு இல்லைப்
      பாட்டு இவை பத்தும் வல்லார்க்கே.

    திருச்சிற்றம்பலம்