திரு மால்பேறு

                                

௨ 

திருநாவுகரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திரு மால்பேறு
ஊர்	திருமால்பூர்
நாடு	தொண்டை நாடு
ॐசுவாமி	மனிகண்டேஸ்வரர்
ॐஅம்பிகை	அஞ்சனாட்சி அம்மை, கருணை நாயகி
பாடியவர்கள்	ஞானசம்பந்தர்  (2)         ஊரியார் தரு (1-55)         குருந்தவன் குரு (1-114) அப்பர் (4)         மானிக்கு உயிர் (4-108)         பொருமாற் (5-59)         ஏதும் ஒன்று (5-60)         பாரானைப் பாரினது (6-80)
ஸ்தல மரம்	வில்வம்
தீர்த்தம்	சக்கர தீர்த்தம், பாலாறு
பண்	திருத்தாண்டகம்
குறிப்புகள்	திருமால் ஈசனை வழிபட்டு சக்கராயுதம் பெற்ற தலம்  சந்திரன் வழிபட்டது.
பதிக பலன்	அச்சம் விலகும்
வரிசை எண்.	80                                                        11/32

திருச்சிற்றம்பலம்          

பாரானைப் பாரினது பயனா னானைப்

படைப்பாகிப் பல்லுயிர்க்கும் பரிவோன் தன்னை

ஆராத இன்னமுதை அடியார் தங்கட்கு 

அனைத்து உலகும் ஆனானை அமரர் கோனைக்

காராருங் கண்டனைக் கயிலை வேந்தைக்

கருதுவார் மனத்தானைக் காலற் செற்ற

சீரானைச் செல்வனைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  1  

விளைக்கின்ற நீராகி வித்து மாகி

விண்ணோடு மண்ணாகி விளங்கு செம்பொன்

துளைக்கின்ற துளையாகிச் சோதி யாகித்

தூண்டரிய சுடராகித் துளக்கில் வான்மேல்

முளைக்கின்ற கதிர்மதியும் அரவும் ஒன்றி

முழங்கொலிநீர்க் கங்கையொடு மூவா து என்றும்

திளைக்கின்ற சடையானைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  2  

மலைமகள் தம் கோன் அவனை மாநீர் முத்தை

மரகதத்தை மாமணியை மல்கு செல்வக்

கலைநிலவு கையானைக் கம்பன் தன்னைக்

காண்பினிய செழுஞ்சுடரைக் கனகக் குன்றை

விலைபெரிய வெண் நீற்று மேனி யானை

மெய்யடியார் வேண்டுவதே வேண்டு வானைச்

சிலைநிலவு கரத்தானைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  3  

உற்றானை உடல்தனக்கோர் உயிர் ஆனானை

ஓங்காரத்து ஒருவனையம் உமை ஓர் பாகம்

பெற்றானைப் பிஞ்ஞகனைப் பிறவா தானைப்

பெரியனவும் அரியனவும் எல்லாம் முன்னே

கற்றானைக் கற்பனவும்  தானே ஆய

கச்சி ஏகம்பனைக் காலன் வீழச்

செற்றானைத் திகழ் ஒளியைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  4  

நீறாகி நீறுமிழும் நெருப்பு மாகி

நினைவாகி நினைவு இனிய மலையான் மங்கை

கூறாகிக் கூற்றாகிக் கோளு மாகிக்

குணமாகிக் குறையாத உவகைக் கண்ணீர்

ஆறாத ஆனந்தத்து அடியார் செய்த

அனாசாரம் பொறுத்து அருளி அவர் மேல் என்றும்

சீறாத பெருமானைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  5  

மருவினிய மறைப்பொருளை மறைக்காட் டானை

மறப்பிலியை மதியேந்து சடையான் தன்னை

உருநிலவும் ஒண்சுடரை உம்ப ரானை

உரைப்பினிய தவத்தானை உலகின் வித்தைக்

கருநிலவு கண்டனைக் காளத் தியைக்

கருதுவார் மனத்தானைக் கல்வி தன்னைச்

செருநிலவு படையானைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  6  

பிறப்பானைப் பிறவாத பெருமை யானைப்

பெரியானை அரியானைப் பெண்ணாணாய

நிறத்தானை நின்மலனை நினையா தாரை

நினையானை நினைவோரை நினைவோன் தன்னை

அறத்தானை அறவோனை ஐயன் தன்னை

அண்ணல்தனை நண்ணரிய அமரர் ஏத்தும்

திறத்தானைத் திகழ் ஒளியைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  7  

வானகத்தில் வளர்முகிலை மதியம் தன்னை

வணங்குவார் மனத்தானை வடிவார் பொன்னை

ஊனகத்தில் உறுதுணையை உலவா தானை

ஒற்றியூர் உத்தமனை ஊழிக் கன்றைக்

கானகத்துக் கருங்களிற்றைக் காளத் தியைக்

கருதுவார் கருத்தானைக் கருவை மூலத்

தேனகத்தில் இன்சுவையைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.  8  

முற்றாத முழுமுதலை முளையை மொட்டை

முழுமலரின் மூர்த்தியை முனியாது என்றும்

பற்றாகிப் பல்லுயிர்க்கும் பரிவோன் தன்னைப்

பராபரனைப் பரஞ்சுடரைப் பரிவோர் நெஞ்சில்

உற்றானை உயர்கருப்புச் சிலையோன் நீறாய்

ஒள்ளழல்வாய் வேவவுறு நோக்கத் தானைச்

செற்றானைத் திரிபுரங்கள் திருமாற் பேற்று எம் 

செம்பவளக் குன்றினைச்சென்று அடைந்தேன் நானே.  9  

விரித்தானை நான்மறையோடு அங்க மாறும்

வெற்பு எடுத்த இராவணனை விரலால் ஊன்றி

நெரித்தானை நின்மலனை அம்மான் தன்னை

நிலாநிலவு செஞ்சடைமேல் நிறைநீர்க் கங்கை

தரித்தானைச் சங்கரனைச் சம்பு தன்னைத்

தரியலர்கள் புரமூன்றும்  தழல்வாய் வேவச்

சிரித்தானைத் திகழ் ஒளியைத் திருமாற் பேற்று எம்

செம்பவளக் குன்றினைச்சென்று அடைந்தேன் நானே.

திருச்சிற்றம்பலம்