3.15 - ஆயுள் பரீட்ச்சை

                                         

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	15
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	15. ஆயுள் பரீட்சை
பிற குறிப்புகள்	வாழ் நாள் அறிய, ஆயுட்கால எல்லையை முடிவு செய்தல்

திருச்சிற்றம்பலம்

வைத்தகை சென்னியில் நேரிதாய்த் தோன்றிடில்

உத்தமம் இக்கிடில் ஓராறு திங்களாம்

அத்த மிகுத்திட்டு இரட்டியது ஆயிடில்

நித்தல் உயிர்க்கு ஒரு திங்களில் ஓசையே  1

ஓசையும் ஈசனும் ஒக்கும் உணர்வின்கண்

ஓசை இறந்தவர் ஈசனை உள்குவர்

ஓசை இறந்தவர் நெஞ்சினுள் ஈசனும்

ஓசை உணர்ந்த உணர்வி இது ஆமே  2

ஆமே அழிகின்ற வாயுவை நோக்கிடில்

நாமே உறைகின்ற நன்மை அளித்திடும்

பூமேல் உறைகின்ற போதகம் வந்திடும்

தாமே உலகில் தலைவனும் ஆமே  3

தலைவ னிடம்வலம் சாதிப்பார் இல்லை

தலைவ னிடம்வலம் ஆயிடில் தையல்

தலைவ னிடம்வலம் தன்வழி அஞ்சில்

தலைவ னிடம்வலம் தன்வழி நூறே  4

ஏறிய ஆறினில் எண்பது சென்றிடும்

தேறிய ஏழிற் சிறக்கும் வகை எண்ணில்

ஆறு ஒரு பத்தாய் அமர்ந்த இரண்டையும் 

தேறியே நின்று தெளிய இவ் வகையே.  5

இவ்வகை எட்டும் இடம்பெற ஓடிடில்

அவ்வகை ஐம்பதே என்ன அறியலாம்

செவ்வகை ஒன்பதும் சேரவே நின்றிடின்

முவ்வகை யாம் அது முப்பத்து மூன்றே  6

மும்மூன்றும் ஒன்றும் முடிவுற நின்றிடில்

எண்மூன்றும் நாலும் இடவகை யாய்நிற்கும்

ஐம்மூன்றும் ஓடி அகலவே நின்றிடில்

பன்மூன்றொடு ஈராறு பார்க்கலும் ஆமே  7

பார்க்கலும் ஆகும் பகல்முப் பதும் ஆகில்

ஆக்கலும் ஆகும் அவ் ஆறிரண்டு உள் இட்டுப்

போக்கலும் ஆகும் புகல் அற ஒன்று எனில்

தேக்கலும் ஆகும் திருத்திய பத்தே  8

ஏய் இரு நாளும் இயல்புற ஓடிடில்

பாய் இரு நாலும் பகை அற நின்றிடும்

தேய்வுற மூன்றும் திகழவே நின்றிடில்

ஆயுரு ஆறு என்று அளக்கலும் ஆமே  9

அளக்கும் வகைநாலும் அவ்வழியே ஓடில்

விளக்கும் ஒருநாலும் மெய்ப்பட நிற்கும்

துளக்கும் வகை ஐந்தும் தூய்நெறி ஓடில்

களக்கம் அறமூன்றில் காணலும் ஆமே  10

காணலும் ஆகும் கருதிய பத்து ஓடில்

காணலும் ஆகும் கலந்த இரண்டையும்

காணலும் ஆகும் கலப்பற மூ ஐந்தேல் 

காணலும் ஆகும் கருத்துற ஒன்றே  11

கருதும் இருபதில் காண ஆறு ஆகும்

கருதிய ஐயைந்தில் காண்பது மூன்றாம்

கருதும் இருபதுடன் ஆறு காணில்

கருதும் இரண்டு எனக் காட்டலும் ஆமே  12

காட்டலும் ஆகும் கலந்த இருபத்து ஏழில்

காட்டலும் ஆகும் கலந்து எழும் ஒன்று எனக்

காட்டலும் ஆகும் கலந்த இருபத்து எட்டில்

காட்டலும் ஆகும் கலந்த ஈரைந்தே  13

ஈரைந்தும் ஐந்தும் இருமூன்றும் எட்டுக்கும்

பார் அஞ்சி நின்ற பகைபத்து நாள் ஆகும்

வாரம்செய் கின்ற வகை ஆறஞ்சு ஆமாகில்

ஓர் அஞ்சொடு ஒன்று ஒன்று என ஒன்றும்  நாளே  14

ஒன்றிய நாள்கள் ஒருமுப்பத்து ஒன்று ஆகில்

கன்றிய நாலுங் கருத்துற மூன்று ஆகும்

சென்று உயிர் நால் எட்டும் சேரவே நின்றிடின்

மன்று இயல்பு ஆகும்  மனையில் இரண்டே  15

மனையில்ஒன் றாகும் மாதமும்  மூன்றும்

சுனையில்ஒன் றாகத் தொனித்தனன் நந்தி

வினையற வோங்கி வெளிசெய்து நின்றால்

தனையுற நின்ற தலைவனும் ஆமே  16

ஆரும் அறியார் அளக்கின்ற வன்னியை

ஆரும் அறியார் அளக்கின்ற வாயுவை

ஆரும் அறியார் அழிகின்ற அப்பொருள்

ஆரும் அறியார் அறிவு அறிந் தேனே  17

அறிவது வாயுவொடு ஐந்று அறிவு ஆய

அறிவு ஆவதுதான் உலகு உயிர் அத்தின்

பிறிவுசெய் யாவகை பேணி உள் நாடின்

செறிவது நின்று திகழும் அதுவே  18

அது அருளும் மருள் ஆனது உலகம்

பொது அருளும் புகழாளர்க்கு நாளும்

மது அரு ளும்மலர் மங்கையர் செல்வி

இது அருள் செய்யும் இறையவன் ஆமே  19

பிறப்பு அது சூழ்ந்த பெருந்தகை நந்தி

குறிப்பு அது கூடிய கோலக் குரம்பைப்

பழப்பதி ஆவது பற்று அறும் பாசம்

அழப்படி செய்வார்க்கு அகலும்  மதியே  20