திரு ஆலவாய்

               

௨ 

திருஞானசம்பந்தர்  சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திருஆலவாய்
ஊர்/வேறுபெயர்	மதுரை, கூடல் நகர், கடம்ப வனம், சிவராசதானி
நாடு	பாண்டிய
ॐசுவாமி	சோமசுந்தரக்கடவுள், சொக்கநாதர்
ॐஅம்பிகை	மீனாட்சி, அங்கயர்கன்னி
பாடியவர்கள்	திருஞானசம்பந்தர்(9)         நீலமாமிடற் (1:94)         மந்திரமாவது நீறு (2:66)         மானின் நேர் விழி (3:39)         காட்டுமாவது (3:47)         செய்யனே திருஆலவாய் (3:51)         வீடல் ஆலவாய் (3:52)         வேத வேள்வியை (3:108)         ஆல நீழல் உகந்த (3:115)         மங்கையர்க்கரசி (3:120)          திருநாவுக்கரசர்(2)         வேதியா வேத கீதா(4:62)         முளைத்தானை முன்னே(6:19)
ஸ்தல மரம்	கடம்பு
தீர்த்தம்	பொற்றாமரைக்குளம்
பண்	குறிஞ்சி
குறிப்புகள்	பாணபத்திரர் வாயிலாக சேரமான் பெருமாளுக்கு திருமுகப்பாசுரம்  அளித்த பதி. சமணர்களை வாதம் செய்து, திருஞானசம்பந்தர் சைவத்தை நிலைநாட்டிய திருத்தலம்  பஞ்ச சபைகளுள் ஒன்று. இது வெள்ளி அம்பலம்.   பாண்டிய மன்னனுக்காக கால் மாறி ஆடிய தலம்  பூலோக கைலாசம் என போற்றப் பெறும் தலம்
	பிறவிப்பயனை பெற
வரிசை எண்.	94                                     30/127

திருச்சிற்றம்பலம்

நீல மாமிடற்று, ஆல வாயிலான்
பாலது ஆயினார், ஞாலம் ஆள்வரே.  1  

ஞாலம் ஏழுமாம், ஆல வாயிலார்
சீலமே சொலீர், காலன் வீடவே.  2  

ஆல நீழலார், ஆல வாயிலார்
கால காலனார், பால தாமினே.  3 

அந்தமில் புகழ், எந்தை ஆலவாய்
பந்தி யார்கழல், சிந்தை செய்ம்மினே.  4  

ஆடல் ஏற்றினான், கூடல் ஆலவாய்
பாடியே மனம், நாடி வாழ்மினே.  5  

அண்ணல் ஆலவாய், நண்ணி னான் தனை
எண்ணியே தொழத், திண்ணம் இன்பமே.  6  

அம்பொன் ஆலவாய், நம்பனார் கழல்
நம்பி வாழ்பவர், துன்பம் வீடுமே.  7  

அரக்கனார்வலி, நெருக்கன் ஆலவாய்
உரைக்கும் உள்ளத்தார்க்கு, இரக்கம் உண்மையே. 8  

அருவன் ஆலவாய், மருவினான் தனை
இருவர் ஏத்த நின்று உருவம் ஓங்குமே.  9  

ஆரம் நாகமாம், சீரன் ஆலவாய்த்
தேர்  அமண் செற்ற, வீரன் என்பரே.  10  

அடிகள் ஆலவாய்ப், படிகொள் சம்பந்தன்
முடிவில் இன் தமிழ், செடிகள் நீக்குமே.

திருச்சிற்றம்பலம்