திரு ஆலங்காடு

                           

௨ 

சுந்தரமூர்த்தி சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திரு ஆலங்காடு
ஊர்
நாடு	தொண்டை நாடு
ॐசுவாமி	வட ஆரண்யேச்வரர் , ஆலங்காடு அப்பர்
ॐஅம்பிகை	வண்டார் குழலி
பாடியவர்கள்	திருஞானசம்பந்தர் (1)         துஞ்ச வருவாரும். (1-45) சுந்தரர்  (1)        முத்தா முத்தி தரவல்ல (7-52)
ஸ்தல மரம்	பலா
தீர்த்தம்	முத்தி தீர்த்தம்
பண்	தக்க ராகம்
குறிப்புகள்	பஞ்ச சபையில் ஒன்று  இரத்தினசபை  ஊர்த்துவ தாண்டவம்  காரைக்கால் அம்மையார் தலையால் நடந்து நடராச பெருமானை தரிசனம் செய்தார்
பதிக பலன்	சிவ பெருமானை வணங்கி வாழ்வர்
வரிசை எண்.	52                                                         15/32

திருச்சிற்றம்பலம்

          

முத்தா முத்தி தரவல்ல

          முகிழ்மென் முலையாள் உமைபங்கா

சித்தா சித்தித் திறங்காட்டும்

          சிவனே தேவர் சிங்கமே

பத்தா பத்தர் பலர்போற்றும்

          பரமா பழைய னூர்மேய

அத்தா ஆலங் காடா உன்

          அடியார்க்கு அடியேன் ஆவேனே.  1  

பொய்யே செய்து புறம்புறமே

          திரிவேன் தன்னைப் போகாமே

மெய்யே வந்து இங்கு எனை ஆண்ட

          மெய்யா மெய்யர் மெய்ப்பொருளே

பையாடு அரவம் அரைக்கு அசைத்த

          பரமா பழைய னூர்மேய

ஐயா ஆலங் காடா உன்

          அடியார்க்கு அடியேன் ஆவேனே.  2  

தூண்டா விளக்கின் நற்சோதீ

          தொழுவார் தங்கள் துயர்தீர்ப்பாய்

பூண்டாய் எலும்பைப் புரமூன்றும்

          பொடியாச் செற்ற புண்ணியனே

பாண் தாழ் வினைகள் அவைதீர்க்கும்

          பரமா பழைய னூர்மேய

ஆண்டா ஆலங் காடா உன்

          அடியார்க்கு அடியேன் ஆவேனே.  3  

மறிநேர் ஒண்கண் மடநல்லார்

          வலையில் பட்டு மதிமயங்கி

அறிவே அழிந்தேன் ஐயா! நான்

          மையார் கண்டம் உடையானே

பறியா வினைகள் அவைதீர்க்கும்

          பரமா பழைய னூர்மேய

அறிவே ஆலங் காடா உன்

          அடியார்க்கு அடியேன் ஆவேனே.  4  

வேலங் காடு தடம் கண்ணார்

          வலையுட் பட்டு உன் நெறிமறந்து

மாலங் காடி மறந்து ஒழிந்தேன்

          மணியே முத்தே மரகதமே

பாலங் காடி நெய்யாடி

          படர்புன் சடையாய் பழையனூர்

ஆலங் காடா உன்னுடைய

          அடியார்க்கு அடியேன் ஆவேனே.  5  

எண்ணார் தங்கள் எயில் எய்த

          எந்தாய் எந்தை பெருமானே

கண்ணாய் உலகம் காக்கின்ற

          கருத்தா திருத்த லாகாதாய்

பண்ணார் இசைகள் அவைகொண்டு

          பலரும் ஏத்தும் பழையனூர்

அண்ணா ஆலங் காடா உன்

          அடியார்க்கு அடியேன் ஆவேனே.  6  

வண்டார் குழலி உமைநங்கை

          பங்கா கங்கை மணவாளா

விண்டார் புரங்கள் எரிசெய்த

          விடையாய் வேத நெறியானே

பண்டாழ் வினைகள் பலதீர்க்கும்

          பரமா பழையனூர் மேய

அண்டா ஆலங் காடா உன்

          அடியார்க்கு அடியேன் ஆவேனே.  7  

பேழ்வாய் அரவின் அணையானும்

          பெரிய மலர் மேல் உறைவானும்

தாழாது உன்தன் சரண்பணியத்

          தழலாய் நின்ற தத்துவனே

பாழாம் வினைகள் அவைதீர்க்கும்

          பரமா பழையனூர் தன்னை

ஆள்வாய் ஆலங் காடா உன்

          அடியார்க்கு அடியேன் ஆவேனே.  8 

 எம்மான் எந்தை மூத்தப்பன்

          ஏழு ஏழ் படிகால் எமை ஆண்ட

பெம்மான் ஈமப் புறங்காட்டில்

          பேயோடு ஆடல் புரிவானே

பன்மா மலர்கள் அவைகொண்டு

          பலரும் ஏத்தும் பழையனூர்

அம்மா ஆலங் காடா உன்

          அடியார்க்கு அடியேன் ஆவேனே.  9  

பத்தர் சித்தர் பலர் ஏத்தும்

          பரமன் பழையனூர்மேய

அத்தன் ஆலங் காட உன்தன்

          அடிமைத் திறமே அன்பாகிச்

சித்தர் சித்தம் வைத்தபுகழ்ச்

          சிறுவன் ஊரன் ஒண் தமிழ்கள்

பத்தும் பாடி ஆடுவார்

          பரமன் அடியே பணிவாரே.

திருச்சிற்றம்பலம்