திரு இன்னம்பர்

             

௨ 

திருநாவுக்கரசர் சுவாமிகள் அருளிச்செய்த
ஐந்தாம்  திருமுறை

தகவல் பலகை	விவரம்
தலம்	திரு இன்னம்பர்
ஊர்
நாடு	சோழ (காவிரி வட)
ॐசுவாமி	தான் தோன்றி ஈசர், எழுத்தறிநாதர்
ॐஅம்பிகை	சுகுந்த குந்தாளாம்பிகை & நித்தியகல்யாணி
பாடியவர்கள்	திருஞானசம்பந்தர் (1)         எண் திசைக்கும் புகழ் (3-095) திருநாவுக்கரசர்(4)         விண்ணவர் மகுடகோடி (4-072)         மண்ணும் மலைமகள் (4-100)         என்னில் ஆரும் (5-021)         அல்லிமலர் நாற்றத்து (6-089)
ஸ்தல மரம்	பலா, செண்பகம்
தீர்த்தம்	ஐராவாத தீர்த்தம்
பண்	திருநேரிசை
குறிப்புகள்	அகத்தியர் வழிபட்டது அகத்தியர் இலக்கணம் உபதேசம் பெற்ற பதி ஐராவதம் பூசித்த தலம்.
பதிக பலன்	துயர் நீங்கும்.
வரிசை எண்.	72                                                             45/63

திருச்சிற்றம்பலம்

விண்ணவர் மகுட கோடி 
        மிடைந்த சேவடியர் போலும்
பெண் ஒரு பாகர் போலும் 
          பேடலி ஆணர் போலும்
வண்ணமால் அயனும் காணா 
          மால்வரை எரியர் போலும்
எண்ணுரு அநேகர் போலும் 
          இன்னம்பர் ஈச னாரே.  1

பன்னிய மறையர் போலும் 
          பாம்பு அரை உடையர் போலும்
துன்னிய சடையர் போலும் 
          தூமதி மத்தர் போலும்
மன்னிய மழுவர் போலும் 
          மாது இடம் மகிழ்வர் போலும்
என்னையும் உடையர் போலும் 
          இன்னம்பர் ஈச னாரே.  2

மறி ஒரு கையர் போலும் 
          மாது உமை உடையர் போலும்
பறி தலைப் பிறவி நீக்கிப் 
          பணிகொள வல்லர் போலும்
செறிவுடை அங்க மாலை 
          சேர் திருவுருவர் போலும்
எறிபுனற் சடையர் போலும் 
          இன்னம்பர் ஈச னாரே.  3

விடமலி கண்டர் போலும் 
          வேள்வியை அழிப்பர் போலும்
கடவுநல் விடையர் போலும் 
          காலனைக் காய்வர் போலும்
படமலி அரவர் போலும் 
          பாய்புலித் தோலர் போலும்
இடர்களைந்து அருள்வர் போலும் 
          இன்னம்பர் ஈச னாரே.  4

அளிமலர்க் கொன்றை துன்றும் 
          அவிர்சடை உடையர் போலும்
களிமயிற் சாய லோடும்
          காமனை விழிப்பர் போலும்
வெளிவளர் உருவர் போலும் 
          வெண்பொடி அணிவர் போலும்
எளியவர் அடியர்க்கு என்றும் 
          இன்னம்பர் ஈச னாரே.  5

கணையமர் சிலையர் போலும் 
          கரி உரி உடையர் போலும்
துணையமர் பெண்ணர் போலும் 
          தூமணிக் குன்றர் போலும்
அணையுடை அடியர் கூடி 
          அன்பொடு மலர்கள் தூவும்
இணையடி உடையர் போலும் 
          இன்னம்பர் ஈச னாரே.  6

பொருப்பமர் புயத்தர் போலும் 
          புனல் அணி சடையர் போலும்
மருப்பிள ஆமை தாங்கு 
          மார்பில்வெண் நூலர் போலும்
உருத்திர மூர்த்தி போலும் 
          உணர்விலார் புரங்கள் மூன்றும்
எரித்திடு சிலையர் போலும் 
          இன்னம்பர் ஈச னாரே.  7

காடு இடம் உடையர் போலும் 
          கடிகுரல் விளியர் போலும்
வேடுரு உடையர் போலும் 
          வெண்மதிக் கொழுந்தர் போலும்
கோடு அலர் வன்னி தும்பை 
          கொக்கிறகு அலர்ந்த கொன்றை
ஏடமர் சடையர் போலும் 
          இன்னம்பர் ஈச னாரே.  8

காறிடு விடத்தை உண்ட 
          கண்டர் எண்தோளர் போலும்
நீறுடை உருவர் போலும் 
          நினைப்பினை அரியர் போலும்
பாறுடைத் தலைகை ஏந்திப் 
          பலிதிரிந்து உண்பர் போலும்
ஏறுடைக் கொடியர் போலும் 
          இன்னம்பர் ஈச னாரே.  9

ஆர்த்து எழும் இலங்கைக் கோனை 
          அருவரை அடர்ப்பர் போலும்
பார்த்தனோடு அமர் பொருது 
          படைகொடுத்து அருள்வர் போலும்
தீர்த்தமாம்  கங்கை தன்னைத் 
          திருச்சடை வைப்பர் போலும்
ஏத்த ஏழ் உலகும் வைத்தார் 
          இன்னம்பர் ஈச னாரே.

திருச்சிற்றம்பலம்