திரு இன்னம்பர்

௨ 

திருநாவுக்கரசர் சுவாமிகள் அருளிச்செய்த
ஐந்தாம்  திருமுறை

தகவல் பலகை	விவரம்
தலம்	திரு இன்னம்பர்
ஊர்	இன்னம்பூர்
நாடு	சோழ (காவிரி வட)
ॐசுவாமி	தான் தோன்றி ஈசர், எழுத்தறிநாதர்
ॐஅம்பிகை	சுகுந்த குந்தாளாம்பிகை & நித்தியகல்யாணி
பாடியவர்கள்	திருஞானசம்பந்தர் (1)         எண் திசைக்கும் புகழ் (3-095) திருநாவுக்கரசர்(4)         விண்ணவர் மகுடகோடி (4-072)         மண்ணும் மலைமகள் (4-100)         என்னில் ஆரும் (5-021)         அல்லிமலர் நாற்றத்து (6-089)
ஸ்தல மரம்	பலா, செண்பகம்
தீர்த்தம்	ஐராவாத தீர்த்தம்
பண்	திருக்குறுந்தொகை
குறிப்புகள்	அகத்தியர் வழிபட்டது அகத்தியர் இலக்கணம் பெற்றது ஐராவதம் பூசித்த தலம்.
பதிக பலன்	மும் மல நீக்கம் பெறலாம்.
வரிசை எண்.	100                                                             45/63

திருச்சிற்றம்பலம்

மன்னு மலைமகள் கையால் 
          வருடின மாமறைகள்
சொன்ன துறைதொறும்  
          தூப்பொருள் ஆயின தூக்கமலத்து
அன்ன வடிவின அன்புடைத் 
          தொண்டர்க்கு அமுது அரும்பி
இன்னல் களைவன இன்னம்பரான் 
          தன் இணையடியே.  1

பைதற் பிணக்குழைக் காளிவெங் 
          கோபம் பங்கப்படுப்பான்
செய்தற்கு அரிய திருநடம்
          செய்தன சீர்மறையோன் 
உய்தற் பொருட்டுவெங் கூற்றை 
          உதைத்தன உம்பர்க்கு எல்லாம்
எய்தற்கு அரியன இன்னம்பரான் 
          தன் இணையடியே.  2

சுணங்கு நின்றார்கொங்கையாள் உமை 
          சூடின தூமலரால்
வணங்கிநின்று உம்பர்கள் வாழ்த்தின 

          மன்னு மறைகள்தம்மில்

பிணங்கிநின் றின்னன வென்றறி 
          யாதன பேய்க்கணத்தோ
டிணங்கிநின் றாடின இன்னம்ப 
          ரான்றன் இணையடியே.  3

ஆறு ஒன்றிய சமயங்களின் 
          அவ்வவர்க்கு அப்பொருள்கள்
வேறு ஒன்று இலாதன விண்ணோர் 
          மதிப்பன மிக்கு உவமன்
மாறு ஒன்று இலாதன மண்ணொடு 
          விண்ணகம் மாய்ந்திடினும்
ஈறு ஒன்று இலாதன இன்னம்பரான் 
          தன் இணையடியே.  4

அரக்கர்தம் முப்புரம் அம்பு 
          ஒன்றினால் அடல் அங்கியின்வாய்க்
கரக்கமுன் வைதிகத்தேர் மிசை 
          நின்றன கட்டுருவம்
பரக்கவெங் கானிடை வேடு 
          உருவாயின பல்பதிதோறு
இரக்க நடந்தன இன்னம்பரான் 
          தன் இணையடியே.  5

கீண்டுங் கிளர்ந்தும்பொற் கேழல்முன் 
          தேடின கேடுபடா
ஆண்டும் பலபல ஊழியும் 
          ஆயின ஆரணத்தின்
வேண்டும் பொருள்கள் விளங்கநின்று
          ஆடின மேவு சிலம்பு
ஈண்டும் கழலின இன்னம்பரான்
          தன் இணையடியே.  6

போற்றுந் தகையன பொல்லா 
          முயலகன் கோபப்புன்மை
ஆற்றுந் தகையன ஆறு 
          சமயத்து அவரவரைத்
தேற்றுந் தகையன தேறிய 
          தொண்டரைச் செந்நெறிக்கே
ஏற்றும் தகையன இன்னம்பரான் 
          தன் இணையடியே.  7

பயம்புன்மை சேர்தரு பாவம்
          தவிர்ப்பன பார்ப்பதிதன்
குயம்பொன்மை மாமல ராகக் 
          குலாவின கூட ஒண்ணாச்
சயம்பு என்றே தகு தாணு 
          என்றேசதுர் வேதங்கள்நின்று
இயம்பும்  கழலின இன்னம்பரான் 
          தன் இணையடியே.  8

அயனொடு மால்இந் திரன் 
          சந்திராதித்தர் அமரர் எல்லாம்

'சயசய' என்றுமுப் போதும் 
          பணிவன தண்கடல்சூழ்
வியனில முற்றுக்கும் விண்ணுக்கும் 
          நாகர் வியன்நகர்க்கும்
இயல் பரம் ஆவன இன்னம்பரான் 
          தன் இணையடியே.  9

தருக்கிய தக்கன் தன் வேள்வி 
          தகர்த்தன தாமரைப்போது
உருக்கிய செம்பொன் உவமன் 
          இலாதன ஒண்கயிலை
நெருக்கிய வாளரக்கன் தலை 
          பத்து நெரித்தவன் தன்
இருக்கு இயல்பாயின இன்னம்பரான் 
          தன் இணையடியே.

திருச்சிற்றம்பலம்