திரு கானூர்

 

௨ 

திருஞானசம்பந்தர்சுவாமிகள்   அருளிச்செய்த
முதலாம்  திருமுறை 

தகவல் பலகை	விவரம்
தலம்	திரு கானூர்
பிற பெயர்கள்	மணல்மேடு
நாடு	சோழ நாடு (வ)
ॐசுவாமி	செம்மேனி நாதர்
ॐஅம்பிகை	சிவலோக நாயகி
பாடியவர்கள்	சம்பந்தர் (1)         வானார் சோதி (1-73) அப்பர் (1)         திருவின் நாதனும் (5-76)
ஸ்தல மரம்	கொன்றை
தீர்த்தம்	கொள்ளிடம்,
பண்	தக்கேசி
குறிப்புகள்	சுவாமி தீ வண்ணராக காட்சி அளித்த தலம்  நாயகன் நாயகி பாவனையில் அமைந்த திருப்பதிகம்
பதிக பலன்	துன்பம் விலகும்.
வரிசை எண்.	73                                                      56/63

திருச்சிற்றம்பலம்          

வானார்சோதி மன்னுசென்னி 
         வன்னி புனங்கொன்றைத்
தேனார்போது தானார் கங்கை 
         திங்களொடுசூடி
மானேர்நோக்கி கண்டு அங்கு உவப்ப 
         மாலை ஆடுவார்
கானூர்மேய கண்ணார்நெற்றி 
         ஆன்ஊர் செல்வரே.  1  

நீந்தலாகா வெள்ளமூழ்கு 
          நீள்சடை தன்மேலோர்
ஏய்ந்தகோணல் பிறையோ அரவு 
          கொன்றை எழிலாரப்
போந்தமென்சொல் இன்பம்பயந்த 
          மைந்தர் அவர் போலாம்
காந்தள்விம்மு கானூர்மேய 
          சாந்த நீற்றாரே.  2  

சிறையார் வண்டும் தேனும் விம்மு 
          செய்ய மலர்க்கொன்றை
மறையார்பாடல் ஆடலோடு 
          மால்விடை மேல்வருவார்
இறையார் வந்து என் இல்புகுந்து என் 
          எழில் நலமும் கொண்டார்
கறையார்சோலைக் கானூர்மேய 
          பிறையார் சடையாரே.  3  

விண்ணார்திங்கட் கண்ணிவெள்ளை 
          மாலை அது சூடித்
தண்ணார் அக்கோடு ஆமை பூண்டு 
          தழைபுன் சடைதாழ
எண்ணா வந்து என் இல் புகுந்து அங்கு 
          எவ்வ நோய்செய்தான்
கண்ணார்சோலைக் கானூர்மேய 
          விண்ணோர் பெருமானே.  4  

தார் கொள் கொன்றைக் 
          கண்ணியோடும் தண்மதியம் சூடி
சீர்கொள்பாடல் ஆடலோடு 
          சேடராய் வந்து
ஊர்கள் தோறும் ஐயம் ஏற்று என்னுள் 
          வெந் நோய்செய்தார்
கார் கொள் சோலைக் கானூர்மேய 
          கறைக்கண் டத்தாரே.  5  

முளிவெள் எலும்பு நீறு நூலு
          மூழ்கு மார்பராய்
எளிவந்தார்போல் ஐயம் என்று என் 
          இல்லே புகுந்து உள்ளத்
தெளிவு நாணும் கொண்ட கள்வர் 
          தேறல் ஆர்பூவில்
களி வண்டு யாழ் செய் கானூர் மேய 
          ஒளிவெண் பிறையாரே.  6  

மூவா வண்ணர் முளைவெண்பிறையர் 
          முறுவல் செய்து இங்கே
பூவார்கொன்றை புனைந்துவந்தார் 
          பொக்கம் பலபேசிப்
போவார்போல மால்செய்து உள்ளம் 
          புக்க புரிநூலர்
தேவார்சோலைக் கானூர்மேய 
          தேவ தேவரே.  7  

தமிழின்நீர்மை பேசித்தாளம் 
          வீணை பண்ணிநல்ல
முழவமொந்தை மல்குபாடல் 
          செய்கை இடம் ஓவார்
குமிழின்மேனி தந்துகோல 
          நீர்மை அது கொண்டார்
கமழும் சோலைக் கானூர்மேய 
          பவள வண்ணரே.  8  

அந்தம் ஆதி அயனும்மாலும் 
          ஆர்க்கும் அறிவு அரியான்
சிந்தை உள்ளும் நாவின் மேலும் 
          சென்னியு மன்னினான்
வந்து என் உள்ளம் புகுந்துமாலை 
          காலை ஆடுவான்
கந்த மல்கு கானூர்மேய 
          எந்தை பெம்மானே.  9  

ஆமை அரவோடு ஏன வெண் கொம்பு 
          அக்கு மாலை பூண்டு
ஆமோர் கள்வர் வெள்ளர் போல 
          உள்வெந் நோய்செய்தார்
ஓம வேத நான்முகனும் 
          கோண் நாகணையானும்
சேமமாய செல்வர்கானூர் 
          மேய சேடரே.  10  

கழுதுதுஞ்சும்  கங்குல் ஆடும் 
          கானூர் மேயானைப்
பழுதில்ஞான சம்பந்தன்சொல் 
          பத்தும் பாடியே
தொழுதுபொழுது தோத்திரங்கள் 
          சொல்லித் துதித்துநின்று 
அழுது நக்கும் அன்புசெய்வார் 
          அல்லல் அறுப்பாரே.

திருச்சிற்றம்பலம்