திரு கொடுங்குன்றம்

   

௨ 

திருஞானசம்பந்தர் சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	திரு கொடுங்குன்றம்
ஊர் /வேறு பெயர்	பிரான்மலை
நாடு	பாண்டிய நாடு
ॐசுவாமி	கொடுங்குன்றீசர்
ॐஅம்பிகை	குயில் அமுத நாயகி, அமிர்தேஸ்வரி
பாடியவர்கள்	திருஞானசம்பந்தர் (1)         வானில் பொலிவு (1 -014)
ஸ்தல மரம்	உறங்காப் புளி
தீர்த்தம்	தேன் ஆதி
பண்	நட்ட பாடை
குறிப்புகள்	தற்போது பிரான்மலை என்று அழைக்கப்படுகிறது .  மகோதர மகரிஷி பூசித்தது.  இங்குள்ள மரம் என்ன பெயர் என்றே கண்டு பிடிக்க வில்லை. பெயரில்லா மரம் என்றே அழைக்கப்படுகிறது  பாரி வள்ளல் பூசித்த தலம்
பதிக பலன்	குறைகள் தீரும், துன்பம் விலகும். பாராட்டு பெறுவர்
வரிசை எண்.	014                                                                5/14

திருச்சிற்றம்பலம்

வானில் பொலிவு  எய்தும் மழை 

மேகம் கிழித்து ஓடிக்

கூனற்பிறை சேரும் குளிர் 

சாரல் கொடுங்குன்றம்

ஆனில்  பொலி ஐந்தும் அமர்ந்து  

ஆடி உலகு ஏத்தத்

தேனில் பொலி மொழியாளொடு 

மேயான் திரு நகரே.  1  

மயில் புல்கு தண் பெடையோடு உடன் 

ஆடும் வளர் சாரல்

குயிலின் இசை பாடும் குளிர் 

சோலைக் கொடுங்குன்றம்

அயில் வேல் மலி நெடு வெஞ்சுடர் 

அனல் ஏந்தி நின்று ஆடி

எயில் முன் பட எய்தான் அவன் 

மேயவ் எழில் நகரே.  2  

மிளிரும்மணி பைம்பொன்னொடு 

விரைமாமலர் உந்திக்

குளிரும்புனல் பாயுங்குளிர் 

சாரல் கொடுங்குன்றம்

கிளர்கங்கையொடு இள வெண்மதி 

கெழுவும் சடை தன்மேல்

வளர்கொன்றையும் மதமத்தமும் 

வைத்தான் வளநகரே.  3  

பருமாமத கரியோடு அரி 

இழியும் விரி சாரல்

குருமாமணி பொன்னோடு இழி 

அருவிக் கொடுங்குன்றம்

பொருமா எயில் வரைவில்தரு 

கணையில் பொடி செய்த

பெருமான் அவன் உமையாளொடு 

மேவும் பெரு நகரே.  4  

மேகத்து இடி குரல்வந்து எழ 

வெரு இவ்வரை இழியும்

கூகைக்குலம் ஓடித்திரி 

சாரல் கொடுங்குன்றம்

நாகத் தொடும் இளவெண்பிறை 

சூடிந் நல மங்கை

பாகத்து அவன் இமையோர்தொழ 

மேவும் பழ நகரே.  5  

கைம்மாமத கரியின் இனம் 

இடியின் குரல் அதிரக்

கொய்ம் மாமலர்ச் சோலை புக 

மண்டும் கொடுங்குன்றம்

அம்மான் என உள்கித் தொழு 

வார்கட்கு அருள் செய்யும்

பெம்மான் இவன் இமையோர்தொழ 

மேவும் பெரு நகரே.  6  

மரவத்தொடு மணமாதவி 

மௌவல்லது விண்ட

குரவத்தொடு விரவும்பொழில் 

சூழ்தண்கொடுங் குன்றம்

அரவத்தொடும் இளவெண்பிறை 

விரவும் மலர்க் கொன்றை

நிரவச் சடை முடிமேல் உடன் 

வைத்தான்நெடு நகரே.  7  

முட்டாமுது கரியின் இனம் 

முது வேய்களை முனிந்து

குட்டாச் சுனை அவை மண்டிநின்று  

ஆடும் கொடுங் குன்றம்

ஒட்டா அரக்கன் தன் முடி 

ஒரு பஃது அவை உடனே

பிட்டான் அவன் உமையாளொடு 

மேவும் பெரு நகரே.  8  

அறையும் அரி குரல் ஓசையை 

        அஞ்சி அடும் ஆனை

குறையும் மன மாகிம்முழை 

        வைகும் கொடுங்குன்றம்

மறையும் அவை உடையான் என 

        நெடியான் என இவர்கள்

இறையும் அறி ஒண்ணாதவன் 

        மேய அவ் எழில் நகரே.  9  

மத்தக் களிறு ஆளி இவ்வர 

அஞ்சிம்மலை தன்னைக்

குத்திப்பெரு முழைதன்னிடை 

வைகும் கொடுங்குன்றம்

புத்தரொடு பொல்லா மனச் 

சமணர்புறங் கூறப்

பத்தர்க்கு அருள் செய்தான் அவன் 

மேய பழ நகரே.  10  

கூனற்பிறை சடைமேல் மிக 

உடையான் கொடுங்குன்றைக்

கானல் கழுமல மாநகர்த் 

தலைவன் நல கவுணி

ஞானத்து உயர் சம்பந்தன 

நலம் கொள்தமிழ் வல்லார்

ஊனத்தொடு துயர் தீர்ந்து உலகு  

ஏத்தும் எழி லோரே.

திருச்சிற்றம்பலம்