திரு இன்னம்பர்

 

௨ 

திருநாவுக்கரசர் சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திரு இன்னம்பர்
ஊர்	இன்னம்பூர்
நாடு	சோழ (காவிரி வட)
ॐசுவாமி	தான் தோன்றி ஈசர், எழுத்தறிநாதர்
ॐஅம்பிகை	சுகுந்த குந்தாளாம்பிகை & நித்தியகல்யாணி
பாடியவர்கள்	திருஞானசம்பந்தர் (1)         எண் திசைக்கும் புகழ் (3-095) திருநாவுக்கரசர்(4)         விண்ணவர் மகுடகோடி (4-072)         மண்ணும் மலைமகள் (4-100)         என்னில் ஆரும் (5-021)         அல்லிமலர் நாற்றத்து (6-089)
ஸ்தல மரம்	பலா, செண்பகம்
தீர்த்தம்	ஐராவாத தீர்த்தம்
பண்	திருத்தாண்டகம்
குறிப்புகள்	அகத்தியர் வழிபட்டது அகத்தியர் இலக்கணம் பெற்றது ஐராவதம் பூசித்த தலம்.
பதிக பலன்	மும் மல நீக்கம் பெறலாம்.
வரிசை எண்.	89                                                             45/63

திருச்சிற்றம்பலம்

அல்லி மலர்நாற்றத்து உள்ளார் போலும்
அன்புடையார் சிந்தை அகலார் போலும்
சொல்லின் அருமறைகள் தாமே போலும்
தூநெறிக்கு வழிகாட்டும் தொழிலார் போலும்
வில்லிற் புரமூன்று எரித்தார் போலும்
வீங்கிருளும் நல்வெளியும் ஆனார் போலும்
எல்லி நடமாட வல்லார் போலும்
இன்னம்பர்த் தான்தோன்றி ஈசனாரே.  1

கோழிக் கொடியோன் தன் தாதை போலும்
கொம்பனாள் பாகம் குளிர்ந்தார் போலும்
ஊழி முதல்வரும்  தாமே போலும்
உள்குவார் உள்ளத்தின் உள்ளார் போலும்
ஆழித்தேர் வித்த கருந்தாமே போலும்
அடைந்தவர்கட்கு அன்பராய் நின்றார் போலும்
ஏழு பிறவிக்கும் தாமே போலும்
இன்னம்பர்த் தான்தோன்றி ஈச னாரே.  2

தொண்டர்கள் தந்தகவி னுள்ளார் போலும்
தூநெறிக்குந் தூநெறியாய் நின்றார் போலும்
பண்டிருவர் காணாப் படியார் போலும்
பத்தர்கள்தம்  சித்தத்து இருந்தார் போலும்
கண்டம் இறையே கறுத்தார் போலும்
காமனையும் காலனையும் காய்ந்தார் போலும்
இண்டைச் சடைசேர் முடியார் போலும்
இன்னம்பர்த் தான்தோன்றி ஈசனாரே.  3

வானத்து இளம் திங்கள் கண்ணி தன்னை
வளர்சடைமேல் வைத்து உகந்த மைந்தர் போலும்
ஊண் ஒத்த வேல் ஒன்று உடையார் போலும்
ஒளிநீறு பூசும் ஒருவர் போலும்
தானத்தின் முப்பொழுதும் தாமே போலும்
தம்மின் பிறர் பெரியார் இல்லை போலும்
ஏனத்து எயிறு இலங்கப் பூண்டார் போலும்
இன்னம்பர்த் தான்தோன்றி ஈச னாரே.  4

சூழும் துயரம் அறுப்பார் போலும்
தோற்றம் இறுதியாய் நின்றார் போலும்
ஆழும்  கடல்நஞ்சை உண்டார் போலும்
ஆடல் உகந்த அழகர் போலும்
தாழ்வின் மனத்தேனை ஆளாக் கொண்டு
தன்மை அளித்த தலைவர் போலும்
ஏழு பிறப்பு மறுப்பார் போலும்
இன்னம்பர்த் தான்தோன்றி ஈசனாரே.  5

பாதத் தணையும்  சிலம்பர் போலும்
பாரூர் விடை ஒன்று உடையார் போலும்
பூதப் படையாள் புனிதர் போலும்
பூம்புகலூர் மேய புராணர் போலும்
வேதப் பொருளாய் விளைவார் போலும்
வேடம் பரவித் திரியும்  தொண்டர்
ஏதப் படாவண்ணம் நின்றார் போலும்
இன்னம்பர்த் தான்தோன்றி ஈச னாரே.  6

பல்லார் தலை ஓட்டில் ஊணார் போலும்
பத்தர்கள் தம் சித்தத்து இருந்தார் போலும்
கல்லாதார் காட்சிக்கு அரியார் போலும்
கற்றவர்கள் ஏதம் களைவார் போலும்
பொல்லாத பூதப் படையார் போலும்
பொருகடலும் ஏழ் மலையும் தாமே போலும்
எல்லாரும் ஏத்தத் தகுவார் போலும்
இன்னம்பர்த் தான்தோன்றி ஈச னாரே.  7

மட்டு மலியும் சடையார் போலும்
மாதை ஓர் பாகம் உடையார் போலும்
கட்டம் பிணிகள் தவிர்ப்பார் போலும்
காலன் தன் வாழ்நாள் கழிப்பார் போலும்
நட்டம் பயின்று ஆடும் நம்பர் போலும்
ஞாலம் எரி நீர் வெளி கால் ஆனார் போலும்
எட்டுத் திசைகளும் தாமே போலும்
இன்னம்பர்த் தான்தோன்றி ஈச னாரே.  8

கருவுற்ற காலத்தே என்னை ஆண்டு
கழற்போது தந்து அளித்த கள்வர் போலும்
செருவிற் புரமூன்றும் அட்டார் போலுந்
தேவர்க்கும் தேவராம் செல்வர் போலும்
மருவிப் பிரியாத மைந்தர் போலும்
மலரடிகள் நாடி வணங்கல் உற்ற
இருவர்க்கு ஒருவராய் நின்றார் போலும்
இன்னம்பர்த் தான்தோன்றி ஈச னாரே.  9

அலங்கற் சடைதாழ ஐயம் ஏற்று
அரவம் அரையார்க்க வல்லார் போலும்
வலங்கை மழு ஒன்று உயார் போலும்
வான் தக்கன் வேள்வி சிதைத்தார் போலும்
விலங்கல் எடுத்து உகந்த வெற்றி யானை
விறல் அழித்து மெய்ந்நரம்பால் கீதம் கேட்டு அன்றி
இலங்கு சுடர்வாள் கொடுத்தார் போலும்
இன்னம்பர்த் தான்தோன்றி ஈச னாரே.

திருச்சிற்றம்பலம்