திரு மழபாடி

       

௨ 

திருநாவுக்கரசர்  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	திரு மழபாடி
பிற பெயர்கள்
நாடு	சோழ நாடு (வ)
ॐசுவாமி	வைத்தியநாதர், மழுவாட்டீஸ்வரர், வச்சிரதம்பேஸ்வரர்,
ॐஅம்பிகை	அழகம்மை, சுந்தராம்பிகை
பாடியவர்கள்	சம்பந்தர் (3)         களையும் வல்வினை  (2-09)         காளையார் வண்டு இனம் (3-028)         அங்கையார் அழல் அன்ன (3-048) அப்பர் (2)         நீறேறு மேனி உடையான் (6-039)         அலையடுத்த பெருங்கடல் (6-040) சுந்தரர் (1)         பொன்னார் மேனியனே (7-24)
ஸ்தல மரம்	பனை மரம்
தீர்த்தம்	இலக்குமி  தீர்த்தம்., கொள்ளிடம்
பண்	நட்டராகம்
குறிப்புகள்	மார்க்கண்டேயரின் பொருட்டு இறைவன் மழு ஏந்தி நடம் புரிந்த தலம்  திருமால், இந்திரன் வழிபட்ட தலம்  நந்தி தேவர் மணம் முடித்த திருத்தலம்  மழபாடிக்கு வர மறந்தனையோ என அழைத்த திருத்தலம்
பதிக பலன்	இறை இன்பம் கிடைக்கும்.
வரிசை எண்.	24                                                     54/63

திருச்சிற்றம்பலம் 

பொன்னார் மேனியனே
          புலித்தோலை அரைக்கு அசைத்து
மின்னார் செஞ்சடைமேல்
          மிளிர்கொன்றை அணிந்தவனே
மன்னே மாமணியே
          மழபாடியுள் மாணிக்கமே
அன்னே உன்னை அல்லால்
          இனியாரை நினைக்கேனே.  1

கீளார் கோவணமுந்
          திருநீறுமெய் பூசி உன்தன்
தாளே வந்து அடைந்தேன்
          தலைவா எனை ஏன்றுகொள்நீ
வாளார் கண்ணிபங்கா
          மழபாடியுள் மாணிக்கமே
ஆளாய் நின்னை அல்லால்
          இனியாரை நினைக்கேனே.  2

எம்மான் எம் அனையென்று
          எனக்கு எள் தனைச் சார்வாகார்
இம் மாயப்பிறவி
          பிறந்தே இறந்து எய்த்து ஒழிந்தேன்
மைம்மாம் பூம்பொழில்சூழ்
          மழபாடியுள் மாணிக்கமே
அம்மான் நின்னை அல்லால்
          இனியாரை நினைக்கேனே.  3

பண்டே நின் அடியேன்
          அடியார் அடியார்கட்கு எல்லாம்
தொண்டே பூண்டு ஒழிந்தேன்
          தொடராமைத் துரிசு அறுத்தேன்
வண்டார் பூம்பொழில்சூழ்
          மழபாடியுள் மாணிக்கமே
அண்டா நின்னை அல்லால்
          இனியாரை நினைக்கேனே.  4

கண்ணாய் ஏழு உலகும்
          கருத்தாய அருத்தமுமாய்ப்
பண்ணார் இன் தமிழாய்ப்
          பரமாய பரஞ்சுடரே
மண்ணார் பூம்பொழில்சூழ்
          மழபாடியுள் மாணிக்கமே
அண்ணா நின்னை அல்லால்
          இனியாரை நினைக்கேனே.  5

நாளார் வந்து அணுகி
          நலியாமுனம் நின் தனக்கே
ஆளா வந்து அடைந்தேன்
          அடியேனையும் ஏன்றுகொள்நீ
மாளா நாள் அருளும்
          மழபாடியுள் மாணிக்கமே
ஆளா நின்னை அல்லால்
          இனியாரை நினைக்கேனே.  6

சந்தாரும் குழையாய்
          சடைமேற்பிறை தாங்கி நல்ல
வெந்தார் வெண்பொடியாய்
          விடையேறிய வித்தகனே
மைந்தார் சோலைகள்சூழ்
          மழபாடியுள் மாணிக்கமே
எந்தாய் நின்னை அல்லால்
          இனியாரை நினைக்கேனே.  7

வெய்ய விரிசுடரோன்
          மிகுதேவர் கணங்கள் எல்லாம்
செய்ய மலர்கள் இட
          மிகுசெம்மையுள் நின்றவனே
மையார் பூம்பொழில்சூழ்
          மழபாடியுள் மாணிக்கமே
ஐயா!  நின்னை அல்லால்
          இனியாரை நினைக்கேனே.  8

நெறியே நின்மலனே
          நெடுமால் அயன் போற்றிசெய்யும்
குறியே நீர்மையனே
          கொடியேரிடை யாள்தலைவா
மறிசேர் அங்கையனே
          மழபாடியுள் மாணிக்கமே
அறிவே நின்னை அல்லால்
          இனியாரை நினைக்கேனே.  9

ஏரார் முப்புரமும்
          எரியச்சிலை தொட்டவனை
வாரார் கொங்கையுடன்
          மழபாடியுள் மேயவனைச்
சீரார் நாவலர்கோன்
          ஆரூரன் உரைத்ததமிழ்
பாரோர் ஏத்தவல்லார்
          பரலோகத்து இருப்பாரே.

திருச்சிற்றம்பலம்