திருமழபாடி

     

௨ 

திருஞானசம்பந்தர் சுவாமிகள்   அருளிச்செய்த
மூன்றாம் திருமுறை 

தகவல் பலகை	விவரம்
தலம்	திரு மழபாடி
பிற பெயர்கள்
நாடு	சோழ நாடு (வ)
ॐசுவாமி	வைத்தியநாதர், மழுவாட்டீஸ்வரர், வச்சிரதம்பேஸ்வரர்,
ॐஅம்பிகை	அழகம்மை, சுந்தராம்பிகை
பாடியவர்கள்	சம்பந்தர் (3)         களையும் வல்வினை  (2-09)         காலையார் வண்டு இனம் (3-028)         அங்கையார் அழல் அன்ன (3-048) அப்பர் (2)         நீறேறு மேனி உடையான் (6-039)         அலையடுத்த பெருங்கடல் (6-040) சுந்தரர் (1)         பொன்னார் மேனியனே (7-24)
ஸ்தல மரம்	பனை மரம்
தீர்த்தம்	இலக்குமி  தீர்த்தம்., கொள்ளிடம்
பண்	கொல்லி
குறிப்புகள்	மார்க்கண்டேயரின் பொருட்டு இறைவன் மழு ஏந்தி நடம் புரிந்த தலம்  திருமால், இந்திரன் வழிபட்ட தலம்  நந்தி தேவர் மணம் முடித்த திருத்தலம்  மழபாடிக்கு வர மறந்தனையோ என அழைத்த திருத்தலம்
பதிக பலன்	தீவினை நீங்கும்.
வரிசை எண்.	28                                                      54/63

திருச்சிற்றம்பலம் 

காலையார் வண்டு இனம் கிண்டிய காருறும்
சோலையார் பைங்கிளி சொற்பொருள் பயிலவே
வேலையார் விடமணி வேதியன் விரும்பிடம்
மாலையார் மதிதவழ் மாமழ பாடியே.  1

கறையணி மிடறுடைக் கண்ணுதல் நண்ணிய
பிறையணி செஞ்சடைப் பிஞ்ஞகன் பேணும் ஊர்
துறையணி குருகினம் தூமலர் துதையவே
மறையணி நாவினான் மாமழ பாடியே.  2

அந்தணர் வேள்வியும் அருமறைத் துழனியும்
செந்தமிழ்க் கீதமும்  சீரினால் வளர்தரப்
பந்தணை மெல்விர லாளொடும் பயில்விடம்
மந்தம்வந்து உலவு சீர் மாமழ பாடியே.  3

அத்தியின் உரிதனை  அழகுறப் போர்த்தவன்
முத்தியாய் மூவரின் முதல்வனாய் நின்றவன்
பத்தியால் பாடிடப் பரிந்தவர்க்கு அருள்செயும்
அத்தனார் உறைவிடம் அணிமழ பாடியே.  4

கங்கையார் சடையிடைக் கதிர்மதி அணிந்தவன்
வெங்கண்வாள் அரவுடை வேதியன் தீதிலாச்
செங்கயற் கண் உமையாளொடும் சேர்விடம்
மங்கைமார் நடம்பயில் மாமழ பாடியே.  5

பாலனார் ஆருயிர் பாங்கினால் உணவரும் 
காலனார் உயிர்செகக் காலினால்  சாடினான்
சேலினார் கண்ணினாள் தன்னொடும்  சேர்விடம்
மாலினார் வழிபடு மாமழ பாடியே.  6

விண்ணிலார் இமையவர் மெய்ம் மகிழ்ந்து ஏத்தவே
எண்ணிலார் முப்புரம் எரியுண நகைசெய்தார்
கண்ணினால் காமனைக் கனல் எழக் காய்ந்தஎம்
அண்ணலார் உறைவிடம் அணிமழ பாடியே.  7

கரத்தினால் கயிலையை எடுத்தகார் அரக்கன்
சிரத்தினை ஊன்றலும் சிவனடி சரண்எனா
இரத்தினால் கைந்நரம்பு எடுத்து இசை பாடலும்
வரத்தினான் மருவிடம் மாமழ பாடியே.  8

ஏடுலா மலர்மிசை அயம் எழில் மாலுமாய்
நாடினார்க்கு அரியசீர் நாதனார் உறைவிடம்
பாடெலாம் பெண்ணையின் பழம்விழப் பைம்பொழில்
மாடெலாம் மல்குசீர் மாமழ பாடியே.  9

உறிபிடித்து ஊத்தைவாய்ச் சமணொடு சாக்கியர்
நெறிபிடித்து அறிவிலா நீசர்சொற் கொள்ளன்மின்
பொறிபிடித்து அரவினம் பூண் எனக் கொண்டுமான்
மறிபிடித் தானிடம் மாமழ பாடியே.  10

ஞாலத்தார் ஆதிரை  நாளினான் நாள்தொறும்
சீலத்தான் மேவிய திருமழ பாடியை
ஞாலத்தான் மிக்கசீர் ஞானசம் பந்தன்சொல்
கோலத்தால் பாடுவார் குற்றம் அற்றார்களே.

திருச்சிற்றம்பலம்