திரு ஏடகம்

  

௨ 

திருஞானசம்பந்தர் சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	திரு ஏடகம்
ஊர் /வேறு பெயர்
நாடு	பாண்டிய நாடு
ॐசுவாமி	திரு ஏடகநாதர்
ॐஅம்பிகை	ஏலவார் குழலி
பாடியவர்கள்	திருஞானசம்பந்தர் (1)         வன்னியும் மத்தமும்   (3 -032)
ஸ்தல மரம்	வில்வம்
தீர்த்தம்	பிரம தீர்த்தம்
பண்	கொல்லி
குறிப்புகள்	புனல் வாதத்தின் போது, ஞானசம்பந்தர் வாழ்க அந்தணர் என்னும் பதிகத்தை ஓலையில்  எழுதி வைகை ஆற்றில் விட அது எதிர் திசை நோக்கி விரைந்து தாங்கிய இடம்.  பிரமன்,  திருமால், ஆதிசெடன் கருடன் வியாசர் பாராசரர் ஆகியோர் வழிபட்டது.
பதிக பலன்	தீவினை நீங்கப் பெறுவர்.
வரிசை எண்.	032                                                                4/14

திருச்சிற்றம்பலம்

வன்னியும் மத்தமும்

          மதிபொதி சடையினன்

பொன்னியல் திருவடி

          புதுமலர் அவைகொடு

மன்னிய மறையவர்

          வழிபட அடியவர்

இன்னிசை பாடலர்

          ஏடகத்து ஒருவனே.  1  

கொடிநெடு மாளிகை

          கோபுரம் குளிர்மதி

வடிவுற அமைதர

          மருவிய ஏடகத்து 

அடிகளை அடிபணிந்து 

          அரற்றுமின் அன்பினால்

இடிபடும் வினைகள்போய்

          இல்லையது ஆகுமே.  2  

குண்டலம்  திகழ்தரு

          காதுடைக் குழகனை

வண்டு அலம்பும் மலர்க்

          கொன்றைவான் மதி அணி

செண்டலம்பும் விடைச்

          சேடனூர் ஏடகம்

கண்டுகை தொழுதலும்

          கவலை நோய் கழலுமே.  3  

ஏலமார் தருகுழல்

          ஏழையோடு எழில் பெறும்

கோலமார் தருவிடைக்

          குழகனார் உறைவிடம்

சாலமாதவிகளும்

          சந்தனம் சண்பகம்

சீலமார் ஏடகம்

          சேர்தலாம் செல்வமே.  4  

வரியணி நயனிநன்

          மலைமகள் மறுகிடக்

கரியினை உரிசெய்த

          கறை அணி மிடறினன்

பெரியவன் பெண்ணினோடு 

          ஆண் அலி யாகிய

எரியவன் உறைவிடம்

          ஏடகக் கோயிலே.  5  

பொய்கையின் பொழிலுறு

          புதுமலர்த் தென்றலார்

வைகையின் வடகரை

          மருவிய ஏடகத்து 

ஐயனை அடிபணிந்து 

          அரற்றுமின் அடர்தரும்

வெய்யவன் பிணிகெட

          வீடு எளிது ஆகுமே.  6  

இப்பதிகத்தில் 7-ம் பாடல் கிடைக்கப்பெறவில்லை.  7  

தடவரை எ\டுத்தவன்

          தருக்கிறத் தோள் அடர்

படவிரல் ஊன்றியே

          பரிந்தவற்கு அருள்செய்தான்

மடவரல் எருக்கொடு

          வன்னியும் மத்தமும்

இடமுடைச் சடையினன்

          ஏடகத்து இறைவனே.  8  

பொன்னுமா மணிகளும்

          பொருதிரைச் சந் அகில்

தன்னுளார் வைகையின்

          கரைதனில் சமைவுற

அன்னமாம் அயனும் மால் 

          அடிமுடி தேடியும்

இன்னவாறு எனவொணான்

          ஏடகத்து ஒருவனே.  9  

குண்டிகைக் கையினர்

          குணமிலாத் தேரர்கள்

பண்டியைப் பெருக்கிடும்

          பளகர்கள் பணிகிலர்

வண்டிரைக்கும் மலர்க்

          கொன்றையும் வன்னியும்

இண்டைசேர்க்கும் சடை

          ஏடகத்து எந்தையே.  10  

கோடு சந்தனம் அகில்

          கொண்டிழி வைகைநீர்

ஏடு சென்று அணைதரும்

          ஏடகத்து ஒருவனை

நாடு தென் புகலியுள்

          ஞானசம் பந்தன

பாடல் பத்து இவை வல்லார்க்கு 

          இல்லையாம் பாவமே.

திருச்சிற்றம்பலம்