திரு புத்தூர்

     

௨ 

திருநாவுக்கரசர்  சுவாமிகள் அருளிச்செய்த
ஆறாம்   திருமுறை

தகவல் பலகை	விவரம்
தலம்	திருப்புத்தூர்
ஊர் /வேறு பெயர்	திருப்பத்தூர்
நாடு	பாண்டிய நாடு
ॐசுவாமி	திருத்தளி நாதர், புதூர் ஈசர்
ॐஅம்பிகை	சிவகாமி அம்மையார்
பாடியவர்கள்	திருஞானசம்பந்தர் (1)         வெங்கள் விம்மு (1 -026) திருநாவுக்கரசர் (1)          புரிந்த அமரர் (6-076)
ஸ்தல மரம்	கொன்றை
தீர்த்தம்	திருத்தளி தீர்த்தம், சிவகங்கை
பண்	திருத்தாண்டகம்
குறிப்புகள்	தற்போது திருப்பத்தூர் என்று அழைக்கப்படுகிறது .  கோவில்- திருத்தளி  ஈசன் கெளரி தாண்டவம் ஆடிய திருத்தலம்  உமாதேவியும், இலக்குமியும் பூசித்த தலம்
பதிக பலன்	துன்பம் இல்லா வாழ்வு அமையும்
வரிசை எண்.	026                                                                6/14

திருச்சிற்றம்பலம்

புரிந்த அமரர் தொழுது ஏத்தும் புகழ் தக்கோன்காண்

போர்விடையின் பாகன்காண் புவனம் ஏழும்

விரிந்துபல உயிராகி விளங்கி னான்காண்

விரைக்கொன்றைக் கண்ணியன்காண் வேத நான்கும்

தெரிந்துமுதல் படைத்தோனைச் சிரம் கொண் டோன் காண்

தீர்த்தன்காண் திருமால் ஓர் பங்கத் தான்காண்

திருந்துவயல் புடைதழுவு திருப்புத் தூரில்

திருத்தளியான் காண் அவன் என்  சிந்தை யானே.  1  

வாராரும் முலைமங்கை பாகத் தான்காண்

மாமறைகள் ஆயவன் காண் மண்ணும் விண்ணும்

கூரார் வெந் தழலவனும்  காற்றும் நீரும்

குலவரையும் ஆயவன்காண் கொடுநஞ்சு உண்ட

காராரும் கண்டன்காண் எண் தோளன்காண்

கயிலைமலைப் பொருப்பன்காண் விருப்போடு என்றும்

தேராரும் நெடுவீதித் திருப்புத் தூரில்

திருத்தளியான் காண் அவன் என் சிந்தை யானே.  2  

மின்காட்டும் கொடிமருங்குல் உமையாள்கு என்றும்

விருப்பு அவன்காண் பொருப்புவலிச் சிலைக் கையோன்காண்

நன்பாட்டுப் புலவனாய்ச் சங்கம் ஏறி

நற் கனகக்கிழி 'தருமி'க்கு அருளினோன் காண்

பொன்காட்டக் கடிக்கொன்றை மருங்கே நின்ற

புனக்காந்தள்கைகாட்டக் கண்டு வண்டு

தென்காட்டுஞ் செழும்புறவின் திருப்புத் தூரில்

திருத்தளியான் காண் அவன் என் சிந்தை யானே.  3  

தேறு மலர்க் கமலத்து அயனும் மாலும்

இந்திரனும் பணிந்து ஏத்த இருக்கின்றான் காண்

தோடேறு மலர்க் கடுக்கை வன்னி மத்தந்

துன்னிய செஞ் சடையான்காண் துகள்தீர் சங்கம்

மாடேறி முத்தீனுங் கானல் வேலி

மறைக்காட்டு மாமணிகாண் வளங்கொள் மேதி

சேடேறி மடுப்படியும் திருப்புத் தூரில்

திருத்தளியான் காண் அவன் என் சிந்தை யானே.  4  

கருமருவு வல்வினைநோய் அகற்றி னான்காண்

காமரு பூங் கச்சி ஏகம்பத்தான் காண்

பெருமருவு பேர் உலகில்  பிணிகள் தீர்க்கும்

பெரும்பற்றத்தண்புலியூர் மன்றாடி காண்

தருமருவு கொடைத்தடக்கை அளகைக் கோன்றன்

சங்காதி ஆரூரில் தனி யானைகாண்

திருமருவு பொழில்புடைசூழ் திருப்புத் தூரில்

திருத்தளியான் காண் அவன் என் சிந்தை யானே. 5  

காம்பாடு தோள் உமையாள் காண நட்டங்

கலந்தாடல் புரிந்தவன்காண் கையில் வெய்ய

பாம்பு ஆடப் படுதலையில் பலிகொள் வோன்காண்

பவளத்தின் பருவரைபோற் படிமத் தான்காண்

தாம்பாடு சினவிடையே பகடாக் கொண்ட

சங்கரன்காண் பொங்கரவக் கச்சை யோன்காண்

சேம்பாடு வயல்புடைசூழ் திருப்புத் தூரில்

திருத்தளியான் காண் அவன் என் சிந்தை யானே.  6  

வெறிவிரவு மலர்க் கொன்றை விளங்கு திங்கள்

வன்னி யொடு விரிசடைமேல் மிலைச்சி னான்காண்

பொறிவிரவு கதநாகம் அக்கி னோடு

பூண்டவன்காண் பொருபுலித்தோல் ஆடை யான்காண்

அறிவரிய நுண்பொருள்கள் ஆயினான் காண்

ஆயிரம்பேர் உடையவன்காண் அந்தண் கானல் 

செறிபொழில்சூழ் மணிமாடத் திருப்புத் தூரில்

திருத்தளியான் காண் அவன் என்  சிந்தை யானே.  7  

புக்கு அடைந்த வேதியற்காய்க் காலற் காய்ந்த

புண்ணியன்காண் வெண்ணகைவெள் வளையா ளஞ்ச

மிக்கு எதிர்ந்த கரிவெருவ உரித்த கோன்காண்

வெண்மதியைக் கலைசேர்த்த திண்மை யோன்காண்

அக்கரும்பு பெரும்புன்னை நெருங்கு சோலை

ஆரூருக்கு அதிபதிகாண் அந்தண் தென்றல்

திக்கணைந்து வருமருங்கில் திருப்புத் தூரில்

திருத்தளியான் காண் அவன் என்   சிந்தை யானே.  8 

 பற்றவன்காண் ஏனோர்க்கும் வானோ ருக்கும்

பராபரன்காண் தக்கன் தன் வேள்வி செற்ற

கொற்றவன்காண் கொடுஞ்சினத்தை அடங்கச் செற்று

ஞானத்தை மேன்மிகுத்தல் கோளாக் கொண்ட

பெற்றியன்காண் பிறங்கருவிக் கழுக் குன்றத்து எம்

பிஞ்ஞகன்காண் பேர் எழிலார் காம வேளைச்

செற்றவன்காண் சீர்மருவு திருப்புத் தூரில்

திருத்தளியான் காண் அவன் என்  சிந்தை யானே.  9  

உரமதித்த சலந்தரன்றன் ஆகங் கீண்ட

ஓர் ஆழி படைத்தவன்காண் உலகு சூழும்

வரமதித்த கதிரவனைப் பற்கொண் டான்காண்

வானவர்கோன் புயம்நெரித்த வல்லா ளன்காண்

அரமதித்துச் செம்பொன்னி னாரம் பூணா

அணிந்தவன்காண் அலைகடல்சூழ் இலங்கை வேந்தன்

சிரம்நெரித்த சேவடிகாண் திருப்புத் தூரில்

திருத்தளியான் காண் அவன் என்  சிந்தை யானே.

திருச்சிற்றம்பலம்