திருப்பந்தணை நல்லூர்

    

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருபந்தணைநல்லூர்
ஊர்
நாடு	காவிரி வடகரை (சோழ நாடு)
ॐசுவாமி	பசுபதீஸ்வரர்
ॐஅம்பிகை	வேணு புஜாம்பிகை
பாடியவர்கள்	திருஞானசம்பந்தர்(1),         இடறினார் கூற்றைப்  (3:121) திருநாவுக்கரசர்(1),         நோதங்கம் இல்லாதார்   (6:10)
ஸ்தல மரம்	சரக்கொன்றை
தீர்த்தம்	சூரிய தீர்த்தம்
பண்	திருத்தாண்டகம்
குறிப்புகள்	காமதேனு, திருமால், கண்வ முனிவர், வாலி, இந்திரன், பிரமன், சொசொரியன் முதலியோர் வழிபட்ட தலம்
பதிக பலன்	இறையருள்  பெற
வரிசை எண்.	10                                                              காவிரி (வ) -35/63

திருச்சிற்றம்பலம்

நோதங்கம் இல்லாதார் நாகம் பூண்டார்
நூல்பூண்டார் நூல்மேல் ஓர் ஆமை பூண்டார்
பேய்தங்கு நீள்காட்டில் நட்டம் ஆடிப்
பிறைசூடும்  சடைமேலோர் புனலும் சூடி
ஆதங்கு பைங்குழலாள் பாகம் கொண்டார்
அனல்கொண்டார் அந்திவாய் வண்ணம் கொண்டார்
பாதங்க நீறு ஏற்றார் பைங்கண் ஏற்றார்
பலி ஏற்றார் பந்தணை நல்லூ ராரே.  1  

காடலாற் கருதாதார் கடல்நஞ்சு உண்டார்
களிற்று உரிவை மெய்போர்த்தார் கலன் அதாக
ஓடலாற் கருதாதார் ஒற்றி யூரார்
உறுபிணியும் செறுபகையும் ஒற்றைக் கண்ணாற்
பீடுலாந் தனைசெய்வார் பிடவ மொந்தை
குடமுழவங் கொடுகொட்டி குழலும் ஓங்கப்
பாடலார் ஆடலார் பைங்கண் ஏற்றார்
பலிஏற்றார் பந்தணை நல்லூ ராரே.  2  

பூதப் படையுடையார் பொங்கு நூலார்
புலித்தோல் உடையினார் போர் ஏற்றினார்
வேதத் தொழிலார் விரும்ப நின்றார் 
விரிசடைமேல் வெண்திங்கள் கண்ணி சூடி
ஓதத்து ஒலிகடல்வாய் நஞ்சு உண்டார்
உம்பரோடு அம்பொன் உலகம் ஆண்டு
பாதத் தொடுகழலார் பைங்கண் ஏற்றார்
பலிஏற்றார் பந்தணை நல்லூ ராரே.  3  

நீருலாஞ் சடைமுடிமேல் திங்கள் ஏற்றார்
நெருப்பு ஏற்றார் அங்கையில் நிறையும் ஏற்றார்
ஊர் எலாம் பலி ஏற்றார் அரவம் ஏற்றார்
ஒலிகடல் வாய்நஞ்சம் மிடற்றில் ஏற்றார்
வாருலாம்  முலைமடவாள் பாகம் ஏற்றார்
மழுஏற்றார் மான்மறியோர் கையி ஏற்றார்
பாருலாம் புகழ் ஏற்றார் பைங்கண் ஏற்றார்                                                                            பலிஏற்றார் பந்தணை நல்லூ ராரே..  4  

தொண்டர் தொழுது ஏத்தும் சோதி ஏற்றார்
துளங்கா மணிமுடியார் தூய நீற்றார்
இண்டைச் சடைமுடியார் ஈமம் சூழ்ந்த 
இடுபிணக்காட்டுஆடலார் ஏமந் தோறும்
அண்டத்துக்கு அப்புறத்தார் ஆதி யானார்
அருக்கனா ஆரழலால்  அடியார் மேலைப்
பண்டை வினை அறுப்பார் பைங்கண்  ஏற்றார்
பலியேற்றார் பந்தணை நல்லூ ராரே.  5 

கடமன்னு களி யானை உ ரிவை போர்த்தார்
கானப்பேர் காதலார் காதல் செய்து
மடமன்னும் அடியார்தம் மனத்தின் உள்ளார்
மான் உரிதோல் மிசைத்தோளார் மங்கை காண
நடமன்னி ஆடுவார் நாகம் பூண்டார்
நான்மறையோடு ஆறு அங்கம் நவின்ற நாவார்
படமன்னு திருமுடியார் பைங்கண் ஏற்றார்
பலியேற்றார் பந்தணை நல்லூ ராரே.  6 

முற்றா மதிச்சடையார் மூவ ரானார்
மூவுலகு மேத்தும் முதல்வ ரானார்
கற்றார் பரவுங் கழலார் திங்கள்
கங்கையாள் காதலார் காம்பேய் தோளி
பற்றாகும் பாகத்தார் பால்வெண் ணீற்றார்
பான்மையா லூழி உலக மானார்
பற்றார் மதிலெரித்தார் பைங்க ஏற்றார்
பலிஏற்றார் பந்தணை நல்லூ ராரே.  7  

கண்ணமரும் நெற்றியார் காட்டார் நாட்டார்
கனமழுவாட் கொண்டதோர் கையார் சென்னிப்
பெண்ணம் அரும் சடைமுடியார் பேர் ஒன்று இல்லார்
பிறப்பு இலார் இறப்பு இலார் பிணி ஒன்று இல்லார்
மண்ணவரும் வானவரும் மற்றை யோரும்
மறையவரும் வந்து எதிரே வணங்கி ஏத்தப்
பண் அமரும் பாடலார் பைங்கண் ஏற்றார்

பலிஏற்றார் பந்தணை நல்லூ ராரே. 8  

ஏறு ஏறி ஏழ் உலகும் ஏத்த நின்றார்

இமையவர்கள் எப்பொழுதும் இறைஞ்ச நின்றார்
நீறு  ஏறுமேனியார் நீலம் உண்டார்
நெருப்பு உண்டார் அங்கை அனலும் உண்டார்
ஆறு ஏறு சென்னியார் ஆன் அஞ்சும் ஆடி
அனல் உமிழும் ஐவா யரவு மார்த்தார்
பாறேறு வெண்தலையார் பைங்கண் ஏற்றார்
பலிஏற்றார் பந்தணை நல்லூ ராரே.  9  

கல்லூர் கடிமதில்கள் மூன்று மெய்தார்
காரோணங் காதலார் காதல் செய்து
நல்லூரார் ஞானத்தார் ஞானம் ஆனார்
நான்மறையோடு ஆறு அங்கம் நவின்ற நாவார்
மல்லூர் மணிமலையின் மேலி ருந்து
வாள் அரக்கர் கோன் தலையை மாளச் செற்றுப்
பல்லூர் பலிதிரிவார் பைங்கண் ஏற்றார்
பலிஏற்றார் பந்தணை நல்லூ ராரே.

திருச்சிற்றம்பலம்