திரு வாழ்கொளிபுத்தூர்

                                                                                      ௨ 

ஞானசம்பந்த மூர்த்தி சுவாமிகள்  அருளிச்செய்த
முதலாம் திருமுறை

தகவல் பலகை	விவரம்
தலம்	திருவாழ்கொளிபுத்தூர்
ஊர்/வேறு பெயர்	திருவாளப்புத்தூர்
நாடு	சோழ (காவிரி வட)
ॐசுவாமி	மாணிக்கவண்ணர் , இரத்தினபுரீஸ்வரர்
ॐஅம்பிகை	வண்டமர் பூங்குழலி, பிரம குந்தலாம்பாள்
பாடியவர்கள்	சம்பந்தர்   (2)         பொடி உடை மார்பினர் (1-40)         சாகை ஆயிரம் உடையார் (2-94) சுந்தரர் (1)         தலைக்கலன் தலை (7-57)
ஸ்தல மரம்	வாகை
தீர்த்தம்	பிரம தீர்த்தம்
பண்	தக்க ராகம்
குறிப்புகள்	அர்ச்சுனர், திருமால் வண்டு வழிபட்டது.
பதிக பலன்	துயர் எளிதில் தீரும்
வரிசை எண்.	40                                                            29/63

திருச்சிற்றம்பலம்

பொடியுடை மார்பினர் போர்விடை ஏறிப்
          பூத கணம்புடை சூழக்
கொடியுடை ஊர்திரிந்து ஐயம்
          கொண்டு பலபல கூறி
வடிவுடை வாள்நெடும் கண்ணுமை பாகம்
          ஆயவன் வாழ்கொளி புத்தூர்க்
கடிகமழ் மாமலர் இட்டுக்
          கறைமிடற் றான் அடி காண்போம்.  1

அரைகெழு கோவண ஆடையின் மேல் ஓர்
          ஆடர வம் அசைத்து ஐயம்
புரைகெழு வெண்தலை ஏந்திப்
          போர்விடை யேறிப் புகழ
வரைகெழு மங்கையது ஆகம் ஓர் பாகம்
          ஆயவன் வாழ்கொளி புத்தூர்
விரைகமழ்  மாமலர் தூவி
          விரிசடை யான் அடி சேர்வோம்.  2

பூண்நெடு நாகம் அசைத்து அனல் ஆடிப்
          புன் தலை அங்கையில் ஏந்தி
ஊண்இடு பிச்சை ஊர் ஐயம்
          உண்டி என்று பல கூறி
வாள் நெடும்  கண்ணுமை மங்கை ஓர் பாகம்
          ஆயவன் வாழ்கொளி புத்தூர்த்
தாள்நெடு மாமலர் இட்டுத்
          தலைவன தாள் நிழல் சார்வோம்.அடைக்கலம் ஆதலை குறிக்கிறது.   3

தார் இடு கொன்றை ஓர் வெண்மதி கங்கை
          தாழ்சடை மேல் அவை சூடி
ஊர் இடு பிச்சைகொள் செல்வம்
          உண்டி என்று பல கூறி
வார் இடு மென் முலை மாது ஒரு பாகம்
          ஆயவன் வாழ்கொளி புத்தூர்க்
கார் இடு மாமலர் தூவிக்
          கறைமிடற்றான் அடி காண்போம்.  4

கனமலர்க் கொன்றை அலங்கல் இலங்கக்
          காதில் ஓர் வெண்குழை யோடு
புனமலர் மாலை புனைந்து ஊர்
          புகுதி என்றே பல கூறி
வனமுலை மாமலை மங்கை ஓர் பாகம்
          ஆயவன் வாழ்கொளி புத்தூர்
இனமலர் ஏய்ந்தன தூவி
          எம் பெருமான் அடி சேர்வோம்.  5

அளைவளர் நாகம் அசைத்து அனல் ஆடி
          அலர்மிசை அந்தணன் உச்சிக்
களைதலை யில் பலி கொள்ளும்
          கருத்தனே கள்வனே என்னா
வளை ஒலி முன்கை மடந்தை ஓர் பாகம்
          ஆயவன் வாழ்கொளி புத்தூர்த்
தளை அவிழ் மாமலர் தூவித்
          தலைவன தாளிணை சார்வோம்.  6

அடல் செவி வேழத்தின் ஈருரி போர்த்து
          வழிதலை அங்கையில் ஏந்தி
உடல் இடு பிச்சையோடு ஐயம்
          உண்டி என் றுபல கூறி
மடல்நெடு மாமலர்க் கண்ணி ஓர் பாகம்
          ஆயவன் வாழ்கொளி புத்தூர்த்
தடமலர் ஆயின தூவித்
          தலைவன தாள்நிழல் சார்வோம்.  7

உயர்வரை ஒல்க எடுத்த அரக்கன்
          ஒளிர் கடகக்கை அடர்த்து
அயல் இடு பிச்சையோடு ஐயம்
          ஆர்தலை என்று அடி போற்றி
வயல்விரி நீல நெடுங்கணி பாகம்
          ஆயவன் வாழ்கொளி புத்தூர்ச்
சயவிரி மாமலர் தூவி
          தாழ்சடை யான் அடி சார்வோம்.  8

கரியவன் நான்முகன் கைதொழுது ஏத்தக்
          காணலும் சாரலும் ஆகா
எரி உருவாகி ஊர் ஐயம்
          இடுபலி உண்ணி என்று ஏத்தி
வரியர வல்குல் மடந்தை ஓர் பாகம்
          ஆயவன் வாழ்கொளி புத்தூர்
விரிமலர் ஆயின தூவி
          விகிர்தன சேவடி சேர்வோம்.  9

குண்டு அமணர் துவர்க் கூறைகள் மெய்யில் 
          கொள்கையி னார்புறம் கூற
வெண் தலையில் பலி கொண்டல்
          விரும்பினை என்று விளம்பி
வண்டு அமர் பூங்குழல் மங்கை ஓர் பாகம்
          ஆயவன் வாழ்கொளி புத்தூர்த்
தொண்டர்கள் மாமலர் தூவத்
          தோன்றிநின் றான் அடி சேர்வோம்.  10

கல்லுயர் மாக்கடல் நின்று முழங்கும்
          கரைபொரு காழிய மூதூர்
நல்லுயர் நான்மறை நாவின்
          நற்றமிழ் ஞானசம் பந்தன்
வல்லுயர் சூலமும் வெண்மழு வாளும்
          வல்லவன் வாழ்கொளி புத்தூர்ச்
சொல்லிய பாடல்கள் வல்லார்
          துயர்கெடு தல்எளி தாமே..  11

திருச்சிற்றம்பலம்