திரு அச்சிறு பாக்கம்

              

௨ 

திருஞானசம்பந்தர் சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திரு அச்சிறுபாக்கம்
ஊர்	அச்சரபாக்கம்
நாடு	தொண்டை நாடு
ॐசுவாமி	பார்க்கபுரீச்வரர்
ॐஅம்பிகை	இளங்கிளி அம்மை
பாடியவர்கள்	திருஞானசம்பந்தர் (1)          பொன்திரண்டன்ன (1-77)
ஸ்தல மரம்	சரக்கொன்றை
தீர்த்தம்	சிம்ம தீர்த்தம்.
பண்	குறிஞ்சி
குறிப்புகள்	கௌதமர், கன்வர் பூசித்தி பேறு பெற்ற தலம்  அச்சு இற்ற இடம்  என்று சொல்லுவார்கள்  பாண்டிய மன்னனால் கட்டப்பட்ட திருக்கோயில்
பதிக பலன்	வினை நீக்கம் பெறுவர்
வரிசை எண்.	77                                                          29/32

திருச்சிற்றம்பலம்

            

பொன் திரண் டன்ன புரிசடை புரளப்
        பொருகடற் பவளமொடு அழல்நிறம் புரையக்
குன்று இரண்டன்ன தோளுடை அகலம்
        குலாயவெண் நூலொடு கொழும்பொடி அணிவர்
மின்திரண் டன்ன நுண்ணிடை அரிவை 
        மெல்லிய லாளை ஓர் பாகமாப் பேணி
அன்று இரண்டு உருவம் ஆயஎம் அடிகள்
        அச்சிறுபாக்கம் அது ஆட்சிகொண் டாரே.  1  

தேனினும் இனியர் பாலன நீற்றர்
        தீங்கரும்பு அனையர் தம் திருவடி தொழுவார்
ஊன்நயந்து உருக உவகைகள் தருவார்
        உச்சிமேல் உறைபவர் ஒன்றலாது ஊரார்
வானகம் இறந்து வையகம் வணங்க
        வயங்கொள நிற்பதோர் வடிவினை உடையார்
ஆனையின் உரிவை போர்த்தஎம் அடிகள்
        அச்சிறுபாக்கம் அது ஆட்சிகொண் டாரே.  2  

கார் இருள் உருவம் மால்வரை புரையக்
        களிற்றின் அது உரிவை கொண்டு அரிவைமேல் ஓடி
நீருரு மகளை நிமிர்சடைத் தாங்கி
        நீறு அணிந்து ஏறு உகந்து ஏறிய நிமலர்
பேரரு ளாளர் பிறவியிற் சேரார் 
        பிணியிலர் கேடிலர் பேய்க்கணம் சூழ
ஆர் இருள் மாலை ஆடும்எம் அடிகள்
        அச்சிறுபாக்கம் அது ஆட்சிகொண் டாரே.  3  

மைம்மலர்க் கோதை மார்பினர் எனவும் 
        மலைமகள் அவளொடு மருவினர் எனவும்
செம்மலர்ப் பிறையும்  சிறை அணி புனலும்  
        சென்னிமேல் உடையர் எம் சென்னிமேல் உறைவார்
தம்மலர் அடி ஒன்று அடியவர் பரவத் 
        தமிழ்ச்சொலும் வடசொலும் தாள்நிழற் சேர
அம்மலர்க் கொன்றை அணிந்தஎம் அடிகள்
        அச்சிறுபாக்கம் அது ஆட்சிகொண் டாரே.  4  

விண்ணுலா மதியம் சூடினர் எனவும்
        விரிசடை உள்ளது வெள்ள நீர் எனவும்
பண்ணுலாம் மறைகள் பாடினர் எனவும்
        பலபுக ழல் அல்லது பழியிலர் எனவும்
எண் அலாகாத இமையவர் நாளும் 
        ஏத்தர வங்களோடு எழில்பெற நின்ற
அண்ணலான் ஊர்தி ஏறும்எம் அடிகள்
        அச்சிறுபாக்கம் அது ஆட்சிகொண் டாரே.  5  

நீடு இரும் சடைமேல் இளம்பிறை துளங்க
        நிழல்திகழ் மழுவொடு நீறுமெய் பூசித்
தோடு ஒரு காதினில் பெய்துவெய் தாய
        சுடலையில் ஆடுவர் தோல் உடை யாகக்
காடு அரங் காகக் கங்குலும் பகலும்
        கழுதொடு பாரிடம் கைதொழுது ஏத்த
ஆடு அரவு ஆட ஆடும்எம் அடிகள்
        அச்சிறுபாக்கம் அது ஆட்சிகொண் டாரே.  6  

ஏறும் ஒன்று ஏறி நீறு மெய் பூசி
        இளங்கிளை அரிவையொடு ஒருங்கு உடனாகிக்
கூறும் ஒன்று அருளிக் கொன்றையந் தாரும்
        குளிர் இள மதியமும் கூவிள மலரும்
நாறு மல்லிகையும் எருக்கொடு முருக்கும் 
        மகிழ் இள வன்னியும் இவைநலம் பகர
ஆறும் ஓர் சடைமேல் அணிந்தஎம் அடிகள்
        அச்சிறுபாக்கம் அது ஆட்சிகொண் டாரே.  7  

கச்சும்ஒள் வாளும்  கட்டிய உடையர்
        கதிர்முடி சுடர்விடக் கவரியும் குடையும்
பிச்சமும் பிறவும் பெண்அணங் காய
        பிறைநுதல் அவர்தமைப் பெரியவர் பேணப்
பச்சமும் வலியும் கருதிய அரக்கன்
        பருவரை எடுத்த திண் தோள்களை அடர்வித்து 
அச்சமும் அருளும் கொடுத்தஎம் அடிகள்
        அச்சிறுபாக்கம் அது ஆட்சிகொண் டாரே.  8  

நோற்றலா ரேனும் வேட்டலா ரேனும்
        நுகர்புகர் சாந்தமொடு ஏந்திய மாலைக்
கூற்றலா ரேனும் இன்னவாறு என்றும் 
        எய்தல் ஆகாதது ஓர் இயல்பினை உடையார்
தோற்றலார் மாலும் நான்முகம் உடைய 
        தோன்றலும் அடியொடு முடியுறத் தங்கள்
ஆற்றலாற் காணார் ஆயஎம் அடிகள்
        அச்சிறுபாக்கம் அது ஆட்சிகொண் டாரே.  9  

வாதுசெய் சமணும் சாக்கியப் பேய்கள்
        நல்வினை நீக்கிய வல்வினை யாளர்
ஓதியும் கேட்டும் உணர்வினை இலாதார் 
        உள் அலாகாத ஓர் இயல்பினை உடையார்
வேதமும் வேத நெறிகளும் ஆகி
        விமலவே டத்தொடு கமல மாமதிபோல்
ஆதியும் ஈறும் ஆயஎம் அடிகள்
        அச்சிறுபாக்கம் அது ஆட்சிகொண் டாரே..  10  

மைச்செறி குவளை தவளைவாய் நிறைய
        மதுமலர்ப் பொய்கையில் புதுமலர் கிழியப்
பச்சு இறவு எறிவயல் வெறிகமழ் காழிப்
        பதியவர் அதிபதி கவுணியர் பெருமான்
கைச்சிறு மறியவன் கழல் அலாற் பேணாக்
        கருத்துடை ஞானசம் பந்தன தமிழ்கொண்டு 
அச்சிறு பாக்கத்து அடிகளை ஏத்தும்
        அன்புடை அடியவர் அருவினை இலரே.

திருச்சிற்றம்பலம்