2:11 - அழித்தல்

 ௨

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	11
தந்திரம்	இரண்டாம்  தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	11. அழித்தல் [சங்காரம்]
பிற குறிப்புகள்	இறைவன் அருள் செயல்களுள் ஒன்று.

திருச்சிற்றம்பலம்

                  

அங்கி செய்து ஈசன் அகல் இடம் சுட்டது

அங்கி செய்து ஈசன் அலைகடல் சுட்டது

அங்கி செய்து ஈசன் அசுரரைச் சுட்டது

அங்கி அவ் ஈசற்குக் கைஅம்பு தானே.  1

இலயங்கள் மூன்றிலும் ஒன்றுகற் பாந்தம்

நிலை அன்று இழிந்தமை நின்று உணர்ந் தேனால்

உலைதந்த மெல் அரி போலும் உலகம்

மலைதந்த மானிலந் தான்வெந் ததுவே.  2

பதம் செய்யும் பாரும் பனிவரை எட்டும்

உதம் செய்யும் ஏழ்கடல் ஓதம் முதலாம்

குதம் செய்யும் அங்கி கொளுவி ஆகாசம்

விதம் செய்யும் நெஞ்சில் வியப்பு இல்லை தானே.  3

கொண்டல் வரை நின்று இழிந்த குலக்கொடி

அண்டத்துள் ஊறி இருந்து எண் திசை ஆகி

ஒன்றின் பதம் செய்த ஓம் என்ற அப்புறக்

குண்டத்தின் மேல் அங்கி கோலிக் கொண்டானே.  4

நித்த சங்காரம் உறக்கத்து நீள்மூடம்

வைத்த சங்காரமும் சாக்கிரா தீதம் ஆம்

சுத்தசங் காரம் தொழில் அற்ற கேவலம்

உய்த்த சங்காரம் பரன் அருள் உண்மையே.  5

நித்தசங் காரம் இரண்டுடல் நீவுதல்

வைத்தசங் காரமும் மாயாசங் காரமாம்

சுத்தசங் காரம் மனாதீதந் தோய் வித்தல்

உய்த்தசங் காரம் சிவன் அருள் உண்மையே.  6

நித்தசங் காரம் கருவிடர் நீக்கினால்

ஒத்தசங் காரமும் உடலுயிர் நீவுதல்

வைத்த சங்காரம் கேவல மான்மாவுக்கு

உய்த்தசங் காரம் சிவமாகும் உண்மையே  7

நித்தசங் காரமும் நீடு இளைப்பு ஆற்றுதல் 

வைத்தசங் காரமும் மன்னும் அனாதியில்

சுத்தசங் காரமும் தோயாப் பரன்அருள்

வைத்த சங் காரமும் நாலாம் உதிக்கிலே.  8

பாழே முதலா எழும்பயிர் அப்பயிர்

பாழாய் அடங்கினும் பண்டைப்பாழ் பாழாகா

வாழாச்சங் காரத்தின் மால் அயன் செய்தியாம்

பாழாம் பயிராய் அடங்கும்அப் பாழிலே.  9

தீயவைத்து  ஆர்மின்கள் சேரும் வினைதனை

மாயவைத் தான்வைத்த வன்பதி ஒன்று உண்டு

காயம்வைத்தான் கலந்து எங்கும் நினைப்பது ஓர்

ஆயம் வைத்தான் உணர் ஆரவைத் தானே.  10