திரு கோடிக்கா

                                                                          ௨ 

திருஞானசம்பந்தர்   சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திரு கோடிக்கா
ஊர்
நாடு	சோழ (காவிரி வட)
ॐசுவாமி	கோடீஸ்வரர்
ॐஅம்பிகை	திரிபுரசுந்தரி, வடிவாம்பிகை
பாடியவர்கள்	சம்பந்தர் (1)         இன்று நன்று நாளை நன்று (2-99) அப்பர் (1)          நெற்றி மேல் கண்ணினான் (4-51)         சங்குலா முன்கை (5-78)         கண்டலஞ்ச்சேர் நெற்றிஇளம் (6-81
ஸ்தல மரம்
தீர்த்தம்
பண்	நட்டராகம்
குறிப்புகள்
பதிக பலன்	பாவம் கெட்டு ஓழியும்
வரிசை எண்.	99                                                               37/63

திருச்சிற்றம்பலம்

இன்றுநன்று நாளைநன்று
          என்று நின்ற இச்சையால்
பொன்றுகின்ற வாழ்க்கையைப்
          போகவிட்டுப் போதுமின்
மின்தயங்கு சோதியான்
          வெண்மதி விரிபுனல்
கொன்றைதுன்று சென்னியான்
          கோடிகாவு சேர்மினே.  1

அல்லல்மிக்க வாழ்க்கையை
          ஆதரித்து இராதுநீர்
நல்லதோர் நெறியினை
          நாடுதும் நடம்மினோ
வில்லையன்ன வாணுதல்
          வெள்வளை ஓர் பாகமாம்
கொல்லைவெள்ளை யேற்றினான்
          கோடிகாவு சேர்மினே.  2

துக்கமிக்க வாழ்க்கையின்
          சோர்வினைத் துறந்துநீர்
தக்கதோர் நெறியினைச்
          சார்தல்செய்யப் போதுமின்
அக்கு அணிந்து அரைமிசை
          ஆறு அணிந்த சென்னிமேல்
கொக்கிறகு அணிந்தவன்
          கோடிகாவு சேர்மினே.  3

பண்டுசெய்த வல்வினை
          பற்றறக் கெடும்வகை
உண்டு உமக்கு உரைப்பன்நான்
          ஒல்லைநீர் எழுமினோ
மண்டுகங்கை செஞ்சடை
          வைத்து மாது ஓர் பாகமாக்
கொண்டு உகந்த மார்பினான்
          கோடிகாவு சேர்மினே.  4

முன்னே நீர்செய் பாவத்தான்
          மூர்த்திபாதம்  சிந்தியாது 
இன்ன நீர் இடும்பையின்
          மூழ்கிறீர் எழும்மினோ
பொன்னைவென்ற கொன்றையான்
          பூதம்பாட ஆடலான்
கொன்னவிலும் வேலினான்
          கோடிகாவு சேர்மினே.  5

ஏவமிக்க சிந்தையோடு
          இன்பம் எய்தலாம் எனப்
பாவமெத் தனையும்நீர்
          செய்தொரு பயனிலைக்
காவல்மிக்க மாநகர்
          காய்ந்துவெங் கனல்படக்
கோவமிக்க நெற்றியான்
          கோடிகாவு சேர்மினே.  6

ஏண் அழிந்த வாழ்க்கையை
          இன்பம் என்று இருந்துநீர்
மாணழிந்த மூப்பினால்
          வருந்தல் முன்னம் வம்மினோ
பூணல்வெள் எலும்பினான்
          பொன்திகழ் சடைமுடிக்
கோணல்வெண் பிறையினான்
          கோடிகாவு சேர்மினே.  7

மற்றிவாழ்க்கை மெய் எனும்
          மனத்தினைத் தவிர்ந்துநீர்
பற்றிவாழ்மின் சேவடி
          பணிந்து வந்து எழுமினோ
வெற்றிகொள் தசமுகன்
          விறல்கெட இருந்ததோர்
குற்றமில் வரையினான்
          கோடிகாவு சேர்மினே.  8

மங்குநோய் உறும்பிணி
          மாயும்வண்ணம் சொல்லுவன்
செங்கண்மால் திசைமுகன்
          சென்று அளந்தும் காண்கிலா
வெங்கண்மால் விடையுடை
          வேதியன் விரும்பும் ஊர்
கொங்குலாம் வளம்பொழில்
          கோடிகாவு சேர்மினே.  9

தட்டொடு தழைமயில் 
          பீலிகொள் சமணரும்
பட்டுடை விரி துகிலினார்கள்
          சொல்  பயன் இல்லை
விட்டபுன் சடையினான்
          மேதகும் முழவொடும்
கொட்டமைந்த ஆடலான்
          கோடிகாவு சேர்மினே.  10

கொந்தணி குளிர்பொழில்
          கோடிகாவு மேவிய
செந்தழல் உருவனைச்
          சீர்மிகு திறலுடை
அந்தணர் புகலி
          உளாயகேள்வி ஞான
சம்பந்தன தமிழ்வல்லார்
          பாவமான பாறுமே.  11

திருச்சிற்றம்பலம்