திருக்கானப்பேர்

                   

௨ 

சுந்தரமூர்த்தி சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருக்கானப்பேர்
ஊர் /வேறு பெயர்	காளையார் கோவில், சோதிவனம்,  மனதார வனம் , தக்ஷினகாளிபுரம், பூலோக கயிலாயம்
நாடு	பாண்டிய நாடு
ॐசுவாமி	காளீஸ்வரர், சோமேசர்
ॐஅம்பிகை	சொர்ண வல்லி
பாடியவர்கள்	திருஞானசம்பந்தர் (1),       )   பிடிஎலாம் பின் செலப்  (3-26 சுந்தரர் (1)         தொண்டர் அடி தொழும் (7-84)
ஸ்தல மரம்	மந்தாரை
தீர்த்தம்	கஜ புஷ்கரணி, காளி தீர்த்தம்
பண்	கொல்லி
குறிப்புகள்	கானபேராயில் என்பது சங்க கால பெயர்  ஐராவதம் வழிபட்ட தலம்  ஈசன் காளை வடிவில் சுந்தரர் முன் தோன்றி, யாம் இருப்பது  "கானப்பேர்" என சொல்லி மறைந்த தலம்
பதிக பலன்	தலைமை பதவியில் வாழலாம்
வரிசை எண்.	84                                                               10/14

திருச்சிற்றம்பலம்

தொண்டர் அடித் தொழலும் சோதி இளம்பிறையும்
          சூதன மென்முலையாள் பாகமும் ஆகிவரும்
புண்டரி கப்பரிசாம் மேனியும் வானவர்கள்
          பூச லிடக்கடல்நஞ் சு உண்ட கருத்தமரும்
கொண்டல் எனத்திகழும் கண்டமும் எண்டோ ளும்
         கோல நறுஞ்சடைமேல் வண்ணமும் கண்குளிரக்
கண்டு தொழப் பெறுவது என்று கொ லோஅடியேன்
          கார்வயல் சூழ்கானப் பேருறை காளையையே.  1  

கூதல் இடும் சடையும் கோளர வும்விரவும்
          கொக்கிறகும் குளிர்மா மத்தமும் ஒத்துனதாள்
ஓதல் உணர்ந்து அடியார் உன்பெரு மைக்கு நினைந்து 
          உள்ளுரு காவிரசும் ஓசையைப் பாடலும்நீ
ஆதல் உணர்ந்தவரோடு அன்பு பெருத்து அடியேன்
          அங்கையின் மாமலர்கொண்டு  என்கணது அல்லல்கெடக்
காதல் உறத்தொழுவது என்றுகொ லோவடியேன்
          கார்வயல் சூழ்கானப் பேருறை காளையையே.  2  

நானுடை மாடெனவே நன்மை தரும்பரனை
          நற்பதம் என்று உணர்வார் சொற்பதம் ஆர்சிவனைத்
தேனிடை இன் அமுதை மற்ற அதனில் தெளிவைத்
          தேவர்கள் நாயகனைப் பூவுயர் சென்னியனை
வானிடை மாமதியை மாசறு சோதியனை
          மாருத மும் அனலும் மண்டலமும் ஆய
கானிடை மாநடன் என்று எய்துவது என்றுகொலோ
          கார்வயல் சூழ்கானப் பேருறை காளையையே.  3  

செற்றவர் முப்புரம்அன்று அட்ட சிலைத்தொழிலார்
          சேவகம்  முன்நினைவார் பாவக முந்நெறியும்
குற்றமில் தன் அடியார் கூறும் இசைப்பரிசும்
          கோசிக மும் அரையிற் கோவணமும் அதளும்
மற்றிகழ் திண்புயமும் மார்பிடை நீறுதுதை
          மாமலை மங்கை உமை சேர்சுவ டும்புகழக்
கற்றன வும் பரவிக் கைதொழல் என்றுகொலோ
          கார்வயல் சூழ்கானப் பேருறை காளையையே.  4  

கொல்லை விடைக்கழகுங் கோல நறுஞ்சடையிற்
          கொத்தல ரும்மிதழித் தொத்தும் அதனருகே
முல்லை படைத்தநகை மெல்லிய லாளொருபால்
          மோகம் மிகுத்திலங்குங் கூறுசெய் யெப்பரிசுந்
தில்லை நகர்ப்பொதுவுற் றாடிய சீர்நடமுந்
          திண்மழு வுங்கைமிசைக் கூரெரி யும்மடியார்
கல்ல வடப்பரிசுங் காணுவ தென்றுகொலோ
          கார்வயல் சூழ்கானப் பேருறை காளையையே.  5  

பண்ணு தலைப்பயனார் பாடலும் நீடுதலும்
          பங்கய மாதனையார் பத்தியும் முத்தி அளித்து 
எண்ணு தலைப்பெருமான் என்று எழு வார் அவர்தம்
          ஏசற வும் இறையாம் எந்தையையும் விரவி
நண்ணு தலைப்படுமாறு எங்ஙனம் என்று அயலே
          நைகிற என்னைமதித்து உய்யும் வண்ணம் அருளும்
கண்ணு தலைக்கனியைக் காண்பதும் என்றுகொலோ
          கார்வயல் சூழ்கானப் பேருறை காளையையே.  6  

மாவை உரித்து அதள் கொண்டு அங்கம் அணிந்தவனை
          வஞ்சர் மனத்திறையும் நெஞ்சு அணுகாதவனை
மூவர் உருத்தனதாம் மூல முதற்கருவை
          மூசிடு மால்விடையின் பாகனை ஆகம் உறப்
பாவகம் இன்றி மெய்யே பற்றும் அவர்க்கு  அமுதைப்
          பால் நறுநெய் தயிர் ஐந்து ஆடு பரம்பரனைக்
காவல் எனக்கு இறை என்று எய்துவது என்றுகொலோ
          கார்வயல் சூழ்கானப் பேருறை காளையையே.  7  

தொண்டர் தமக்கு எளிய சோதியை வேதியனைத்
          தூய மறைப்பொருளாம் நீதியை வார்கடல்நஞ்சு 
உண்டு அதனுக்கு இறவாது என்றும் இருந்தவனை
          ஊழி படைத்தவனோடு ஒள்ளரி யும் உணரா
அண்டனை அண்டர் தமக்கு ஆகம நூல்மொழியும்
          ஆதியை மேதகு சீர் ஓதியை வானவர்தம்
கண்டனை அன்பொடு சென்று எய்துவது என்றுகொலோ
          கார்வயல் சூழ்கானப் பேருறை காளையையே.  8  

நாதனை நாதமிகுத்து ஓசையது ஆனவனை
          ஞான விளக்கு ஒளியாம் ஊன் உயிரைப் பயிரை
மாதனை மேதகு தன் பத்தர் மனத்திறையும்
          பற்று விடாதவனைக் குற்றம் இல் கொள்கையனைத்
தூதனை என்றனையாள் தோழனை நாயகனைத்
          தாழ்மக ரக்குழையும் தோடும் அணிந்ததிருக்
காதனை நாயடியேன் எய்துவது என்றுகொலோ
          கார்வயல் சூழ்கானப் பேருறை காளையையே.  9  

கன்னலை இன் அமுதைக் கார்வயல் சூழ்கானப்
          பேருறை காளையைஒண் சீருறை தண் தமிழால்
உன்னி மனத்து அயரா உள்ளுருகிப் பரவும்
          ஒண்பொழில் நாவலர்கோன் ஆகிய ஆரூரன்
பன்னும் இசைக்கிளவி பத்து இவை பாடவல்லார்
          பத்தர் குணத்தினராய் எத்திசை யும்புகழ
மன்னி இருப்பவர்கள் வானின் இழிந்திடினும்
          மண்டல நாயகராய் வாழ்வது நிச்சயமே.

       

திருச்சிற்றம்பலம்