2.12 - மறைத்தல்

  ௨

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	12
தந்திரம்	இரண்டாம்  தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	12.  திரோபவம் - மறைத்தல்
பிற குறிப்புகள்	இறைவனின் அருள் செயலே.

திருச்சிற்றம்பலம்

                  

உள்ளத்து ஒருவனை உள்ளுறு சோதியை

உள்ளம் விட்டு ஓரடி நீங்கா ஒருவனை

உள்ளமும்  தானும் உடனே இருக்கினும்

உள்ளம் அவனை உரு அறியாதே.  1

இன்பப் பிறவி படைத்த இறைவனும்

துன்பம் செய் பாசத் துயருள் அடைத்தனன்

என்பில் கொளுவி இசைந்து உறு தோல் தசை

முன்பின் கொளுவி முடிகுவது ஆக்குமே.  2

இறையவன் மாதவன் இன்பம் படைத்த

மறையவன் மூவரும் வந்துடன் கூடி

இறையவன் செய்த இரும்பொறி யாக்கை

மறையவன் வைத்த பரிசறி யாதே.  3

காண்கின்ற கண்ணொளி காதல்செய் ஈசனை

ஆண்பெண் அலி உருவாய் நின்ற ஆதியை

ஊண்படு நாவுடை நெஞ்சம் உணர்ந்திட்டுச்

சேண்படு பொய்கைச் செயல் அணை யாரே.  4

தெருளும் உலகிற்கும் தேவர்க்கும் இன்பம்

அருளும் வகைசெய்யும் ஆதிப் பிரானும்

சுருளும் சுடர் உறு தூவெண் சுடரும்

இருளும் அற நின்று இருட்டறை ஆமே.  5

அரைக்கின்ற அருள் தரும் அங்கங்கள் ஓசை

உரைக்கின்ற ஆசையும் ஒன்றோடு ஒன்று ஒவ்வாப்

பரக்கும் உருவமும் பாரகந் தானாய்க்

கரக்கின் றவைசெய்த காண் தகை யானே.  6

ஒளித்துவைத் தேன் உள்ளுற உணர்ந்து ஈசனை

வெளிப்பட்டு நின்று அருள் செய்திடும் ஈண்டே

களிப்பொடும்  காதன்மை என்னும் பெருமை

வெளிப்பட்டு இறைஞ்சினும் வேட்சியும் ஆமே.  7

நின்றது தானாய் நிறைந்த மகேசுரன் 

சென்று அங்கு இயங்கி அறன் திருமால் அவன் 

நன்று அது செய்யும் மலர் மிசை மேல் அயன்

என்று இவர் ஆகி இசைந்து இருந்தானே  8 

ஒருங்கிய பாசத்துள் உத்தம சித்தன்

இருங்கரை மேல் இருந்று இன்புற நாடி

வரும் கரை ஓரா வகையினில் கங்கை

அருங்கரை பேணில் அழுக்கு அறலாமே.  9

மண் ஒன்று தான்பல நற்கலம் ஆயிடும்

உண் நின்ற யோனிகட்கு எல்லாம் ஒருவனே

கண் ஒன்று தான்பல காணுந் தனைக்காணா

அண்ணலும் அவ்வண்ணம் ஆகி நின்றானே.  10