திரு கச்சி அனேகதங்காவதம்

௨ 

சுந்தரமூர்த்தி சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திரு கச்சி அனேகதங்காவதம்
ஊர்
நாடு	தொண்டை நாடு
ॐசுவாமி	காவதேசுவரர்
ॐஅம்பிகை	காமாட்சி அம்மை
பாடியவர்கள்	சுந்தரர்   (1)         தேன் நெய் புரிந்து உழல் (7-10)
ஸ்தல மரம்	காரை
தீர்த்தம்	இந்திர தீர்த்தம்,
பண்	பஞ்சமம்
குறிப்புகள்	இந்திரன், புதன் ஆகியோர் வழிபட்டது.  காஞ்சிபுரத்தில் உள்ள பாடல் பெற்ற தலங்கள் ஐந்தில் ஒன்று
பதிக பலன்	சாலோக பதவி நல்கும்.
வரிசை எண்.	65                                                       5/32

திருச்சிற்றம்பலம்          

தேன் நெய் புரிந்துழல் செஞ்சடை எம்பெரு

          மானதிடம்  திகழ் ஐங்கணையக்

கோனை எரித்து எரியாடி இடம்குல

          வான திடங் குறையா மறையா

மானை இடத்த தோர் கையன் இடம்

          மதமாறு படப்பொழி யும்மலைபோல்

யானை உரித்த பிரான திடங்கலிக்

          கச்சி அனேகதங் காவதமே.  1  

கூறு நடைக்குழி கட்பகு வாயன

          பேய் உகந்து ஆடநின்று  ஓரியிட

வேறு படக்குட கத்திலை யம்பல

          வாணன் நின்று ஆடல் விரும்பும் இடம்

ஏறு விடைக்கொடி எம்பெருமான் 

          இமையோர் பெருமான் உமையாள் கணவன்

ஆறு சடைக்குடை யப்பன் இடங்கலிக்

          கச்சி அனேகதங் காவதமே.  2  

கொடிகள் இடைக்குயில் கூவும் இடம் மயில்

          ஆலும் இடம் மழுவாள் உடைய

கடிகொள் புனற்சடை கொண்ட நுதற்கறைக்

          கண்டன் இடம் பிறைத் துண்ட முடிச்

செடிகொள் வினைப்பகை தீரும் இடம் 

          திருவாகும் இடம் திருமார் பகலத்து 

அடிகளிடம் அழல் வண்ணன் இடம் கலிக்

          கச்சி அனேகதங் காவதமே.  3  

கொங்கு நுழைத்தன வண்டு அறை கொன்றையும்

          கங்கையும் திங்களும் சூடுசடை

மங்குல் நுழைமலை மங்கையை நங்கையைப்

          பங்கினில் தங்க உவந்து அருள்செய்

சங்கு குழைச்செவி கொண்டரு வித்திரள்

          பாய வியாத்தழல் போல் உடைத்தம்

மங்கை மழுத்திகழ் கையன் இடம் கலிக்

          கச்சி அனேகதங் காவதமே.  4  

பைத்த படத்தலை ஆடரவம் 

          பயில்கின்ற விடம் பயி லப்புகுவார்

சித்தம் ஒரு நெறி வைத்த இடம் 

          திகழ்கின்ற இடம் திரு வான் அடிக்கே

வைத்த மனத்தவர் பத்தர் மனங்கொள

          வைத்த இடம் மழு வாளுடைய

அத்தன் இடம் அழல் வண்ணன் இடங்கலிக்

          கச்சி அனேகதங் காவதமே.  5  

தண்ட முடைத்தரு மன் தமர் என் 

          தமரைச் செயும் வன் துயர் தீர்க்கும் இடம்

பிண்ட முடைப் பிறவித்தலை நின்று

          நினைப்பவர் ஆக்கையை நீக்கும் இடம்

கண்ட முடைக்கரு நஞ்சை நுகர்ந்த

          பிரானது இடம் கடல் ஏழு கடந்து 

அண்டம் உடைப் பெரு மானது இடங்கலிக்

          கச்சி அனேகதங் காவதமே.  6  

கட்டு மயக்கம் அறுத்தவர் கைதொழுது 

          ஏத்தும் இடம் கதிரோன் ஒளியால்

விட்ட இடம்விடை ஊர்தி இடங்குயில்

          பேடைதன் சேவலோடு ஆடும் இடம்

மட்டு மயங்கி அவிழ்ந்த மலர் ஒரு

          மாதவி யோடு மணம்புணரும்

அட்ட புயங்கம் பிரானது இடங்கலிக்

          கச்சி அனேகதங் காவதமே.  7  

புல்லி இடம் தொழு உய்தும் எனாதவர்

          தம்புர மூன்றும் பொடிப்படுத்த

வில்லி இடம் விரவாது உயிர் உண்ணும்வெங்

          காலனைக் கால்கொடு வீந்தவியக்

கொல்லி இடம் குளிர் மாதவி மவ்வல்

          குரா வகுளம் குருக்கத்தி புன்னை

அல்லி யிடைப்பெடை வண்டுறங் குங்கலிக்

          கச்சி அனேகதங் காவதமே.  8  

சங்கை யவர்புணர் தற்கரி யான் தள

          வேனகை யாள்தவி ராமிகுசீர்

மங்கை அவள்மகி ழச்சுடு காட்டிடை

          நட்டம் நின்று ஆடிய சங்கரன் எம்

அங்கையினில் அனல் ஏந்தும் அவன்கனல்

          சேரொளி அன்னதோர் பேரகலத்து 

அங்கை அவன் உறைகின்ற இடம் கலிக்

          கச்சி அனேகதங் காவதமே.  9  

வீடு பெறப்பல ஊழிகள் நின்று

          நினைக்கும் இடம்வினை தீரும் இடம்

பீடு பெறப்பெரி யோரது இடம் கொண்டு

          மேவினர் தங்களைக் காக்கும் இடம்

பாடும் இடத்து அடியான் புகழ் ஊரன்

          உரைத்த இம் மாலைகள் பத்தும்வல்லார்

கூடும் இடம் சிவலோகன் இடம் கலிக்

          கச்சி அனேகதங் காவதமே.

திருச்சிற்றம்பலம்