திருஆமாத்தூர்

   

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருஆமாத்தூர்
ஊர்
நாடு	நடு நாடு
ॐசுவாமி	அபிராமேஸ்வரர், அழகிய நாதர்
ॐஅம்பிகை	முக்த்தாம்பிகை, அழகிய நாயகி
பாடியவர்கள்	திருஞானசம்பந்தர்(2),         துன்னம்பெய் கோவணமும் (2:44)         குன்ற வார் சிலை (2:50) திருநாவுக்கரசர்(2),         மாமாத் தாகிய  மால் அயன் (5:44)         வண்ணங்கள் தாம் பாடி (6:09) சுந்தரர்(1)         காண்டனன் காண்டனன் (7:45)
ஸ்தல மரம்	வன்னிமரம்
தீர்த்தம்	ஆம்பலப்பொய்கை
பண்	திருத்தாண்டகம்
குறிப்புகள்	நந்தி, காமதேனு தவம் இயற்றி கொம்புகளைப் பெற்ற சிறப்புடைய தலம் இறைவனை காணீர் என்று சொல்லிய பதிகம்
பதிக பலன்	இறையருள்  பெற
வரிசை எண்.	7                                                               நடு நாடு -21/22

திருச்சிற்றம்பலம்

வண்ணங்கள் தாம்பாடி வந்து நின்று 
வலிசெய்து வளைகவர்ந்தார் வகையால் நம்மைக்
கண்ணம்பால் நின்று எய்து கனலப் பேசிக்
கடியதோர் விடைஏறிக் காபா லியார்
சுண்ணங்கள் தாம் கொண்டு துதையப் பூசித்
தோல் உடுத்து நூல்பூண்டு தோன்றத் தோன்ற
அண்ணலார் போகின்றார் வந்து காணீர்
அழகியரே ஆமாத்தூர் ஐய னாரே.  1  

வெந்தார்வெண் பொடிப்பூசி வெள்ளை மாலை 
விரிசடைமேற் றாஞ்சூடி வீணை ஏந்திக்
கந்தாரந் தாமுரலாப் போகா நிற்கக்
கறைசேர் மணிமிடற்றீ ர் ஊர் ஏது? என்றேன்
நொந்தார்போல் வந்து எனது இல்லே புக்கு
நுடங்கே ரிடைமடவாய் நம்மூர் கேட்கில்
அந்தா மரைமலர்மேல் அளிவண்டு யாழ்செய் 
ஆமாத்தூர் என்று அடிகள் போயி னாரே.  2  

கட்டங்கந் தாம் ஒன்று கையில் ஏந்திக்
கடிய விடைஏறிக் காபா லியார்
இட்டங்கள் தாம்பேசி இல்லே புக்கு
இடும்பலியும் இடக்கொள்ளார் போவார் அல்லர்
பட்டிமையும் படிறுமே பேசா நின்றார்
பார்ப்பாரைப் பரிசு அழிப்பார் போல்கின் றார்தாம்
அட்டிய சில்பலியுங் கொள்ளார் விள்ளார்
அழகியரே ஆமாத்தூர் ஐய னாரே.  3  

பசைந்தபல பூதத்தர் பாடல் ஆடல்
படநாகக் கச்சையர் பிச்சைக்கு என்று இங்கு
இசைந்ததோர் இயல்பினர் எரியின் மேனி 
இமையாமுக் கண்ணினர் நால்வே தத்தர்
பிசைந்ததிரு நீற்றினர் பெண்ணோர் பாகம் 
பிரிவு அறியாப் பிஞ்ஞகனார் தெண்ணீர்க் கங்கை
அசைந்த திருமுடியர் அங்கைத் தீயர்
அழகியரே ஆமாத்தூர் ஐய னாரே.  4  

உருளுடைய தேர்புரவி யோடும் யானை
ஒன்றாலுங் குறைவில்லை ஊர்தி வெள்ளேறு
இருளுடைய கண்டத்தர் செந்தீ வண்ணர்
இமையவர்கள் தொழுது ஏத்தும் இறைவ னார்தாம்
பொருளுடையர் அல்லர் இலரும் அல்லர்
புலித்தோல் உடையாகப் பூதம் சூழ
அருள் உடைய அங்கோதை மாலை மார்பர்
அழகியரே ஆமாத்தூர் ஐய னாரே.  5  

வீறுடைய ஏறு ஏறி நீறு பூசி
வெண்தோடு பெய்திடங்கை வீணை ஏந்திக்
கூறுடைய மடவாள் ஓர் பாகம்கொண்டு
குழையாடக் கொடுகொட்டி கொட்டா வந்து
பாறுடைய படுதலையோர் கையில் ஏந்திப்
பலிகொள்வார்அல்லர் படிறே பேசி
ஆறுடைய சடைமுடி எம் அடிகள் போலும்
அழகியரே ஆமாத்தூர் ஐய னாரே.  6  

கையோர் கபாலத்தர் மானின் தோலர்
கருத்துடையர் நிருத்தராய்க் காண்பார் முன்னே
செய்ய திருமேனி வெண்ணீறாடித்
திகழ்புன் சடைமுடிமேல் திங்கள் சூடி
மெய் ஒரு பாகத்து உமையை வைத்து 
மேவார் திரிபுரங்கள் வேவச் செய்து
ஐயனார் போகின்றார் வந்து காணீர்!
அழகியரே ஆமாத்தூர் ஐய னாரே.  7  

ஒன்றாலுங் குறைவில்லை ஊர்தி வெள்ளேறு 
ஒற்றியூர் உம் ஊரே உணரக் கூறீர்
நின்றுதான் என்செய்வீர் போவீர் ஆகில்
நெற்றிமேல் கண்காட்டி நிறையும் கொண்டீர்
என்றுந்தான் இவ்வகையே இடர்செய் கின்றீர்
இருக்கும் ஊர் இனி அறிந்தோம் ஏகம் பமோ
அன்றித்தான் போகின்றீர் அடிக ள் எம்மோடு 
அழகியரே ஆமாத்தூர் ஐய னாரே.  8  

'கல்லலகு' தாம்கொண்டு காளத் தியார்
கடியவிடை ஏறிக் காணக் காண
இல்லமே தாம்புகுதா இடுமின் பிச்சை
என்றாருக்கு எதிர் எழுந்தேன் எங்கும் காணேன்
சொல்லாதே போகின்றீர் "உம் ஊர் ஏது?"
துருத்தி, பழனமோ, நெய்த்தானமோ,
அல்லலே செய்தடிகள் போகின் றார்தாம்
அழகியரே ஆமாத்தூர் ஐய னாரே.  9  

மழுங்கலா நீறாடும் மார்பர் போலும்
மணிமிழலை மேய மணாளர் போலும்
கொழுங்குவளைக் கோதைக்குக் இறைவர் போலும்
கொடுகொட்டி தாளம் உடையார் போலும்
செழுங்கயி லாயத்து எம் செல்வர் போலும்
தென் அதிகை வீரட்டம் சேர்ந்தார் போலும்
அழுங்கினார் ஐயுறவு தீர்ப்பார் போலும்
அழகியரே ஆமாத்தூர் ஐய னாரே.

திருச்சிற்றம்பலம்