திரு பைஞ்ஞீலி

   

௨ 

(நம்பி ஆரூரர்)சுந்தர மூர்த்தி  சுவாமிகள்   அருளிச்செய்த
ஏழாம் திருமுறை 

தகவல் பலகை	விவரம்
தலம்	திரு பைஞ்ஞீலி
பிற பெயர்கள்	கதலி வனம், ஞீலி வனம், அரம்பை வனம், விமாலரண்யம், தரலகிரி, சுதகிரி, வ்யாக்கிரபுரி,  மேலை சிதம்பரம்,
நாடு	சோழ நாடு (வ)
ॐசுவாமி	ஞீலிவனநாதர், வாழைவள நாதர் , நீலகண்டேஸ்வரர், ஆரண்ய விடங்கர்
ॐஅம்பிகை	விசாலாட்சி
பாடியவர்கள்	சம்பந்தர் (1)         ஆரிடம் பாடிலர் (3-14) அப்பர் (1)         உடையார் கோவணம் (5-41) சுந்தர்ர் (1)         காருலாவிய நஞ்சை (7-36)
ஸ்தல மரம்	வாழை
தீர்த்தம்	அப்பர் தீர்த்தம்
பண்	கொல்லி
குறிப்புகள்	திருநாவுகரசருக்கு பொதி சோறு அளித்து பசியை போக்கிய தலம்  வசிட்டருக்கு நடகாட்சி அருளிய தலம்  எமனுக்கு தனி சன்னதி உள்ள திருத்தலம். எமனுக்கு உயிர் கொடுத்த திருத்தலம்.  நவகிரகங்களுக்கு தனி சந்நிதி இல்லை.  இது பரிகார ஸ்தலமாக போற்றப் படுகிறது  ஆயுள் விருத்தி, வழக்கு வெற்றி முதலியவற்றிக்கு வழிபாடு செய்து பலன் பெறலாம்.  மாதர்கள் மயக்கம் அடைந்து வினவிய கூற்றாக அமைந்த பதிகம்
பதிக பலன்	திருவடி பேறு கிட்டும்.
வரிசை எண்.	36                                                      61/63

திருச்சிற்றம்பலம்        

  

கார் உலாவிய நஞ்சை உண்டு இருள்
          கண்டர் வெண் தலையோடு கொண்டு 
ஊர் எலாம் திரிந்து என் செய்வீர்பலி
          ஓரிடத்திலே கொள்ளும்நீர்
பார் எலாம் பணிந்து உம்மையே 
          பரவிப்பணியும் பைஞ்ஞீலியீர்
ஆரம் ஆவது நாகமோ சொல்லும்
          ஆரணீய விடங்கரே.  1  

சிலைத்து நோக்கும் வெள்ளேறு செந்தழல்
          வாயபாம்பது 'மூசு' எனும்
பலிக்கு நீர்வரும் போதுநுங்கையில்
          பாம்பு வேண்டா பிரானிரே
மலைத்த சந்தொடு வேங்கை கோங்கமும்
          மன்னு கார் அகில் சண்பகம்
அலைக்கும் பைம்புனல் சூழ் பைஞ்ஞீலியில்
          ஆரணீய விடங்கரே.  2  

தூயவர்கண்ணும் வாயும்மேனியும்
          துன்னஆடை சுடலையிற்
பேயோடு ஆடலைத் தவிரும் நீர் ஒரு
          பித்தரோ எம் பிரானிரே
பாயும் நீர்க்கிடங் கார்கமலமும்
          பைந்தண்மாதவி புன்னையும்
ஆயபைம்பொழில் சூழ்பைஞ்ஞீலியில்
          ஆரணீய விடங்கரே.  3  

செந்தமிழ்த்திறம் வல்லிரோ செங்கண்
          அரவம் உன்கையில் ஆடவே
வந்துநிற்கும் இது என்கொலோ 
          பலி மாற்றமாட்டோம் இடகிலோம்
பைந்தண் மாமலர் உந்துசோலைகள்
          கந்தம் நாறும் பைஞ்ஞீலியீர்
அந்திவானமும் மேனியோ சொல்லும்
          ஆரணீய விடங்கரே.  4  

நீறு நும் திருமேனி நித்திலம்
          நீ நெடுங்கண்ணி னாளொடும்
கூறராய்வந்து நிற்றிரால் கொணர்ந்து 
          இடுகிலோம் பலி நடமினோ
பாறுவெண் தலை கையில் ஏந்தி 
          பைஞ்ஞீலியே என்றீர் அடிகள்நீர்
ஆறுதாங்கிய சடையரோசொல்லும்
          ஆரணீய விடங்கரே.  5  

குரவம்நாறிய குழலினார்வளை
          கொள்வதேதொழிலாகி நீர்
இரவும் இம்மனை அறிதிரே இங்கே
          நடந்து போகவும் வல்லிரே
பரவி நாடொறும் பாடுவார்வினை
          பற்று அறுக்கும் பைஞ்ஞீலியீர்
அரவம் ஆட்டவும் வல்லிரோசொல்லும்
          ஆரணீய விடங்கரே.  6  

ஏடுலாமலர்க் கொன்றை சூடுதிர்
          என்பெலாம் அணிந்து என்செய்வீர்
காடு நும்பதி ஓடுகையது
          காதல்செய்பவர் பெறுவது என்
பாடல் வண்டு இசையாலும் சோலைப்
          பைஞ்ஞீலியேன் என்று நிற்றிரால்
ஆடல்பாடலும் வல்லிரோ சொல்லும்
          ஆரணீய விடங்கரே.  7  

மத்தமாமலர் கொன்றை வன்னியும்
          கங்கையாளொடு திங்களும்
மொய்த்த வெண்தலை கொக்கிறகொடு
          வெள்ளெருக்கமும் சடையதாம்
பத்தர்சித்தர்கள் பாடி ஆடும் 
          பைஞ்ஞீலியேன்என்று நிற்றிரால்
அத்தி ஈர் உரி போர்த்திரோ சொல்லும்
          ஆரணீய விடங்கரே.  8  

தக்கை தண்ணுமை தாளம்வீணை
          தகுணிச்சங்கிணை சல்லரி
கொக்கரை குட முழவினோடு இசை
          கூடிப்பாடி நின்று ஆடுவீர்
பக்கமே குயில் பாடும் சோலைப்
          பைஞ்ஞீலியே என நிற்றிரால்
அக்கும் ஆமையும் பூண்டிரோசொல்லும்
          ஆரணீய விடங்கரே.  9  

கையோர் பாம்பு அரை ஆர்த்தோர் பாம்பு
          கழுத்து ஓர் பாம்பு அவை பின்புதாழ்
மெய்யெலாம் பொடிக் கொண்டு பூசுதிர்
          வேதம் ஒதுதிர் கீதமும்
பையவே விடங்காக நின்று
          பைஞ்ஞீலியேன் என்றீர் அடிகள்நீர்
ஐயம்ஏற்கும் இது  என்கொலோ சொல்லும்
          ஆரணீய விடங்கரே.  10  

அன்னம் சேர்வயல் சூழ்பைஞ்ஞீலியில்
          ஆரணீய விடங்கரை
மின்னும்நுண்ணிடை மங்கைமார்பலர்
          வேண்டிக்காதல் மொழிந்தசொல்
மன்னு தொல் புகழ் நாவலூரன் 
          வன்தொண்டன் வாய்மொழி பாடல் பத்து 
உன்னி இன்னிசை பாடுவார்உமை
          கேள்வன் சேவடி சேர்வரே.

திருச்சிற்றம்பலம்