திரு ஆலங்காடு

                          

௨ 

திருஞானசம்பதர் சுவாமிகள் அருளிச்செய்த
முதலாம்   திருமுறை

தகவல் பலகை	விவரம்
தலம்	திரு ஆலங்காடு
ஊர்
நாடு	தொண்டை நாடு
ॐசுவாமி	வட ஆரண்யேச்வரர் , ஆலங்காடு அப்பர்
ॐஅம்பிகை	வண்டார் குழலி
பாடியவர்கள்	திரு ஞானசம்பந்தர்  (1)         துஞ்ச வருவாரும். (1-45) சுந்தரர்  (1)        முத்தா முத்தி தரவல்ல (7-52)
ஸ்தல மரம்	பலா
தீர்த்தம்	முத்தி தீர்த்தம்
பண்	தக்க ராகம்
குறிப்புகள்	பஞ்ச சபையில் ஒன்று  இரத்தினசபை  ஊர்த்துவ தாண்டவம்  காரைக்கால் அம்மையார் தலையால் நடந்து நடராச பெருமானை தரிசனம் செய்தார்
பதிக பலன்	பாவங்கள் தாமே தீரும்.
வரிசை எண்.	45                                                         15/32

திருச்சிற்றம்பலம்

          

துஞ்ச வருவாரும் தொழுவிப் 

        பாரும் வழுவிப்போய்

நெஞ்சம் புகுந்து என்னை 

        நினைவிப் பாரும் முனைநட்பாய்

வஞ்சப் படுத்த ஒருத்தி 

        வாணாள் கொள்ளும் வகைகேட்டு

அஞ்சும் பழையனூர் 

        ஆலங்காட்டு எம் அடிகளே.  1  

கேடும் பிறவியும் 

        ஆக்கி னாரும் கேடிலா

வீடு மாநெறி விளம்பினார் 

        எம் விகிர்தனார்

காடும் சுடலையும் கைக்கொண்டு 

        எல்லிக் கணப்பேயோடு 

ஆடும் பழையனூர் 

        ஆலங்காட்டு எம் அடிகளே.  2  

கந்தங் கமழ்க் கொன்றைக் 

        கண்ணி சூடி கனலாடி

வெந்த பொடிநீற்றை 

        விளங்கப் பூசும் விகிர்தனார்

கொந்தண் பொழிற்சோலை 

        அரவில் தோன்றிக் கோடல்பூத்து 

அந்தண் பழையனூர் 

        ஆலங்காட்டு எம் அடிகளே..  3  

பால மதிசென்னி 

        படரச் சூடிப் பழியோராக்

காலன் உயிர் செற்ற 

        காலனாய கருத்தனார்

கோலம் பொழிற்சோலைப் 

        பெடையோடு ஆடி மடமஞ்ஞை

ஆலும் பழையனூர் 

        ஆலங்காட்டு எம் அடிகளே.  4  

ஈர்க்கும் புனல்சூடி 

        இளவெண் திங்கள் முதிரவே

பார்க்கும் அரவம் பூண்டு 

        ஆடி வேடம் பயின்றாரும்

கார்க்கொள் கொடிமுல்லை 

        குருந்தம் ஏறிக் கருந்தேன்மொய்த்து 

ஆர்க்கும் பழையனூர் 

        ஆலங்காட்டு எம் அடிகளே.  5  

பறையும் சிறுகுழலும் 

        யாழும் பூதம் பயிற்றவே

மறையும் பலபாடி 

        மயானத்து உறையும் மைந்தனார்

பிறையும் பெரும் புனல்சேர் 

        சடையினாரும் பேடைவண்டு 

அறையும் பழையனூர்         

        ஆலங்காட்டு எம் அடிகளே.  6  

நுணங்கு மறைபாடி 

        ஆடி வேடம் பயின்றாரும்

இணங்கு மலைமகளோடு 

        இரு கூறு ஒன்றாய் இசைந்தாரும்

வணங்கும் சிறுத்தொண்டர் 

        வைகல் ஏத்தும் வாழ்த்தும் கேட்டு 

அணங்கும் பழையனூர் 

        ஆலங்காட்டு எம் அடிகளே.  7  

கணையும் வரிசிலையும் 

        எரியும் கூடிக் கவர்ந்து உண்ண

இணையில் எயில் மூன்றும் 

        எரித்திட்டார் எம் இறைவனார்

பிணையும் சிறுமறியும் 

        கலையும் எல்லாம் கங்குல்சேர்ந்து 

அணையும் பழையனூர் 

        ஆலங்காட்டு எம் அடிகளே.  8  

கவிழ மலைதரளக் கடகக் 

        கையால் எடுத்தான்தோள்

பவழ நுனைவிரலால் 

        பைய ஊன்றிப் பரிந்தாரும்

தவழும் கொடிமுல்லை 

        புறவம் சேர நறவம்பூத்து 

அவிழும் பழையனூர் 

        ஆலங்காட்டு எம் அடிகளே.. 9  

பகலும் இரவும் சேர் 

        பண்பினாரும் நண்பு ஓராது

இகலும் இருவர்க்கும் 

        எரியாய்த் தோன்றி நிமிர்ந்தாரும்

புகலும் வழிபாடு 

        வல்லார்க்கு என்றும் தீயபோய்

அகலும் பழையனூர் 

        ஆலங்காட்டு எம் அடிகளே.  10  

போழம் பலபேசிப் 

        போதுசாற்றித் திரிவாரும்

வேழம் வருமளவும் 

        வெயிலே துற்றித் திரிவாரும்

கேழல் வினைபோகக் 

        கேட்பிப் பாரும் கேடிலா

ஆழ்வர் பழையனூர் 

        ஆலங்காட்டு எம் அடிகளே.  11  

சாந்தம் கமழ்மறுகிற் 

        சண்பை ஞான சம்பந்தன்

ஆந்தண் பழையனூர் 

        ஆலங் காட்டு எம் அடிகளை

வேந்தன் அருளாலே 

        விரித்த பாடல் இவைவல்லார்

சேர்ந்த இடமெல்லாம் 

        தீர்த்த மாகச் சேர்வாரே.

திருச்சிற்றம்பலம்