திருப்பருப்பதம்

      

௨ 

திருஞானசம்பந்தர் சுவாமிகள் அருளிச்செய்த
முதலாம்   திருமுறை

தகவல் பலகை	விவரம்
தலம்	திருப்பருப்பதம்
ஊர் /வேறு பெயர்	பூகயிலாயம்
நாடு	வட நாடு
ॐசுவாமி	மல்லிகார்ஜுனர், பருப்பதநாயகர்
ॐஅம்பிகை	பிரமராம்பிகை, பருப்பதநாயகி
பாடியவர்கள்	திருஞானசம்பந்தர்(1),         சுடுமணி உமிழ் நாகம் (1-118) திருநாவுக்கரசர்(1),         கன்றினார் புரங்கள் (4-58) சுந்தரர்(1)         மானும்மரை இனமும் மயில் (7-79)
ஸ்தல மரம்	மருதமரம்
தீர்த்தம்	பர்வத தீர்த்தம்
பண்	வியாழக்குறிஞ்சி
குறிப்புகள்	12 ஜோதிர் லிங்க தலத்தில் ஒன்று. மருத மரத்தை தலமரமாக கொண்ட தலங்கள் மூன்றினுள் ஒன்று சிலாத முனிவர் தவம் செய்த திருத்தலம். நந்தி தேவர் தவம் செய்து வாகனப் பேறு பெற்றார். சுவாமி மலையின்மேல் வீற்றிருந்து அருள்பாலிக்கிறார்.
பதிக பலன்	தவம் கைகூடும்.
வரிசை எண்.	118                                                                  1/5

திருச்சிற்றம்பலம்

சுடுமணி உமிழ்நாகம் சூழ்தர அரைக்கு அசைத்தான்
இடுமணி எழிலானை ஏறலன் எருது ஏறி
விடமணி மிடறுடையான் மேவிய நெடுங்கோட்டுப்
படுமணி விடுசுடரார் பருப்பதம் பரவுதுமே.  1  

நோய்புல்கு தோல்திரைய நரைவரு நுகர் உடம்பில்
நீபுல்கு தோற்றம் எல்லாம் நினை உள்கு மடநெஞ்சே!
வாய்புல்கு தோத்திரத்தால் வலஞ்செய்து தலைவணங்கிப்
பாய்புலித் தோலுடையான் பருப்பதம் பரவுதுமே.  2  

துனியுறு துயர்தீரத் தோன்றியோர் நல்வினையால்
இனியுறு பயன் ஆதல் இரண்டுற மனம்வையேல்
கனியுறு மரமேறிக் கருமுசுக் கழையுகளும்
பனியுறு கதிர்மதியான் பருப்பதம் பரவுதுமே.  3  

கொங்கணி நறுங்கொன்றைத் தொங்கலன் குளிர்சடையான்
எங்கள்நோய் அகலநின்றான் என அருள் ஈசனிடம்
ஐங்கணை வரிசிலையான் அநங்கனை அழகழித்த
பைங்கண்வெள் ஏறு உடையான் பருப்பதம் பரவுதுமே.  4  

துறைபல சுனைமூழ்கித் தூமலர் சுமந்து ஓடி
மறை ஒலி வாய்மொழியால் வானவர் மகிழ்ந்து ஏத்தச்
சிறை ஒலி கிளிபயிலும் தேனினம் ஒலியோவா
பறைபடு விளங்கு அருவிப் பருப்பதம் பரவுதுமே.  5  

சீர்கெழு சிறப்பு ஓவாச் செய்தவ நெறிவேண்டில்
ஏர்கெழு மடநெஞ்சே இரண்டுற மனம்வையேல்
கார்கெழு நறுங்கொன்றைக் கடவுளது இடம்வகையால்
பார்கெழு புகழோவாப் பருப்பதம் பரவுதுமே.  6  

புடைபுல்கு படர்கமலம் புகையொடு விரைகமழத்
தொடைபுல்கு நறுமாலை திருமுடி மிசையேற
விடைபுல்கு கொடி ஏந்தி வெந்தவெண் நீறு அணிவான்
படைபுல்கு மழுவாளன் பருப்பதம் பரவுதுமே.  7  

நினைப்பு எனும் நெடுங்கிணற்றை நின்று நின்று அயராதே
மனத்தினை வலித்து ஒழிந்தேன் அவலம் வந்து அடையாமைக்
கனைத்தெழு திரள்கங்கை கமழ்சடைக் கரந்தான்தன்
பனைத்திரள் பாய் அருவிப் பருப்பதம் பரவுதுமே.  8  

மருவிய வல்வினைநோய் அவலம்வந்து அடையாமல்
திருவுரு அமர்ந்தானும் திசைமுகம் உடையானும்
இருவரும் அறியாமை எழுந்த தோர் எரிநடுவே
பருவரை உநிமிர்ந்தான் பருப்பதம் பரவுதுமே.  9  

சடங்கொண்ட சாத்திரத்தார் சாக்கியர் சமண்குண்டர்
மடங்கொண்ட விரும்பியராய் மயங்கியோர் பேய்த்தேர்ப்பின்
குடங்கொண்டு நீர்க்குச்செல்வார் போதுமின் குஞ்சரத்தின்
படங்கொண்ட போர்வையினான் பருப்பதம் பரவுதுமே.  10  

வெண்செநெல் விளைகழனி விழவொலி கழுமலத்தான்
பண்செலப் பலபாடல் இசைமுரல் பருப்பதத்தை
நன்சொலி னால் பரவு ஞானசம் பந்தன்நல்ல
ஒண்சொலின் இவைமாலை   உரு எணத் தவம் ஆமே.

திருச்சிற்றம்பலம்