திரு வாழ் கொளி புத்தூர்

                                                                          ௨ 

ஞானசம்பந்த மூர்த்தி சுவாமிகள்  அருளிச்செய்த
இரண்டாம்  திருமுறை

தகவல் பலகை	விவரம்
தலம்	திருவாழ்கொளிபுத்தூர்
ஊர்/வேறு பெயர்	திருவாளப்புத்தூர்
நாடு	சோழ (காவிரி வட)
ॐசுவாமி	மாணிக்கவண்ணர் , இரத்தினபுரீஸ்வரர்
ॐஅம்பிகை	வண்டமர் பூங்குழலி, பிரம குந்தலாம்பாள்
பாடியவர்கள்	சம்பந்தர்   (2)         பொடி உடை மார்பினர் (1-40)         சாகை ஆயிரம் உடையார் (2-94) சுந்தரர் (1)         தலைக்கலன் தலை (7-57)
ஸ்தல மரம்	வாகை
தீர்த்தம்	பிரம தீர்த்தம்
பண்	பியந்தை காந்தாரம்
குறிப்புகள்	அர்ச்சுனர், திருமால் வண்டு வழிபட்டது.
பதிக பலன்	நற் சிந்தனை பெற்று சிவஞானம் பெறுவர்
வரிசை எண்.	94                                                            29/63

திருச்சிற்றம்பலம்

சாகை ஆயிர முடையார்
          சாமமும் ஓதுவது உடையார்
ஈகை யார்கடை நோக்கி
          இரப்பதும் பலபல உடையார்
தோகை மாமயில் அனைய
          துடியிடை பாகமும் உடையார்
வாகை நுண்துளி வீசும்
          வாழ்கொளி புத்தூர் உளாரே.  1

எண்ணில் ஈரமும் உடையார்
          எத்தனை யோர் இவர் அறங்கள்
கண்ணும் ஆயிரம் உடையார்
          கையும் ஓராயிரம் உடையார்
பெண்ணும் ஆயிரம் உடையார்
          பெருமை ஓராயிரம் உடையார்
வண்ணம் ஆயிரம் உடையார்
          வாழ்கொளி புத்தூர் உளாரே.  2

நொடி ஓராயிரம் உடையார்
          நுண்ணியராம் அவர் நோக்கும்
வடிவும் ஆயிரம் உடையார்
          வண்ணமும் ஆயிரம் உடையார்
முடியும் ஆயிரம் உடையார்
          மொய்குழ லாளையும் உடையார்
வடிவும் ஆயிரம் உடையார்
          வாழ்கொளி புத்தூர் உளாரே.  3

பஞ்சி நுண் துகில் அன்ன
          பைங்கழல் சேவடி உடையார்
குஞ்சி மேகலை உடையார்
          கொந்தணி வேல்வலன் உடையார்
அஞ்சும் வென்றவர்க்கு அணியார்
          ஆனையின் ஈருரி உடையார்
வஞ்சி நுண்ணிடை உடையார்
          வாழ்கொளி புத்தூர் உளாரே.  4

பரவு வாரையும் உடையார்
          பழித்திகழ் வாரையும் உடையார்
விரவு வாரையும் உடையார்
          வெண் தலைப் பலிகொள்வது உடையார்
அரவம் பூண்பதும் உடையார்
          ஆயிரம் பேர்மிக உடையார்
வரமும் ஆயிரம் உடையார்
          வாழ்கொளி புத்தூர் உளாரே.  5

தண்டுந் தாளமும் குழலும்
          தண்ணுமைக் கருவியும் புறவில்
கொண்ட பூதமும் உடையார்
          கோலமும் பலபல உடையார்
கண்டு கோடலும் அரியார்
          காட்சியும் அரியதோர் கரந்தை
வண்டு வாழ்பதி உடையார்
          வாழ்கொளி புத்தூர் உளாரே.  6

மான வாழ்க்கையது உடையார்
          மலைந்தவர் மதில் பரிசு அறுத்தார்
தான வாழ்க்கை அது உடையார்
          தவத்தொடு நாம்புகழ்ந்து ஏத்த
ஞான வாழ்க்கை அது உடையார்
          நள்ளிருள் மகளிர்நின்று ஏத்த
வான வாழ்க்கை அது உடையார்
          வாழ்கொளி புத்தூர் உளாரே.  7

ஏழு மூன்றும் ஓர் தலைகள்
          உடையவன் இடர்பட அடர்த்து
வேழ்வி செற்றதும் விரும்பி
          விருப்பவர் பலபல உடையார்
கேழல் வெண்பிறை அன்னகெழுமணி
          மிடறுநின்று இலங்க
வாழி சாந்தமும் உடையார்
          வாழ்கொளி புத்தூர் உளாரே.  8

வென்றி மாமல ரோனும்
          விரிகடல் துயின்றவன் தானும்
என்றும் ஏத்துகை உடையார்
          இமையவர் துதிசெய விரும்பி
முன்றில் மாமலர் வாசம்
          முதுமதி தவழ்பொழில் தில்லை
மன்றில் ஆடலது உடையார்
          வாழ்கொளி புத்தூர் உளாரே.  9

மண்டை கொண்டுழல் தேரர்
          மாசுடை மேனிவன் சமணர்
குண்டர் பேசிய பேச்சுக்
          கொள்ளன்மின் திகழ் ஒளி நல்ல
துண்ட வெண்பிறை சூடிச்
          சுண்ணவெண் பொடி அணிந்து எங்கும்
வண்டு வாழ்பொழில் சூழ்ந்த
          வாழ்கொளி புத்தூர் உளாரே.  10

நலங்கொள் பூம்பொழிற் காழி
          நற்றமிழ் ஞான சம்பந்தன்
வலங்கொள் வெண்மழு வாளன்
          வாழ்கொளி புத்தூர் உளானை
இலங்கு வெண்பிறை யானை
          ஏத்திய தமிழ் இவை வல்லார்
நலம் கொள் சிந்தையர் ஆகி
          நன்னெறி எய்துவர் தாமே.  11

திருச்சிற்றம்பலம்