பொது

    

௨ 

திரு நாவுக்கரசு  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	பொது
பாடியவர்கள்	அப்பர் (1)        தேர்ந்து ஒருத்தி (6-93)
பண்	திருத்தாண்டகம்
குறிப்புகள்	இது பலவகைத் திருத்தாண்டகம் என போற்றப் படுகிறது.  ஒரு குறிப்பிட தலத்தை சேராமையால் இப்பெயர்
பதிக பலன்	வீடு பேறு கிட்டும்.
வரிசை எண்.	93

திருச்சிற்றம்பலம்          

நேர்ந்து ஒருத்தி ஒருபாகத்து  அடங்கக் கண்டு
நிலைதளர ஆயிரமா முகத்தி னோடு
பாய்ந்து ஒருத்தி படர் சடைமேல் பயிலக் கண்டு
பட அரவும் பனிமதியும் வைத்த செல்வர்
தாந்திருத்தித் தம்மனத்தை ஒருக்காத் தொண்டர்
தனித்து ஒரு தண்டு ஊன்றி மெய் தளரா முன்னம்
"பூந்துருத்தி.." "பூந்துருத்தி .." என்பீர் ஆகில்
பொல்லாப் புலாற் துருத்தி போக்க லாமே.  1  

ஐத்தானத்து அகமிடறு சுற்றி ஆங்கே
அகத்து அடைந்தால் யாதொன்று மிடுவார் இல்லை
மைத்தானக் கண்மடவார் தங்க ளோடு
மாயமனை வாழ்க்கை மகிழ்ந்து வாழ்வீர்
பைத்தானத்து ஒண் மதியும் பாம்பும் நீரும்
படர்சடைமேல் வைத்து உகந்த பண்பன் மேய
"நெய்த்தானம்" ,  "நெய்த்தானம்" என்பீர் ஆகில்
நிலாவாப் புலால் தானம் நீக்க லாமே.  2  

பொய்யாறா வாறே புனைந்து பேசிப்
புலர்ந்து எழுந்த காலைப் பொருளே தேடிக்
கையாறாக் கரணம் உடையோம் என்று
களித்த மனத்தராய்க் கருதி வாழ்வீர்
நெய்யாறா ஆடிய நீல கண்டர்
நிமிர்புன் சடைநெற்றிக் கண்ணர் மேய
"ஐயாறே", "ஐயாறே"  என்பீர் ஆகில்
அல்லல் தீர்ந்து அமர் உலகம் ஆளலாமே.  3  

இழவு ஒன்று தாம் ஒருவர்க்கு இட்டு ஒன்று ஈயார்
ஈன்று எடுத்த தாய்தந்தை பெண்டீர் மக்கள்
கழனங்கோ வையாதல் கண்டும் தேறார்
களித்த மனத்தராய்க் கருதி வாழ்வீர்
அழனம்மை நீக்குவிக்கும் அரைய னாக்கும்
அமருலகம் ஆள்விக்கும் அம்மான் மேய
"பழனம்"  "பழனமே" என்பீ ர் ஆகில்
பயின்று எழுந்த பழவினைநோய் பாற்ற லாமே.  4  

ஊற்றுத் துறை ஒன்பதுள் நின்று ஓரீர்
ஒக்க அடைக்கும்போது உணர மாட்டீர்
மாற்றுத் துறைவழிகொண்டு ஓடா முன்னம்
மாய மனைவாழ்க்கை மகிழ்ந்து வாழ்வீர்
வேற்றுத் தொழில்பூண்டார் புரங்கள் மூன்றும்
வெவ்வழல்வாய் வீழ்விக்கும் வேந்தன் மேய
"சோற்றுத்துறை", "சோற்றுத்துறை," என்பீ ர் ஆகில்
துயர்நீங்கித் தூநெறிக்கண் சேர லாமே.  5  

கலஞ்சுழிக்கும் கருங்கடல்சூழ் வையம் தன்னில்
கள்ளக் கடலில் அழுந்தி வாளா
நலம் சுழியா எழு நெஞ்சே இன்பம் வேண்டில்
நம்பன் தன் அடியிணைக்கே நவில்வாய் ஆகில்
அலஞ்சுழிக்கும் மன் நாகம் தன்னான் மேய
அருமறையோடு ஆறு அங்கம் ஆனார் கோயில்
"வலஞ்சுழியே", "வலஞ்சுழியே" என்பீர் ஆகில்
வல்வினைகள் தீர்ந்து வான் ஆளலாமே.  6  

தண்டி குண்டோதரன் பிங்கிருடி
சார்ந்த புகழ்நந்தி சங்கு கன்னன்
பண்டை உலகம் படைத்தான் தானும்
பாரை அளந்தான் பல்லாண்டு இசைப்பத்
திண்டி வயிற்றுச் சிறுகட் பூதம்
சிலபாடச் செங்கண் விடை ஒன்று ஊர்வான்
"கண்டியூர்", "கண்டியூர்" என்பீர் ஆகில்
கடுகநும் வல்வினையைக் கழற்ற லாமே.  7  

விடமூக்கப் பாம்பே போல் சிந்தி நெஞ்சே
வெள்ளேறு தான் தன் தமரைக் கண்ட போது
வடமூக்க மாமுனிவர் போலச் சென்று
மாதவத்தார் மனத்துளார் மழுவாட் செல்வர்
படமூக்கப் பாம்பணையிற் பள்ளியானும்
பங்கயத்து மேல் அயனும் பரவிக் காணா
"குடமூக்கே", "குடமூக்கே" என்பீர் ஆகில்
கொடுவினைகள் தீர்ந்தரனைக் குறுக லாமே.  8  

தண்காட்டாச் சந்தனமும் தவள நீறுந்
தழையணுகும் குறுங்கொன்றை மாலை சூடிக்
கண்காட்டாக் கருவரைபோல் அனைய காஞ்சிக்
கார்மயிலஞ் சாயலார் கலந்து காண
எண்காட்டாக் காடு அங்கு இடமா நின்று
எரிவீசி இரவாடும் இறைவர் மேய
"வெண்காடே", "வெண்காடே" என்பீர் ஆகில்
வீடாத வல்வினை நோய் வீட்ட லாமே.  9  

தந்தையார் தாயார் உடன் பிறந்தார்
தாரம் ஆர் புத்திரர் ஆர் தாம் தா மாரே
வந்தவாறு எங்ஙனே போமாறேதோ
மாயமாம் இதற்கு ஏதும் மகிழ வேண்டா
சிந்தையீர் உமக்கு ஒன்று சொல்லக் கேண்மின்
திகழ்மதியும் வாள் அரவும் திளைக்கும் சென்னி
எந்தையார் திருநாமம் நமச்சி வாய
என்று எழுவார்க்கு இரு விசும்பில் இருக்க லாமே.  10 

திருச்சிற்றம்பலம்