திருமந்திரம் 2:10 - காத்தல்

௨

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	10
தந்திரம்	இரண்டாம்  தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	10.  காத்தல்
பிற குறிப்புகள்	திதி - காத்தல்

திருச்சிற்றம்பலம்

                  

புகுந்துநின் றான்வெளி யாய்இருள் ஆகிப்

புகுந்துநின் றான்புகழ் வாய்இகழ்வாகிப்

புகுந்துநின் றான்உட லாய்உயி ராகிப்

புகுந்துநின் றான்புந்தி மன்னிநின் றானே.  1

தானே திசையொடு தேவரு மாய்நிற்கும்

தானே உடல் உயிர் தத்துவ மாய்நிற்கும்

தானே கடல்மலை ஆதியுமாய் நிற்கும்

தானே உலகில் தலைவனும் ஆமே.  2

உடலாய் உயிராய் உலகம் அதாகிக்

கடலாய் கார்முகில் நீர்ப்பொழி வான் ஆய்

இடையாய், உலப்பு இலி, எங்கும் தான் ஆகி

அடையார் பெருவழி அண்ணல் நின்றானே.  3

தேடும் திசை எட்டும் சீவன் உடல்உயிர்

கூடும் பிறவிக் குணம் செய்த மாநந்தி

ஊடும் அவர் தமது உள்ளத்துள்ளே நின்று

நாடும் வழக்கமும் நான்அறிந் தேனே.  4

தான் ஒரு காலம் தனிச்சுட ராய்நிற்கும்

தான் ஒரு கால்சண்ட மாருத மாய்நிற்கும்

தான் ஒரு காலம் தண்மழை யாய்நிற்கும்

தான் ஒரு காலம் தண் மாயனும் ஆமே.  5

அன்பும் அறிவும் அடக்கமுமாய் நிற்கும்

இன்பமும் இன்பக் கலவியுமாய் நிற்கும்

முன்புறு காலமும் ஊழியு மாய்நிற்கும்

அன்புற ஐந்தில் அமர்ந்து நின் றானே.  6

உற்று வனைவான் அவனே உலகினைப்

பெற்று வனைவான் அவனே பிறவியைச்

சுற்றிய சாலும் குடமும் சிறுதூதை

மற்றும் அவனே வனையவல் லானே.  7

உள் உயிர்ப்பு ஆய் உடலாகி நின் றான் நந்தி

வெள்ளுயி ராகும் வெளியான் இளங்கு ஒளி

உள்ளுயிர்க்கும் உணர்வே உடலுள் பரம்

தள் உயிரா வண்ணம் தாங்கி நின் றானே.  8

தாங்க அருந் தன்மையும் தான் அவை பல்லுயிர்

வாங்கிய காலத்தும்  மற்றோர் பிறிது இல்லை

ஓங்கி எழுமைக்கும் யோகாந்தம் அவ்வழி

தாங்கிநின் றானும்அத் தாரணி தானே.  9

அணுகினும் சேயவன் அங்கியில் கூடி

நணுகினும் ஞானக் கொழுந்து ஒன்று நல்கும்

பணுகினும் பார்மிசைப் பல்லுயிர் ஆகித்

தணிகினும் மண்ணுடல் அண்ணல்செய் வானே.  10