திரு கச்சி நெறிக் காரைக்காடு

௨ 

திருஞானசம்பந்தர்   சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருக்கச்சி நெறிக் காரைக்காடு
ஊர்	திருக்காலி மேடு , காலீஸ்வரன் கோவில்
நாடு	தொண்டை நாடு
ॐசுவாமி	சத்திய விரதேஸ்வரர்
ॐஅம்பிகை	பிரமராம்பிகை
பாடியவர்கள்	ஞானசம்பந்தர்  (1)         வாராணவு முலை மங்கை (3-65)
ஸ்தல மரம்	காரை
தீர்த்தம்	இந்திர தீர்த்தம்,
பண்	பஞ்சமம்
குறிப்புகள்	இந்திரன், புதன் ஆகியோர் வழிபட்டது.  காஞ்சிபுரத்தில் உள்ள பாடல் பெற்ற தலங்கள் ஐந்தில் ஒன்று
பதிக பலன்	சாலோக பதவி நல்கும்.
வரிசை எண்.	65                                                       5/32

திருச்சிற்றம்பலம்          

வாரணவு முலைமங்கை

          பங்கினராய் அங்கையினில்

போரணவு மழு ஒன்றும்

          ஏந்தி வெண்பொடி அணிவர்

காரணவு மணிமாடம்

          கடைநவின்ற கலிக்கச்சி

நீரணவு மலர்ப்பொய்கை

          நெறிக்காரைக் காட்டாரே  1  

கார் ஊரும் மணிமிடற்றார்

          கரிகாடர் உடைதலைகொண்டு

ஊர் ஊரன் பலிக்கு உழல்வார்

          உழைமானின் உரியதளர்

தேர் ஊரு நெடுவீதிச்

          செழுங்கச்சி மாநகர்வாய்

நீர் ஊரும் மலர்ப்பொய்கை

          நெறிக்காரைக் காட்டாரே.  2  

கூறு அணிந்தார் கொடியிடையைக்

          குளிர்சடைமேல் இளமதியோடு 

ஆறு அணிந்தார் ஆட  (அ)ரவம்

          பூண்டு உகந்தார் ஆன்வெள்ளை

ஏறணிந்தார் கொடி அதன்மேல்

          என்பணிந்தார் வரைமார்பில்

நீறு அணிந்தார் கலிக்கச்சி

          நெறிக்காரைக் காட்டாரே.  3  

பிறைநவின்ற செஞ்சடைகள் 

        பின்தாழப் பூதங்கள்

மறைநவின்ற பாடலோடு  

        ஆடலராய் மழு ஏந்திச்

சிறைநவின்ற வண்டு இனங்கள் 

        தீங்கனிவாய்த் தேன்கதுவும்

நிறைநவின்ற கலிக்கச்சி 

        நெறிக்காரைக் காட்டாரே.  4 

 அன்று ஆலின் கீழ் இருந்து அங்கு

          அறம்புரிந்த அருளாளர்

குன்றாத வெஞ்சிலையில் 

          கோள் அரவம் நாண்கொளுவி

ஒன்றாதார் புரம்மூன்றும்

      ஓங்கு எரியில் வெந்து அவிய

நின்று ஆரும் கலிக்கச்சி

          நெறிக்காரைக் காட்டாரே.  5  

பன்மலர்கள் கொண்டு அடிக்கீழ்

          வானோர்கள் பணிந்து இறைஞ்ச

நன்மையிலா வல் அவுணர்

          நகர்மூன்றும் ஒருநொடியில்

வின்மலையின் நாண் கொளுவி

          வெங்கணையால் எய்து அழித்த

நின்மலனார் கலிக்கச்சி

          நெறிக்காரைக் காட்டாரே.  6  

புற்றிடைவாள் அரவினொடு

          புனைகொன்றை மதமத்தம்

எற்று ஒழியா அலைபுனலோடு

          இளமதியம் ஏந்துசடைப்

பெற்று உடையார் ஒருபாகம்

          பெண் உடையார் கண் அமரும்

நெற்றியினார் கலிக்கச்சி

          நெறிக்காரைக் காட்டாரே.  7  

ஏழ்கடல்சூழ் தென் இலங்கைக்

          கோமானை எழில்வரைவாய்த்

தாழ்விரலால் ஊன்றியதோர்

          தன்மையினார் நன்மையினார்

ஆழ்கிடங்கும் சூழ்வயலும்

          மதில் புல்கி அழகு அமரும்

நீண் மறுகிற் கலிக்கச்சி

          நெறிக்காரைக் காட்டாரே.  8  

ஊண் தானும் ஒலிகடல்நஞ்சு

          உடை தலையில் பலிகொள்வர்

மாண்டார்தம் எலும்பு அணிவர்

          வரி அரவோடு எழில் ஆமை

பூண்டாரும் ஓர் இருவர்

          அறியாமைப் பொங்கு எரியாய்

நீண்டாரும்  கலிக்கச்சி

          நெறிக்காரைக் காட்டாரே.  9  

குண்டு ஆடிச் சமண்படுவார்

          கூறைதனை மெய்போர்த்து

மிண்டு ஆடித் திரிதருவார்

          உரைப்பனகன் மெய் அல்ல

வண்டு ஆரும் குழலாளை

          வரை ஆகத்து ஒரு பாகம்

கண்டாரும் கலிக்கச்சி

          நெறிக்காரைக் காட்டாரே.  10  

கண்ணாரும் கலிக்கச்சி

          நெறிக்காரைக் காட்டுறையும்

பெண்ணாரும் திருமேனிப்

          பெருமானது அடிவாழ்த்தித்

தண்ணாரும் பொழிற்காழித்

          தமிழ்ஞான சம்பந்தன்

பண்ணாரும் தமிழ்வல்லார்

          பரலோகத்து இருப்பாரே.

திருச்சிற்றம்பலம்