3.12 - கலை நிலை

                                         

௨ 

திருமூல தேவ நாயனார்  அருளிச்செய்த திருமந்திரம் 

பத்தாம் திருமுறை

தகவல் பலகை	விவரம்
அதிகாரம்	12
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	12.  கலை நிலை
பிற குறிப்புகள்	சந்திர கலை, சூரிய கலை, தீக்கலை இயங்கும் முறை

திருச்சிற்றம்பலம்

காதல் வழிசெய்த கண்ணுதல் அண்ணலைக்

காதல் வழிசெய்து கண்ணுற நோக்கிடில்

காதல் வழிசெய்து கங்கை வழிதரும்

காதல் வழிசெய்து காக்கலும் ஆமே  1

காக்கலும் ஆகும் கரணங்கள் நான்கையும்

காக்கலும் ஆகும் கலைபதி னாறையும்

காக்கலும் ஆகும் கலந்தநல் வாயுவும்

காக்கலும் ஆகு‌ம் கருத்துற நில்லே  2

நிலைபெற நின்றது நேர்தரு வாயு

சிலைபெற நின்றது தீபமும் ஒத்துக்

கலைவழி நின்ற கலப்பை அறியில்

அலைவு அறவு ஆகும் வழி இது ஆமே  3

புடையொன்றி நின்றிடும் பூதப் பிரானை

மடையொன்றி நின்றிட வாய்த்த வழியும்

சடையொன்றி நின்றஅச் சங்கர நாதன்

விடையொன்றில் ஏறியே வீற்றிருந் தானே  4

இருக்கின்ற காலங்கள் ஏதும் அறியார்

பெருக்கின்ற காலப் பெருமையை நோக்கி

ஒருக்கின்ற வாயு ஒளிப்பெற நிற்கத்

தருக்கொன்றி நின்றிடும் சாதகன் ஆமே  5

சாதக மானஅத் தன்மையை நோக்கியே

மாதவ மான வழிபாடு செய்திடும்

போதக மாகப் புகலுறப் பாய்ச்சினால்

வேதக மாக விளைந்து கிடக்குமே  6

கிடந்தது தானே கிளர்பயன் மூன்று

நடந்தது தானேஉள் நாடியுள் நோக்கிப்

படர்ந்தது தானே அப்பங்கய மாகத்

தொடர்ந்தது தானேஅச் சோதியுள் நின்றே  7

தானே எழுந்தஅத் தத்துவ நாயகி

ஊனே வழிசெய்து எம் உள்ளே இருந்திடும்

வானோர் உலகீன்ற அம்மை மதித்திடத்

தேனே பருகிச் சிவாலயம் ஆமே  8

திகழும் படியே செறிதரு வாயு

அழியும் படியை அறிகிலர் ஆரும்

அழியும் படியை அறிந்தபின் நந்தி

திகழ்கின்ற வாயுவைச் சேர்தலும் ஆமே  9

சோதனை தன்னில் துரிசு அறக் காணலாம்

நாதனும் நாயகி தன்னில்  பிரியும் நாள்

சாதனம் ஆகும் குருவை வழிபட்டு

மாதன மாக மதித்துக்கொள் ளீரே  10

ஈராறு கால்கொண்டு எழுந்த புரவியைப்

பேராமல்  கட்டிப் பெரிதுண்ண வல்லீரேல்

நீர் ஆயிரமும் நிலம் ஆயிரத்து ஆண்டும்

பேராது காயம் பிரான்நந்தி ஆணையே  11

ஓசையில் ஏழும் ஒளியின்கண் ஐந்தும்

நாசியில் மூன்றும் நாவில் இரண்டும்

தேசியும் தேசனும் தன்னிற் பிரியும் நாள்

மாசு அறு சோதி வகுத்துவைத் தானே  12