திரு வாழ் கொளி புத்தூர்

                                                                                             ௨ 

சுந்தரமூர்த்தி சுவாமிகள்  அருளிச்செய்த
ஏழாம் திருமுறை

தகவல் பலகை	விவரம்
தலம்	திருவாழ்கொளிபுத்தூர்
ஊர்/வேறு பெயர்	திருவாளப்புத்தூர்
நாடு	சோழ (காவிரி வட)
ॐசுவாமி	மாணிக்கவண்ணர் , இரத்தினபுரீஸ்வரர்
ॐஅம்பிகை	வண்டமர் பூங்குழலி, பிரம குந்தலாம்பாள்
பாடியவர்கள்	சம்பந்தர்   (2)         பொடி உடை மார்பினர் (1-40)         சாகை ஆயிரம் உடையார் (2-94) சுந்தரர் (1)         தலைக்கலன் தலை (7-57)
ஸ்தல மரம்	வாகை
தீர்த்தம்	பிரம தீர்த்தம்
பண்	தக்கேசி
குறிப்புகள்	அர்ச்சுனர், திருமால் வண்டு வழிபட்டது.
பதிக பலன்	செய்த பாவங்கள் மறையும்.
வரிசை எண்.	57                                                            29/63

திருச்சிற்றம்பலம்

தலைக்க லன் தலை மேல்தரித் தானைத்
          தன்னை என்னைநினைக் கத்தரு வானைக்
கொலைக்கை யானைஉரி போர்த்து உகந் தானைக்
          கூற்று உதைத் தகுரை சேர்கழ லானை
அலைத்த செங்கண்விடை ஏறவல் லானை
          ஆணை யால்அடி யேன்அடி நாயேன்
மலைத்தசெந் நெல்வயல் வாழ்கொளி புத்தூர்
          மாணிக்கத்தை மறந்து என்நினைக் கேனே.  1

படைக்கண் சூலம் பயிலவல் லானைப்
          பாவிப் பார்மனம் பாவிக்கொண் டானைக்
கடைக்கட் பிச்சைக்கு இச்சை காதலித் தானைக்
          காமன் ஆகந்தனைக் கட்டழித் தானைச்
சடைக்கட் கங்கையைத் தாழவைத் தானைத்
          தண்ணீர்மண் ணிக்கரை யானைத்தக் கானை
மடைக்கண்நீ லம்அலர் வாழ்கொளி புத்தூர்
          மாணிக்கத் தைமறந்து என்நினைக் கேனே.  2

வெந்த நீறுமெய் பூசவல் லானை
          வேத மால்விடை ஏறவல் லானை
அந்தம் ஆதிஅறிதற்கு அரி யானை
          ஆறலைத் தசடை யானைஅம் மானைச்
சிந்தை என் தடு மாற்று அறுப் பானைத்
          தேவ தேவன் என் சொல்முனி யாதே
வந்து என் உள்ளம்புகும் வாழ்கொளி புத்தூர்
          மாணிக்கத் தைமறந்து என்நினைக் கேனே.  3

தடங்கை யால்மலர் தூய்த்து எழு வாரைத்
          தன்னடிக் கேசெல்லு மாறுவல் லானைப்
படங்கொள் நாகம்அரை ஆர்த்து உகந் தானைப்
          பல்லின்வெள் ளைத்தலை ஊண் உடை யானை
நடுங்க ஆனைஉரி போர்த்து உகந் தானை
          நஞ்சம் உண்டு கண்டம் கறுத் தானை
மடந்தை பாகனை வாழ்கொளி புத்தூர்
          மாணிக்கத்தை மறந்து என்நினைக் கேனே.  4

வளைக்கை முன்கைமலை மங்கை மணாளன்
          மார னார்உடல் நீறெழச் செற்றுத்
துளைத்த அங்கத்தொடு தூமலர்க் கொன்றை
          தோலும்நூ லும் துதைந் தவரை மார்பன்
திளைக்கும் தெவ்வர் திரிபுரம் மூன்றும்
          அவுணர் பெண்டிரும் மக்களும் வேவ
வளைத்த வில்லியை வாழ்கொளி புத்தூர்
          மாணிக்கத் தைமறந்து என் நினைக் கேனே.  5

திருவின் நாயகன் ஆகிய மாலுக்கு 
          அருள்கள் செய்திடும் தேவர் பிரானை
உருவி னானை ஒன்றா அறி ஒண்ணா
          மூர்த்தி யைவிச யற்கு அருள் செய்வான்
செருவில் ஏந்தி ஓர் கேழற்பின் சென்று
          செங்கண் வேடனாய் என்னொடும் வந்து
மருவி னான் தனை வாழ்கொளி புத்தூர்
          மாணிக்கத்தை மறந்து என்நினைக் கேனே.  6

எந்தை யைஎந்தை தந்தை பிரானை
          ஏத மாய இடர் தீர்க்க வல் லானை
முந்தி யாகிய மூவரின் மிக்க
          மூர்த்தி யைமுதற் காண்பரி யானைக்
கந்தின் மிக்ககரி யின்மருப் போடு
          கார கில்கவ ரிம்மயிர் மண்ணி
வந்து வந்திழி வாழ்கொளி புத்தூர்
          மாணிக்கத்தை மறந்து என்நினைக் கேனே.  7

தேனை ஆடிய கொன்றையி னானைத்
          தேவர் கைதொழும் தேவர் பிரானை
ஊனம் ஆயின தீர்க்க வல்லானை
          ஒற்றை ஏற்றனை நெற்றிக்கண் ணானைக்
கான ஆனையின் கொம்பினைப் பீழ்ந்த
          கள்ளப் பிள்ளைக்கும் காண்பரி தாய
வான நாடனை வாழ்கொளி புத்தூர்
          மாணிக்கத் தைமறந்து என்நினைக் கேனே.  8

காளை யாகி வரையெடுத் தான் தன்
          கைகள் இற்றவன் மொய்தலை எல்லாம்
மூளை போத ஒருவிரல் வைத்த
          மூர்த்தி யைமுதல் காண்பரி யானைப்
பாளை தெங்கு பழம்விழ மண்டிச்
          செங்கண் மேதிகள் சேடெறிந் தெங்கும்
வாளை பாய்வயல் வாழ்கொளி புத்தூர்
          மாணிக்கத் தைமறந் தென்நினைக் கேனே.  9

திருந்த நான்மறை பாடவல் லானைத்
          தேவர்க் கும் தெரிதற்கு அரி யானைப்
பொருந்த மால்விடை ஏறவல் லானைப்
          பூதிப் பைபுலித் தோல் உடை யானை
இருந்து உண் தேரரும் நின்று உணும் சமணும்
          ஏச நின்றவன் ஆருயிர்க்கு எல்லாம்
மருந்த னான் தனை வாழ்கொளி புத்தூர்
          மாணிக்கத்தை மறந்து என்நினைக் கேனே.  10

மெய்யனை மெய்யின் நின்று உணர் வானை
          மெய் இலாதவர் தங்களுக்கு எல்லாம்
பொய்ய னைப்புரம் மூன்று எரித் தானைப்
          புனித னைப்புலித் தோல் உடை யானைச்
செய்ய னைவெளி யதிரு நீற்றில்
          திகழு மேனியன் மான்மறி ஏந்தும்
மைகொள் கண்டனை வாழ்கொளி புத்தூர்
          மாணிக்கத் தைமறந்து என் நினைக் கேனே.  11

வளங்கி ளர்பொழில் வாழ்கொளி புத்தூர்
          மாணிக்கத் தைமறந்து என்நினைக் கேன் என்று 
உளம் குளிர் தமிழ் ஊரன்வன் தொண்டன்
          சடையன் காதலன் வனப்பகை அப்பன்
நலங்கி ளர்வயல் நாவலர் வேந்தன்
          நங்கை சிங்கடி தந்தை பயந்த
பலங்கி ளர்தமிழ் பாடவல் லார்மேல்
          பறையு மாம் செய்த பாவங்கள் தானே.  12

திருச்சிற்றம்பலம்