3.18 - கேசரி யோகம்

                                            

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	18
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	18. கேசரி யோகம்
பிற குறிப்புகள்	மேல் நோக்கிய பார்வையை செலுத்தி செய்யும் யோகம். இதனால், வானத்தில் செல்லும் ஆற்றல் பெறுவர் என்பது

திருச்சிற்றம்பலம்

கட்டக் கழன்று கீழ்நான்று வீழாமல்

அட்டத்தைக் கட்டி அடுப்பை அணைகோலி

விட்டத்தைப் பூட்டி மேற்பையைத் தாள்கோத்து

நட்டம் இருக்க நமன் இல்லை தானே  1

வண்ணான் ஒலிக்கும்  சதுரப் பலகைமேற்

கண் ஆறு மோழை படாமற் கரைகட்டி

விண் ஆறு பாய்ச்சிக் குளத்தை நிரப்பினால்

அண்ணாந்து பார்க்க அழுக்கு அற்ற வாறே  2

இடக்கை வலக்கை இரண்டையும் மாற்றித்

துதிக்கையால் உண்பார்க்குச் சோரவும் வேண்டாம்

உறக்கத்தை நீக்கி உணரவல் லார்க்கட்கு

இறக்கவும் வேண்டாம் இருக்கலும் ஆமே  3

ஆய்ந்து உரை செய்யில் அமுதநின்று ஊறிடும்

வாய்ந்து உரை செய்யும் வருகின்ற காலத்து

நீந்து உரை செய்யில் நிலாமண் டலமம் ஆய்

பாய்ந்து உரை செய்தது பாலிக்கு மாறே  4

நாவின் நுனியை நடுவே விசிறிடில்

சீவனும் அங்கே சிவனும் உறைவிடம்

மூவரு முப்பத்து மூவரும்உருத்திர புவனத்தில் உள்ள உருத்திரர்-11; சூரியர்-12; அசுவனிதேவர்-2; வசுக்கள்-8 ஆக முப்பத்து மூன்று தேவர் தோன்றுவர்

சாவதும் இல்லை சதகோடி ஊனே  5

ஊன் ஊறல் பாயும் உயர்வரை உச்சிமேல்

வான் ஊறல் பாயும் வகை அறி வார் இல்லை

வான் ஊறல் பாயும் வகை அறி வாளர்க்குத்

தேன் ஊறல் உண்டு தெளியலும் ஆமே  6

மேலை அண்ணாவில் விரைந்து இரு கால் இடில்

காலனும் இல்லை கதவும் திறந்திடும்

ஞாலம் அறிய நரைதிரை மாறிடும்

பாலனும் ஆவான் பராநந்தி ஆணையே  7

நந்தி முதலாக நாமேலே ஏறிட்டுச்

சந்தித்து இருக்கில் தரணி முழுது ஆளும்

பந்தித்து இருக்கும் பகலோன் வெளியாகச்

சிந்தித்து இருப்பவர் தீவினை யாளரே  8

தீவினை யாடத் திகைத்து அங்கு இருந்தவர்

நாவினை நாடின் நமனுக்கு இடம் இல்லை

பாவினை நாடிப் பயன் அறக் கண்டவர்

தேவினை ஆடிய தீங்கரும்பு ஆமே  9

தீங்கரும்பு ஆகவே செய்தொழில் உள்ளவர்

ஆங்கரும்பு ஆக அடையநா ஏறிட்டுக்

கோங்கு அரும்பு ஆகிய கோணை நிமிர்த்திட

ஊங்கரும்பு ஆகிய ஊனீர் வருமே  10

ஊனீர் வழியாக உள் நாவை ஏறிட்டு

தேன் நீர் பருகிச் "சிவாய நம" என்று

கான் நீர் வரும்வழி கங்கை தருவிக்கும்

வான் நீர் வரும்வழி வாய்ந்து அறிவீரே  11

வாய்ந்தறிந்து உள்ளே வழிபாடு செய்தவர்அக வழிபாடு செய்தவர்

காய்ந்த அறிவு ஆகக் கருணை பொழிந்திடும்

பாய்ந்து அறிந்து உள்ளே படிக்கதவு ஒன்று இட்டுக்

கோய்ந்து அறிந்து உள் உறை கோயிலும் ஆமே  12

கோயிலின் உள்ளே குடிசெய்து வாழ்பவர்

தாயினும் நல்லார் தரணி முழுதுக்கும்

காயினும் நல்லவர் காய்ந்தவர் தம்முளும்

தீயினும் தீயரத் தீவினை யாளர்க்கே  13

தீவினை யாளர்த்தம்  சென்னியில் உள்ளவன்

பூவினை யாளர்தம் பொற்பதி ஆனவன்

பாவினை யாளர்தம் பாகவத்துள் உள்ளவன்

மாவினை யாளர்தம் மதியில் உள்ளானே  14

மதியினின் எழும் கதிர் போலப் பதினாறாய்ப்

பதிமனை நூறு நூற் றிருபத்து நாலாய்க்

கதிமனை உள்ளே கணைகள் பரப்பி

எதிர்மலை யாமல் இருந்தனன் தானே  15

இருந்தனள் சத்தியும் அக்கலை சூழ

இருந்தனள் கன்னியும் அந் நடுவாக

இருந்தனள் மான் நேர்முகம் நில ஆர

இருந்தனள் தானும் அமுதம் பொழிந்தே  16

பொழிந்த இருவெள்ளி பொன்மண் அடையில்

வழிந்து உள்ளிருந்து வான்முதல் அங்குக்

கழிந்து அது  போகாமல் காக்கவல் லார்க்குக்

கொழுந்து அது ஆகும் குணம் அது தானே  17

குணம் அது ஆகிய கோமள வல்லி

மணம் அது ஆக மகிழ்ந்து அங்கு இருக்கில்

தனம் அது ஆகிய தத்துவ ஞானம்

இனம் அது ஆக இருந்தனன் தானே  18

இருந்த பிராணனும் உள்ளே எழுமாம்

பரிந்த இத் தண்டுடன் அண்டம் பரிய

விரிந்த அப் பூவுடன் மேல் எழ வைக்கின்

மலர்ந்தது மண்டலம் வாழலும் ஆமே  19

மண்டலத் துள்ளே மன ஒட்டி யாணத்தைக்

கண்டு அகத்து அங்கே கருதியே கீழ்க்கட்டிப்

பண்டு அகத்து உள்ளே பகலே ஒளி ஆகக்

குண்டலக் காதனும் கூத்து ஒழிந் தானே  20

ஒழிகின்ற வாயுவும் உள்ளே அமருங்

கழிகின்ற வாயுவும் காக்கலும் ஆகும்

வழிகின்ற காலத்து வட்டக் கழலைப்

பழிக்கின்ற காலத்துப் பை அகற் றீரே  21

பையினின் உள்ளே படிக்கதவு ஒன்று இடின்

மெய்யினின் உள்ளே விளங்கும் ஒளியதாம்

கையினுள் வாயுக் கதித்து அங்கு எழுந்திடின்

மை அணி கோயில் மணிவிளக்கு ஆமே  22

விளங்கிடும் வாயுவை மேல் எழ உன்னி

நலங்கிடும்  கண்டத்து நாடியின் உள்ளே

வணங்கிடும்  மண்டலம் வாய்த்திடக் கும்பிச்

சுணங்கிட நின்று அவை சொல்லலும் ஆமே  23

சொல்லலும் ஆயிடும்  மாகத்து வாயுவும்

சொல்லலும் ஆகும் அணல், நீர்  கடினமும்

சொல்லலும் ஆகும் இவை அஞ்சும்  கூடிடின்

சொல்லலும் ஆம் தூர தரிசனம்  தானே  24

தூர தரிசனம்  சொல்லுவன் காணல் ஆம்

கார் ஆரும்  கண்ணி கடைஞானம் உட்பெய்து

தேர் ஆரும்  தீபத்து எழில் சிந்தை வைத்திடின்

பார் ஆர் உலகம் பகல் முன்னது ஆமே  25

முன் எழு நாபிக்கு முந்நால் விரற்கீழே

பன் எழு வேதம்  பகல் ஒளி உண்டு என்னும்

நன் எழு நாதத்து நல் தீபம் வைத்திடத்

தன் எழு கோயில் தலைவனும் ஆமே  26