திரு இராமேஸ்வரம்

                      

௨ 

திருஞானசம்பந்தர்சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	திருஇராமேஸ்வரம்
ஊர் /வேறு பெயர்
நாடு	பாண்டிய நாடு
ॐசுவாமி	இராமநாதசுவாமி
ॐஅம்பிகை	பர்வத வர்த்தனி, மலைவளர் காதலி
பாடியவர்கள்	திருஞானசம்பந்தர் (2),         அலை வளர் தண் மதி  (3-10)         திரி தரு மாமணி (3-101) அப்பர் (1)         பாசமும் கழிக்க (4-61)
ஸ்தல மரம்	மகிழம்
தீர்த்தம்	அக்னி  தீர்த்தம் , உட்பட 22 தீர்த்தங்கள்
பண்	பழம் பஞ்சுரம்
குறிப்புகள்	இராவணனை கொன்ற பழி தீர இராமபிரான் பூசித்த தலம்  அனுமான் கொண்டு வந்த லிங்கம் விசுவலிங்கம் என தனியாக உள்ளது.  பன்னிரு ஜோதிர்லிங்க தலத்தில் தமிழகத்தில் உள்ள ஒரே தலம்
பதிக பலன்	வினை  நீங்கும்.
வரிசை எண்.	101                                                                8/14

திருச்சிற்றம்பலம்

திரிதரு மாமணி நாகம் ஆடத்
      திளைத்து ஒரு தீ அழல்வாய்
நரிகதிக்க எரி ஏந்தியாடும்
      நலமே தெரிந்து உணர்வார்
எரிகதிர் முத்தம் இலங்குகானல்
      இராமேச் சுரமேய
விரிகதிர் வெண்பிறை மல்குசென்னி
      விமலர் செயும்செயலே.  1  

பொறிகிளர் பாம்பரை ஆர்த்து அயலே
      புரிவோடு உமை பாடத்
தெறிகிள ரப்பெயர்ந்து எல்லியாடும்
      திறமே தெரிந்து உணர்வார்
எறிகிளர் வெண்திரை வந்துபேரும்
      இராமேச் சுரமேய
மறிகிளர் மான்மழுப் புல்குகை எம்
      மணாளர் செயும்செயலே.  2  

அலைவளர் தண்புனல் வார்சடைமேல்
      அடக்கி ஒருபாகம்
மலைவளர் காதலி பாடஆடி
      மயக்கா வருமாட்சி
இலைவளர் தாழை முகிழ்விரியும்
      இராமேச் சுரமேயார்
தலைவளர் கோலநன் மாலைசூடும்
      தலைவர் செயும் செயலே.  3  

மாதன நேரிழை ஏர் தடங்கண்
      மலையான் மகள்பாடத்
தேதெரி அங்கையில் ஏந்தி ஆடும்
      திறமே தெரிந்து உணர்வார்
ஏதம் இலார் தொழுது ஏத்தி வாழ்த்தும்
      இராமேச் சுரமேயார்
போதுவெண் திங்கள் பைங் கொன்றைசூடும்
      புனிதர் செயும் செயலே.  4  

சூலமோடு ஒண்மழு நின்றிலங்கச்
      சுடுகாடு இடமாகக்
கோலநன் மாதுடன் பாடஆடும்
      குணமே குறித்து உணர்வார்
ஏலந றும்பொழில் வண்டு பாடும்
      இராமேச் சுரமேய
நீலமார் கண்டம் உடைய எங்கள்
      நிமலர் செயும் செயலே.  5  

கணைபிணை வெஞ்சிலை கையில் ஏந்திக்
      காமனைக் காய்ந்தவர்தாம்
இணைபிணை நோக்கிநல் லாளொடாடும்
      இயல்பினர் ஆகி நல்ல
இணைமலர் மேல் அன்னம் வைகுகானல்
      இராமேச் சுரமேயார்
அணைபிணை புல்கு கரந்தைசூடும்
      அடிகள் செயும் செயலே.  6  

நீரினார் புன்சடை பின்புதாழ
      நெடுவெண் மதிசூடி
ஊரினார் துஞ்சிருள் பாடி ஆடும்
      உவகை தெரிந்து உணர்வார்
ஏரினார் பைம்பொழில் வண்டுபாடும்
      இராமேச் சுரமேய
காரினார் கொன்றைவெண் திங்கள் சூடும்
      கடவுள் செயும் செயலே.  7  

பொன் தி கழ் சுண்ணவெண் நீறு பூசிப்
      புலித்தோல் உடையாக
மின் திகழ் சோதியர் பாடலாடல்
      மிக்கார் வருமாட்சி
என்று நல்லோர்கள் பரவி ஏத்தும்
      இராமேச் சுரமேயார்
குன்றினால் அன்று அரக்கன் தடந்தோள்
      அடர்த்தார் கொளும் கொள்கையே.  8  

கோவலன் நான்முகன் நோக்கொணாத
      குழகன் அழகாய
மேவலன் ஒள்ளெரி ஏந்தி ஆடும்
      இமையோர் இறை மெய்ம்மை
ஏவல னார்புகழ்ந்து ஏத்திவாழ்த்தும்
      இராமேச் சுரமேய
சேவல வெல்கொடி ஏந்து கொள்கை எம்
      இறைவர் செயும் செயலே.  9  

பின்னொடு முன்னிடு தட்டைச்சாத்திப்
      பிரட்டே திரிவாரும்
பொன்னெடுஞ் சீவரப் போர்வையார்கள்
      புறங்கூறல் கேளாதே
இன்னெடுஞ் சோலை வண்டு யாழ் முரலும்
      இராமேச் சுரமேய
பன்னெடு வெண் தலை கொண்டு உழலும்
      பரமர் செயும் செயலே.  10  

தேவியை வவ்விய தென்னிலங்கை
      அரையன் திறல்வாட்டி
ஏவியல் வெஞ்சிலை அண்ணல் நண்ணும்
      இராமேச் சுரத்தாரை
நாவியன் ஞானசம் பந்தன்நல்ல
      மொழியான் நவின்று ஏத்தும்
பாவியன் மாலை வல்லார் அவர்தம்
      வினை ஆயின பற்று அறுமே.

        

திருச்சிற்றம்பலம்