திரு ஆமாத்தூர்

    

௨ 

திருநாவுக்கரசு  சுவாமிகள் அருளிச்செய்த
ஐந்தாம்   திருமுறை

தகவல் பலகை	விவரம்
தலம்	திருஆமாத்தூர்
ஊர்
நாடு	நடு நாடு
ॐசுவாமி	அபிராமேஸ்வரர், அழகிய நாதர்
ॐஅம்பிகை	முக்த்தாம்பிகை, அழகிய நாயகி
பாடியவர்கள்	திருஞானசம்பந்தர்(2),         துன்னம்பெய் கோவணமும் (2:44)         குன்ற வார் சிலை (2:50) திருநாவுக்கரசர்(2),         மாமாத் தாகிய  மால் அயன் (5:44)         வண்ணங்கள் தாம் பாடி (6:09) சுந்தரர்(1)         காண்டனன் காண்டனன் (7:45)
ஸ்தல மரம்	வன்னிமரம்
தீர்த்தம்	ஆம்பலப்பொய்கை
பண்	திருக்குறுந்தொகை
குறிப்புகள்	நந்தி, காமதேனு தவம் இயற்றி கொம்புகளைப் பெற்ற சிறப்புடைய தலம் இராமன் வழிபாடு செய்த தலம் இறைவனை காணீர் என்று சொல்லிய பதிகம்
பதிக பலன்	இறையருள்  பெற
வரிசை எண்.	44                                                               நடு நாடு -21/22

திருச்சிற்றம்பலம்

மாமாத் தாகிய மால்\ அயன் மால்கொடு
தாமாத் தேடியும் காண்கிலர் தாள்முடி
ஆமாத் தூர் அரனேஅரு ளாய் என்தன்
ஏமாப்பு எய்திக்கண்டார் இறை யானையே.  1  

சந்தி யானைச் சமாதிசெய் வார்தங்கள்
புந்தி யானைப்புத்தேளிர் தொழப்படும்
அந்தி யானை ஆமாத்தூர் அழகனைச்
சிந்தி யாதவர் தீவினை யாளரே.  2  

காமாத் தம் எனும் கார்வலைப் பட்டுநான்
போமாத் தை அறியாது புலம்புவேன்
ஆமாத் தூர் அரனே  என்று  அழைத்தலும்
தேமாத் தீங்கனிபோலத்தித் திக்குமே.  3   

பஞ்ச பூதவலையிற் படுவதற்கு 
அஞ்சி நானும் ஆமாத்தூர் அழகனை
நெஞ்சி னால்நினைந்தேன்நினைவு எய்தலும்
வஞ்ச ஆறுகள்வற்றின காண்மினே.  4  

குராமன் னும் குழலால் ஒரு கூறனார்
அராமன்  னும் சடை யான் திருஆமாத்தூர்
இராம னும்வழிபாடுசெய் ஈசனை
நிராம யன் தனை நாளும் நினைமினே.  5  

பித்த னைப்பெருந் தேவர் தொழப்படும்
அத்த னை அணி ஆமாத்தூர் மேவிய
முத்தி னையடியேனுள் முயறலும்
பத்தி வெள்ளம் பரந்தது காண்மினே.  6  

நீற்றி னார்திரு மேனியன் நேரிழை
கூற்றி னான் குழற்கோலச் சடையிலோர்
ஆற்றி னான்அணி ஆமாத்தூர் மேவிய
ஏற்றி னான்எமை ஆளுடை ஈசனே.  7  

பண்ணிற் பாடல்கள் பத்திசெய் வித்தகர்க்கு 
அண்ணித் தாகும் அமுதினை ஆமாத்தூர்
சண்ணிப் பானைத் தமர்க்கணித் தாயதோர்
கண்ணிற் பாவையன்னானவன் காண்மினே.  8   

குண்டர் பீலிகள் கொள்ளும் குணமிலா
மிண்ட ரோடெனை வேறு படுத்துய்யக்
கொண்ட நாதன் குளிர்புனல் வீரட்டத்து 
அண்ட னாரிடம் ஆமாத்தூர் காண்மினே.  9  

வானஞ் சாடு மதி அரவத்தொடு
தானஞ் சாதுடன் வைத்த சடையிடைத்
தேனஞ் சாடிய தெங்கிள நீரொடும்
ஆனஞ் சாடிய ஆமாத்தூர் ஐயனே.  10  

விடலை யாய்விலங்கல்லெடுத் தான்முடி
அடர வோர்விரல் ஊன்றிய ஆமாத்தூர்
இடம தாக்கொண்ட ஈசனுக்கு என் உளம்
இடம தாகக்கொண்டு இன்புற்று இருப்பனே.

திருச்சிற்றம்பலம்