திரு ஆமாத்தூர்

    

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருஆமாத்தூர்
ஊர்
நாடு	நடு நாடு
ॐசுவாமி	அபிராமேஸ்வரர், அழகிய நாதர்
ॐஅம்பிகை	முக்த்தாம்பிகை, அழகிய நாயகி
பாடியவர்கள்	திருஞானசம்பந்தர்(2),         துன்னம்பெய் கோவணமும் (2:44)         குன்ற வார் சிலை (2:50) திருநாவுக்கரசர்(2),         மாமாத் தாகிய  மால் அயன் (5:44)         வண்ணங்கள் தாம் பாடி (6:09) சுந்தரர்(1)         காண்டனன் காண்டனன் (7:45)
ஸ்தல மரம்	வன்னிமரம்
தீர்த்தம்	ஆம்பலப்பொய்கை
பண்	கொள்ளிக் கெளவாணம்
குறிப்புகள்	நந்தி, காமதேனு தவம் இயற்றி கொம்புகளைப் பெற்ற சிறப்புடைய தலம் இறைவன் அருளால் இழந்த கண்களில் இடக்கண்ணை காஞ்சியில் பெற்று திருவாரூர் போகும் வழியில் ஆமாத்தூர் ஐயனை தொழுது பாடியது
பதிக பலன்	திருவடிப்பேறு   பெற
வரிசை எண்.	45                                                             நடு நாடு -21/22

திருச்சிற்றம்பலம்

காண்டனன் காண்டனன் காரிகை யாள்தன் கருத்தனாய்
ஆண்டனன் ஆண்டனன் ஆமாத் தூர் எம் அடிகட்காட்
பூண்டனன் பூண்டனன் பொய் அன்று சொல்லுவன் கேண்மின்கள்
மீண்டனன் மீண்டனன் வேதவித்தல்லாது அவர்கட்கே.  1  

பாடுவன் பாடுவன் பார்ப்பதி தன் அடி பற்றிநான்
தேடுவன் தேடுவன் திண்ணெனப் பற்றிச் செறிதர
ஆடுவன் ஆடுவன் ஆமாத்தூர் எம் அடிகளைக்
கூடுவன் கூடுவன் குற்றமது அற்றென் குறிப்பொடே.  2  

காய்ந்தவன் காய்ந்தவன் கண் அழலால் அன்று காமனைப்
பாய்ந்தவன் பாய்ந்தவன் பாதத்தினால் அன்று கூற்றத்தை
ஆய்ந்தவன் ஆய்ந்தவன் ஆமாத்தூர் எம் அடிகளார்
ஏய்ந்தவன் ஏய்ந்தவன் எம்பிராட்டியைப் பாகமே.  3  

ஓர்ந்தனன் ஓர்ந்தனன் உள்ளத்துள்ளேநின்ற ஒண்பொருள்
சேர்ந்தனன் சேர்ந்தனன் சென்று திருவொற்றி யூர்புக்குச்
சார்ந்தனன் சார்ந்தனன் சங்கிலி மென்தோள் தடமுலை
ஆர்ந்தனன் ஆர்ந்தனன் ஆமாத்தூர் ஐயன் அருளதே.  4  

வென்றவன் வென்றவன் வேள்வியில் விண்ணவர் தங்களைச்
சென்றவன் சென்றவன் சில்பலிக்கு என்று தெருவிடை
நின்றவன் நின்றவன் நீதி நிறைந்தவர் தங்கள்பால்
அன்றவன் அன்றவன் செய்ய அருள் ஆமாத்தூர் ஐயனே.  5  

காண்டவன் காண்டவன் காண்டற்கு அரிய கடவுளாய்
நீண்டவன் நீண்டவன் நாரணன் நான்முகன் நேடவே
ஆண்டவன் ஆண்டவன் ஆமாத்தூரையும் எனையும் ஆட்
பூண்டவன் பூண்டவன் மார்பிற் புரிநூல் புரளவே.  6  

எண்ணவன் எண்ணவன் ஏழு உலகத்து உயிர் தங்கட்குக்
கண்ணவன் கண்ணவன் காண்டுமென் பாரவர் தங்கட்குப்
பெண்ணவன் பெண்ணவன் மேனியோர் பாகமாம் பிஞ்ஞகன்
அண்ணவன் அண்ணவன் ஆமாத்தூர் எம் அடிகளே.  7  

பொன்னவன் பொன்னவன் பொன்னைத்தந் தென்னைப்போ கவிடா
மின்னவன் மின்னவன் வேதத்தின் உட்பொரு ளாகிய
அன்னவன் அன்னவன் ஆமாத்தூர் ஐயனை ஆர்வத்தால்
என்னவன் என்னவன் என்மனத்து இன்புற்று இருப்பனே.  8  

தேடுவன் தேடுவன் செம்மலர்ப் பாதங்கள் நாள் தொறும்
நாடுவன் நாடுவன் நாபிக்கு மேலேயோர் நால்விரல்
மாடுவன் மாடுவன் வன்கை பிடித்து மகிழ்ந்துளே
ஆடுவன் ஆடுவன் ஆமாத் தூர் எம் அடிகளே.  9  

உற்றனன் உற்றவர் தம்மை ஒழிந்து உள்ளத்துள்பொருள்
பற்றினன் பற்றினன் பங்கயச் சேவடிக் கேசெல்ல
அற்றனன் அற்றனன் ஆமாத்தூர் மேயான் அடி யார்கட்காள்
பெற்றனன் பெற்றனன் பெயர்த்தும் பெயர்த்தும்பிற வாமைக்கே.  

ஐயனை அத்தனை ஆளுடை ஆமாத்தூர் அண்ணலை
மெய்யனை மெய்யர்க்கு மெய்ப்பொரு ளான விமலனை
மையனை மையணி கண்டனை வன் தொண்டன் ஊரன்சொல்
பொய்ஒன்றும் இன்றிப் புலம்புவார் பொற்கழல் சேர்வரே.

திருச்சிற்றம்பலம்