திரு அஞ்சைக்களம்

      

௨ 

சுந்தரமூர்த்திசுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருஅஞ்சைக்களம்
ஊர்	திருவஞ்சிக் குளம்
நாடு	மலைநாடு
ॐசுவாமி	மகாதேவர், அஞ்சைக்களத்து ஈசர்
ॐஅம்பிகை	உமையம்மை
பாடியவர்கள்	சுந்தரர்(1)         தலைக்கு தலை (7:4)
ஸ்தல மரம்
தீர்த்தம்
பண்	இந்தளம்
குறிப்புகள்	கயிலாயத்தில் இருந்து வெள்ளையானை வந்து சுந்தரரை கயிலயத்திற்கு அழைத்து சென்ற பதி பரசுராமர் தாயைக் கொன்ற பாவம் நீங்க வழிபட்ட தலம் இங்குள்ள நடராசர் சேரமான் பெருமான் பூசித்தது.
பதிக பலன்	நிலையாமை நீங்கப் பெறுவர்
வரிசை எண்.	4                                                                                       1/1

திருச்சிற்றம்பலம்

தலைக்குத் தலைமாலை அணிந்தது என்னே
          சடைமேற் கங்கைவெள்ளம் தரித்தது என்னே
அலைக்கும் புலித்தோல் கொண்டசைத்து என்னே
          அதன்மேற் கதநாகக் கச்சு ஆர்த்தது என்னே
மலைக்கும்  நிகர் ஒப்பனவன் திரைகள்
          வலித்தெற் றிமுழங் கிவலம் புரிகொண்டு 
அலைக்குங் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  1  

பிடித்து ஆட்டி ஓர்நாகத் தைப்பூண்டது என்னே
          பிறங்குஞ் சடைமேற் பிறைசூடிற்று என்னே
பொடித்தான் கொண்டுமெய்ம் முற்றும்பூசிற்று என்னே
          புகர் ஏறு உந்து ஏறல் புரிந்தது என்னே
மடித்தோட் டந்துவன் றிரைஎற் றியிட
          வளர்சங்கம் அங்காந்து முத்தஞ் சொரிய
அடித்தார் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  2  

சிந்தித்து எழுவார்க்கு நெல்லிக் கனியே
          சிறியார் பெரியார் மனத்தேறல் உற்றால்
முந்தித் தொழுவார் இறவார் பிறவார்
          முனிகள் முனியே அமரர்க்கு அமரா
சந்தித்தட மால் வரைபோல் திரைகள்
          தணியாது இடறுங் கடலங் கரைமேல்
அந்தித் தலைச்செக்கர் வானே ஒத்தியால்
          அணியார் பொழில்அஞ் சைக்களத்து அப்பனே.  3  

இழைக்கும் எழுத்துக்கு உயிரே ஒத்தியால்
          இலையே ஒத்தியால் உனையே ஒத்தியால்
குழைக்கும் பயிர்க்கோர் புயலே ஒத்தியால்
          அடியார் தமக்கு ஓர் குடியே ஒத்தியால்
மழைக்குந் நிகர்ஒப் பனவன் திரைகள்
          வலித்தெற் றிமுழங்கி வலம்புரி கொண்டு 
அழைக்குங் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  4  

வீடின் பயன் என் பிறப்பின் பயன் என்
          விடை ஏறுவது என் மதயா னைநிற்கக்
கூடும் மலைமங் கைஒருத் தியுடன்
          சடைமேற் கங்கையாளை நீசூடிற்று என்னே
பாடும் புலவர்க்கு அருளும் பொரு என்
          நிதியம் பலசெய் தகலச் செலவில்
ஆடுங் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  5  

இரவத் திடுகாட்டு எரியாடிற்று என்னே
          இறந்தார் தலையிற் பலிகோடல் என்னே
பரவித் தொழுவார் பெறுபண்டம் என்னே
          பரமா பரமேட் டிபணித்து அருளாய்
உரவத் தொடுசங்க மோடு இப்பிமுத்தம்
          கொணர்ந்து எற் றிமுழங் கிவலம் புரிகொண்டு 
அரவக் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  6  

ஆக்கும் மழிவும் ஐயநீ! என்பன்நான்
          சொல்லுவார் சொற்பொருள் இவைநீ என்பன்நான்
நாக்கும் செவியுங் கண்ணும்நீ என்பன்நான்
          நலனே இனிநான் உனைநன்கு உணர்ந்தேன்
நோக்கும் நிதியம் பலஎத் தனையும்
          கலத்திற் புதுப்பெய்து கொண்டேற உந்தி
ஆர்க்குங் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  7  

வெறுத்தேன் மனைவாழ்க் கையைவிட்டு ஒழிந்தேன்
          விளங்குங் குழைக்கா துடைவே தியனே
இறுத்தாய் இலங்கைக்கு இறையா யவனைத்
          தலைபத் தொடுதோள் பல அற் றுவிழக்
கறுத்தாய் கடல்நஞ்சு அமுது உண்டு கண்டங்
          கடுகப் பிரமன் தலை ஐந்திலும் ஒன்று 
அறுத்தாய் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  8  

பிடிக்குக் களிறே ஒத்தியால் எம்பிரான்
          பிரமற் கும்பிரான் மற்றைமாற் கும்பிரான்
நொடிக்கும் அளவிற் புரமூன்று எரியச்
          சிலைதொட் டவனே உனைநான் மறவேன்
வடிக்கின்றன போற் சிலவன் திரைகள்
          வலித்தெற் றிமுழங் கிவலம் புரிகொண்டு 
அடிக்குங் கடலங் கரைமேல் மகோதை
          அணியார் பொழில்அஞ் சைக்களத்து அப்பனே.  9  

எந்தம் அடிகள் இமையோர் பெருமான்
          எனக்கு என்றும் அளிக் கும்மணி மிடற்றன்
அந்தண் கடலங் கரைமேல் மகோதை
          அணியார் பொழில்அஞ் சைக்களத்து அப்பனை
மந்தம் முழவுங் குழலும் இயம்பும்
          வளர்நா வலர்கோன் நம்பியூ ரன்சொன்ன
சந்தம் மிகுதண் தமிழ்மாலை கள்கொண்டு
          அடிவீ ழவல்லார் தடுமாற்று இலரே.

திருச்சிற்றம்பலம்