திருமந்திரம்: முதல் தந்திரம்-உபதேசம்

    

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	கடவுள் வாழ்த்து
தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	வேத சிறப்பு
பிற குறிப்புகள்

திருச்சிற்றம்பலம்

விண் நின்று இழிந்து வினைக்கு ஈடாய் மெய்கொண்டு

தண் நின்ற தாளைத் தலைக்காவல் முன்வைத்து

உண் நின்று உருக்கி ஓர் ஒப்பிலா ஆனந்தக்

கண் நின்று காட்டிக் களிம்பு அறுத் தானே.  1  

களிம்பு அறுத் தான்எங்கள் கண்ணுதல் நந்தி

களிம்பு அறுத் தான்அருள் கண்விழிப் பித்துக்

களிம்பு அணு காத கதிரொளி காட்டிப்

பளிங்கில் பவளம் பதித்தான் பதியே.  2  

பதிபசு பாசம் எனப்பகர் மூன்றில்

பதியினைப் போல் பசு பாசம் அனாதி

பதியினைச் சென்று அணு காப் பசு பாசம்

பதி அணு கிற்பசு பாசம் நில் லாவே.  3  

வேயின் எழுங்கனல் போலேஇம் மெய் எனும்

கோயில் இருந்து குடிகொண்ட கோன்நந்தி

தாயினும் மும்மலம் மாற்றித் தயாஎன்னும்

தோயம் அதாய் எழும் சூரியன் ஆமே.  4  

சூரிய காந்தமும் சூழ்பஞ்சும் போலவே

சூரிய காந்தம் சூழ்பஞ்சைச் சுட்டிடா

சூரியன் சந்நிதி யிற்சுடு மாறுபோல்

ஆரியன் தோற்றமுன் அற்ற மலங்களே.  5  

மலங்களைந்தாம் என மாற்றி அருளித்

தலங்கள் ஐந் தானல் சதாசிவ மான

புலங்களைந் தான்அப் பொதுவினுள் நந்தி

நலங்களைந் தான்உள் நயந்தான் அறிந்தே.  6  

அறிவு ஐம்புலனுட னே நான்றது ஆகி

நெறி அறியா உற்ற நீர்ஆழம் போல

அறிவுஅறி வுள்ளே அழிந்தது போலக்

குறி அறிவிப்பான் குருபர னாமே.  7  

ஆமேவு பால்நீர் பிரிக்கின்ற அன்னம்போல்

தாமே தனிமன்றில் தன்னந் தனிநித்தம்

தீமேவு பல்கர ணங்களுள் உற்றன

தாம் ஏழ் பிறப்பு எரி சார்ந்தவித் தாமே.  8  

வித்தைக் கெடுத்து வியாக்கிரத் தேமிகச்

சுத்தத் துரியம் பிறந்து துடக்கற

ஒத்துப் புலனுயிர் ஒன்றாய் உடம்பொடு

செத்திட்டிருப்பர் சிவயோகி யார்களே.  9  

சிவயோக மாவது சித்து அசித்து என்று

தவயோகத் துள்புக்குத் தன் ஒளி தானாய்

அவயோகம் சாராது அவன்பதி போக

நவயோக நந்தி நமக்கு அளித் தானே.  10  

அளித்தான் உலகு எங்கும் தானான உண்மை

அளித்தான் அமரர் அறியா உலகம்

அளித்தான் திருமன்றுள் ஆடும் திருத்தாள்

அளித்தான் பேரின்பத்து அருள்வெளி தானே.  11  

வெளியில் வெளிபோய் விரவிய வாறும்

அளியில் அளிபோய் அடங்கிய வாறும்

ஒளியில் ஒளிபோய் ஒடுங்கிய வாறும்

தெளியும் அவரே சிவ சித்தர் தாமே.  12  

சித்தர் சிவலோகம் இங்கே தெரிசித்தோர்

சத்தமும் சத்த முடிவும் தம் முள்கொண்டோர்

நித்தர் நிமலர் நிராமயர் நீள்பர

முத்தர்தம் முத்தி முதல்முப்பத்து ஆறே.  13  

முப்பதும் ஆறும் படிமுத்தி ஏணியாய்

ஒப்பிலா ஆனந்தத்து உள் ஒளி புக்குச்

செப்ப அரிய சிவம் கண்டு தான்தெளிந்து

அப்பரி சாக அமர்ந்து இருந் தாரே.  14  

இருந்தார் சிவமாகி எங்குந் தாமாகி

இருந்தார் சிவன்செயல் யாவையும் நோக்கி

இருந்தார் முக்காலத்து இயல்பைக் குறித்து அங்கு

இருந்தார் இழவுவந்து எய்திய சோம்பே.  15  

சோம்பர் இருப்பது சுத்த வெளியிலே

சோம்பர் கிடப்பதும் சுத்த வெளியிலே

சோம்பர் உணர்வு சுருதி முடிந்திடம்

சோம்பர் கண் டார்அச் சுருதிக்கண் தூக்கமே.  16  

தூங்கிக்கண் டார்சிவ லோகமும் தம்முள்ளே

தூங்கிக்கண் டார்சிவ யோகமும் தம்முள்ளே

தூங்கிக்கண் டார்சிவ போகமும் தம்முள்ளே

தூங்கிக்கண் டார்நிலை சொல்வது எவ் வாறே.  17  

எவ்வாறு காண்பான் அறிவு தனக்கு எல்லை

அவ்வாறு அருட்செய்வன் ஆதிஅரன் தானும்

ஒவ்வாத மன்றுள் உமைகாண ஆடிடும்

செவ்வானிற் செய்ய செழுஞ்சுடர் மாணிக்கம்.  18  

மாணிக்கத் துள்ளே மரகதச் சோதியாய்

மாணிக்கத் துள்ளே மரகத மாடமாய்

ஆணிப்பொன் மன்றில் ஆடும் திருக்கூத்தைப்

பேணித் தொழுது என்ன பேறுபெற் றாரே.  19  

பெற்றார் உலகிற் பிரியாப் பெருநெறி

பெற்றார் உலகிற் பிறவாப் பெரும்பயன்

பெற்றார் அம்மன்றில் பிரியாப் பெரும்பேறு

பெற்றார் உலகுடன் பேசாப் பெருமையே.  20  

பெருமை சிறுமை அறிந்து எம் பிரான்போல்

அருமை எளிமை அறிந்தறி வார்ஆர்

ஒருமையுள் ஆமைபோல் உள்ஐந்து அடக்கி

இருமையும் கேட்டு இருந் தார்புரை அற்றே.  21  

புரைஅற்ற பாலினுள் நெய்கலந் தாற்போல்

திரைஅற்ற சிந்தைநல் ஆரியன் செப்பும்

உரை அற்று உணர்வோர் உடம்பு இங்கு ஒழிந்தால்

கரையற்ற சோதி கலந்தசத் தாமே.  22  

சத்த முதல் ஐந்தும் தன்வழித் தான்சாரில்

சித்துக்குச் சித்து அன்றி சேர்விடம் வேறுண்டோ

சுத்த வெளியிற் சுடரிற் சுடர்சேரும்

அத்தம் இதுகுறித்து ஆண்டுகொள் அப்பிலே.  23  

அப்பினில் கூர்மை ஆதித்தன் வெம்மையால்

உப்பு எனப் பேர்பெற்று உருச்செய்த அவ்வுரு

அப்பினில் கூடி அது  ஒன்றாகு மாறுபோல்

செப்பினில் சீவன் சிவத்துள் அடங்குமே.  24  

அடங்குபேர் அண்டத்து அணுஅண்டம் சென்று அங்கு

இடங்கொண்டது இல்லை இது அன்றி வேறு உண்டோ

கடந்தொறும் நின்ற உயிர்க்கரை காணில்

திடம்பெற நின்றான் திருவடி தானே.  25  

திருவடி யேசிவ மாவது தேரில்

திருவடி யேசிவ லோகஞ்சிந் திக்கில்

திருவடி யேசெல் கதி அது செப்பில்

திருவடி யேதஞ்சம் உள்தெளி வார்க்கே.  26  

தெளிவு குருவின் திருமேனி காண்டல்

தெளிவு குருவின் திருநாமம் செப்பல்

தெளிவு குருவின் திருவார்த்தை கேட்டல்

தெளிவு குரு உரு சிந்தித்தல் தானே.  27  

தானே புலன்ஐந்தும் தன்வசம் ஆயிடும்

தானே புலன்ஐந்தும் தன்வசம் போயிடும்

தானே புலன்ஐந்தும் தன்னில் மடைமாறும்

தானே தனித்துஎம் பிரான்தனைச் சந்தித்தே.  28  

சந்திப் பதுநந்தி தன்திருத் தாளிணை

சிந்திப் பதுநந்தி செய்ய திருமேனி

வந்திப் பதுநந்தி நாமம் என் வாய்மையால்

புந்திக்குள் நிற்பது நந்திபொற் போதமே.  29  

போதம் தரும்எங்கள் புண்ணிய நந்தியைப்

போதம் தனில்வைத்துப் புண்ணியர் ஆயினார்

நாதன் நடத்தால் நயனம் களிகூர

வேதம் துதித்திடப் போய் அடைந்தார் விண்ணே.  30 

திருச்சிற்றம்பலம்