திரு விசயமங்கை

      

௨ 

திருஞானசம்பந்தர்  சுவாமிகள்   அருளிச்செய்த
மூன்றாம்  திருமுறை 

தகவல் பலகை	விவரம்
தலம்	திரு விசயமங்கை
பிற பெயர்கள்	கோவந்த புத்தூர்
நாடு	சோழ நாடு (வ)
ॐசுவாமி	விசய நாதேஸ்வரர்
ॐஅம்பிகை	மங்கள நாயகி
பாடியவர்கள்	சம்பந்தர் (1)       மருவமர் குழல் உமை (3-17) அப்பர்(1)         குசையும் அங்கையில்  (5-71)
ஸ்தல மரம்
தீர்த்தம்	அருச்சுனா  தீர்த்தம்
பண்	காந்தார பஞ்சமம்
குறிப்புகள்	விசயன் - அர்ஜுனன் பூசித்து பேறு பெற்ற தலம்  பசு பூசித்த தலம்.  கோவந்த புத்தூர் என வழங்கப் பெற்றது.
பதிக பலன்	சிவகதி  அடைவது உறுதி
வரிசை எண்.	17                                                     47/63

திருச்சிற்றம்பலம் 

மருவமர் குழல் உமை பங்கர் வார்சடை
அரவு அமர் கொள்கையெம் அடிகள் கோயிலாங்
குரவமர் சுரபுன்னை கோங்கு வேங்கைகள்
விரவிய பொழில் அணி விசய மங்கையே.  1

கீதமுன் இசைதரக் கிளரும் வீணையர்
பூதமுன் இயல்புடைப் புனிதர் பொன்னகர்
கோதனம் வழிபடக் குலவு நான்மறை
வேதியர் தொழுது எழு விசய மங்கையே.  2

அக்கர வரையினர் அரிவை பாகமாத்
தொக்க நல்விடை உடைச் சோதி தொன்னகர்
தக்க நல் வானவர் தலைவர் நாள்தொறும் 
மிக்கவர் தொழுது எழு விசய மங்கையே.  3

தொடைமலி இதழியும்  துன் எருக்கொடு
புடைமலி சடைமுடி அடிகள் பொன்னகர்
படைமலி மழுவினர் பைங்கண் மூரிவெள்
விடைமலி கொடி அணல் விசய மங்கையே.  4

தோடு அமர் காதினன் துதைந்த நீற்றினன்
ஏடு அமர் கோதையோடு இனிது அமர்விடம் 
காடு அ மர் மாகரி கதறப் போர்த்ததோர்
வேடமது உடைய நல்  விசய மங்கையே.  5

மைப்புரை கண் உமை பங்கன் வண்தழல்
ஒப்புரை மேனி எம்முடைய வன்னகர்
அப்பொடு மலர் கொடு அங்கு இறைஞ்சி வானவர்
மெய்ப்பட அருள்புரி விசய மங்கையே.  6

இரும்பொனின் மலை வில்லின் எரி சரத்தினால்
வரும்புரங் களைப்பொடி செய்த மைந்தனூர்
சுரும்பமர் கொன்றையுந்தூய மத்தமும்
விரும்பிய சடை அண்ணல்  விசய மங்கையே.  7

உளங்கையில் இருபதோடு ஒருபதும் கொடு ஆங்கு 
அளந்தரும் வரை எடுத்திடும் அரக்கனைத்
தளர்ந்துடன்  நெரிதர அடர்த்த தன்மையன்
விளங்கிழை யொடும்புகும் விசய மங்கையே.  8

மண்ணினை உண்டவன் மலரின் மேல் உறை
அண்ணல்கள் தமக்கு அளப்பரிய அத்தனூர்
தண்ணறும் சாந்தமும் பூவும் நீர்கொடு
விண்ணவர் தொழுது எழு விசய மங்கையே.  9

கஞ்சியும்  கவளமுண் கவணர் கட்டுரை
நஞ்சினும்  கொடியன நமர்கள் தேர்கிலார்
செஞ்சடை முடி உடைத் தேவன் நன்னகர்
விஞ்சையர் தொழுது எழு விசய மங்கையே.  10

விண்ணவர் தொழுது எழு விசய மங்கையை
நண்ணிய புகலியுள் ஞான சம்பந்தன்
பண்ணிய செந்தமிழ் பத்தும் வல்லவர்
புண்ணியர் "சிவகதி" புகுதல் திண்ணமே.

திருச்சிற்றம்பலம்