திரு மழபாடி

     

௨ 

திருநாவுக்கரசர்  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	திரு மழபாடி
பிற பெயர்கள்
நாடு	சோழ நாடு (வ)
ॐசுவாமி	வைத்தியநாதர், மழுவாட்டீஸ்வரர், வச்சிரதம்பேஸ்வரர்,
ॐஅம்பிகை	அழகம்மை, சுந்தராம்பிகை
பாடியவர்கள்	சம்பந்தர் (3)         களையும் வல்வினை  (2-09)         காளையார் வண்டு இனம் (3-028)         அங்கையார் அழல் அன்ன (3-048) அப்பர் (2)         நீறேறு மேனி உடையான் (6-039)         அலையடுத்த பெருங்கடல் (6-040) சுந்தரர் (1)         பொன்னார் மேனியனே (7-24)
ஸ்தல மரம்	பனை மரம்
தீர்த்தம்	இலக்குமி  தீர்த்தம்., கொள்ளிடம்
பண்	திருத்தாண்டகம்
குறிப்புகள்	மார்க்கண்டேயரின் பொருட்டு இறைவன் மழு ஏந்தி நடம் புரிந்த தலம்  திருமால், இந்திரன் வழிபட்ட தலம்  நந்தி தேவர் மணம் முடித்த திருத்தலம்  மழபாடிக்கு வர மறந்தனையோ என அழைத்த திருத்தலம்
பதிக பலன்	இறை இன்பம் கிடைக்கும்.
வரிசை எண்.	39                                                     54/63

திருச்சிற்றம்பலம் 

நீறேறு திருமேனி உடையான் கண்டாய்
நெற்றிமேல் ஒற்றைக்கண் நிறைந்தான் கண்டாய்
கூறாக உமைபாகம் கொண்டான் கண்டாய்
கொடியவிடம் உண்டு இருண்ட கண்டன் கண்டாய்
ஏறேறி  எங்கும்  திரிவான் கண்டாய்
ஏழு உலகும் ஏழ்மலையும் ஆனான் கண்டாய்
மாறானார் தம் அரணம் அட்டான் கண்டாய்
மழபாடி மன்னும் மணாளன் தானே.  1

கொக்கிறகு சென்னி யுடையான் கண்டாய்
கொல்லை விடை ஏறும் கூத்தன் கண்டாய்
அக்கு அரை மேலாட உடையான் கண்டாய்
அனல் அங்கை ஏந்திய ஆதி கண்டாய்
அக்கோடு அரவம் அணிந்தான் கண்டாய்
அடியார்கட்கு ஆரமுதம் ஆனான் கண்டாய்
மற்று இருந்த கங்கைச் சடையான் கண்டாய்
மழபாடி மன்னும் மணாளன் தானே.  2

நெற்றித் தனிக்கண் உடையான் கண்டாய்
நேரிழையோர் பாகமாய் நின்றான் கண்டாய்
பற்றிப் பாம்பு ஆட்டும் படிறன் கண்டாய்
பல்லூர் பலிதேர் பரமன் கண்டாய்
செற்றார் புரம் மூன்றும் செற்றான் கண்டாய்
செழுமா மதிசென்னி வைத்தான் கண்டாய்
மற்றொரு குற்றம் இலாதான் கண்டாய்
மழபாடி மன்னும் மணாளன் தானே.  3

அலையார்ந்த புனற்கங்கைச் சடையான் கண்டாய்
அண்டத்துக்கு அப்பாலாய் நின்றான் கண்டாய்
கொலையான கூற்றம் குமைத்தான் கண்டாய்
கொல் வேங்கைத் தோல்ஒன்று உடுத்தான் கண்டாய்
சிலையாற் திரிபுரங்கள் செற்றான் கண்டாய்
செழுமா மதிசென்னி வைத்தான் கண்டாய்
மலையார் மடந்தை மணாளன் கண்டாய்
மழபாடி மன்னும் மணாளன் தானே.  4

உலந்தார்தம் அங்கம் அணிந்தான் கண்டாய்
உவகையோடு இன் அருள்கள் செய்தான் கண்டாய்
நலம் திகழும் கொன்றைச் சடையான் கண்டாய்
நால்வேதம் ஆறு அங்கம் ஆனான் கண்டாய்
உலந்தார் தலைகலனாக் கொண்டான் கண்டாய்
உம்பரார் தங்கள் பெருமான் கண்டாய்
மலர்ந்தார் திருவடி என் தலைமேல் வைத்த 
மழபாடி மன்னும் மணாளன் தானே.  5

தாமரையான் தன் தலையைச் சாய்த்தான் கண்டாய்
தகவுடையார் நெஞ்சு இருக்கை கொண்டான் கண்டாய்
பூமலரான் ஏத்தும் புனிதன் கண்டாய்
புணர்ச்சிப் பொருளாகி நின்றான் கண்டாய்
ஏமருவு வெஞ்சிலை ஒன்று ஏந்தி கண்டாய்
இருள் ஆர்ந்த கண்டத்து இறைவன் கண்டாய்
மாமருவும் கலை கையில் ஏந்தி கண்டாய்
மழபாடி மன்னும் மணாளன் தானே.  6

நீராகி நெடுவரைகள் ஆனான் கண்டாய்
நிழலாகி நீள்விசும்பும் ஆனான் கண்டாய்
பாராகிப் பௌவம் ஏழு ஆனான் கண்டாய்
பகலாகி வானாகி நின்றான் கண்டாய்
ஆரேனும் தன் அடியார்க்கு அன்பன் கண்டாய்
அணுவாகி ஆதியாய் நின்றான் கண்டாய்
வாரார்ந்த வனமுலையாள் பங்கன் கண்டாய்
மழபாடி மன்னும் மணாளன் தானே.  7

பொன்னியலும் திருமேனி உடையான் கண்டாய்
பூங்கொன்றைத் தார் ஒன்று அணிந்தான் கண்டாய்
மின்னியலும் வார் சடை எம் பெருமான் கண்டாய்
வேழத்தின் உரி விரும்பிப் போர்த்தான் கண்டாய்
தன் இயல்பார் மற்றொருவர் இல்லான் கண்டாய்
தாங்கரிய சிவந்தானாய் நின்றான் கண்டாய்
மன்னிய மங்கை ஓர் கூறன் கண்டாய்
மழபாடி மன்னும் மணாளன் தானே.  8

ஆலாலம் உண்டு உகந்த ஆதி கண்டாய்
அடையலர்தம் புரம் மூன்றும் எய்தான் கண்டாய்
காலாலக் காலனையும் காய்ந்தான் கண்டாய்
கண்ணப்பர்க்கு அருள்செய்த காளை கண்டாய்
பாலாரும் மொழி மடவாள் பாகன் கண்டாய்
பசு ஏறிப் பலிதிரியும் பண்பன் கண்டாய்
மாலாலும் அறிவரிய மைந்தன் கண்டாய்
மழபாடி மன்னும் மணாளன் தானே.  9

ஒருசுடராய் உலகு ஏழும் ஆனான் கண்டாய்
ஓங்காரத்து உட்பொருளாய் நின்றான் கண்டாய்
விரிசுடராய் விளங்கு ஒளியாய் நின்றான் கண்டாய்
விழவொலியும் வேள்  ஒலியும் ஆனான் கண்டாய்
இருசுடர் மீது ஓடா இலங்கைக் கோனை 
ஈடு அழிய இருபது தோள் இறுத்தான் கண்டாய்
மருசுடரின் மாணிக்கக் குன்று கண்டாய்
மழபாடி மன்னும் மணாளன் தானே.

திருச்சிற்றம்பலம்