திரு ஆமாத்தூர்

     

௨ 

திருஞானசம்பந்தர் சுவாமிகள் அருளிச்செய்த
இரண்டாம்  திருமுறை

தகவல் பலகை	விவரம்
தலம்	திருஆமாத்தூர்
ஊர்
நாடு	நடு நாடு
ॐசுவாமி	அபிராமேஸ்வரர், அழகிய நாதர்
ॐஅம்பிகை	முக்த்தாம்பிகை, அழகிய நாயகி
பாடியவர்கள்	திருஞானசம்பந்தர்(2),         துன்னம்பெய் கோவணமும் (2:44)         குன்ற வார் சிலை (2:50) திருநாவுக்கரசர்(2),         மாமாத் தாகிய  மால் அயன் (5:44)         வண்ணங்கள் தாம் பாடி (6:09) சுந்தரர்(1)         காண்டனன் காண்டனன் (7:45)
ஸ்தல மரம்	வன்னிமரம்
தீர்த்தம்	ஆம்பலப்பொய்கை
பண்	சீகாமரம்
குறிப்புகள்	நந்தி, காமதேனு தவம் இயற்றி கொம்புகளைப் பெற்ற சிறப்புடைய தலம் இறைவன் அருளால் இழந்த கண்களில் இடக்கண்ணை காஞ்சியில் பெற்று திருவாரூர் போகும் வழியில் ஆமாத்தூர் ஐயனை தொழுது பாடியது
பதிக பலன்	வினை நீங்கும்.
வரிசை எண்.	44                                                             நடு நாடு -21/22

திருச்சிற்றம்பலம்

துன்னம்பெய் கோவணமும் தோலும் உடை ஆடை
பின்னஞ் சடைமேலோர் பிள்ளை மதிசூடி
அன்னஞ்சேர் தண்கானல் ஆமாத்தூர் அம்மான்தன்
பொன்னங் கழல்பரவாப் பொக்கமும் பொக்கமே.  1  

கைம்மாவின் தோல்போர்த்த காபாலி வான் உலகில்
மும்மா மதில் எய்தான் முக்கணான் பேர்பாடி
அம்மா மலர்ச்சோலை ஆமாத்தூர் அம்மான்எம்
பெம்மான் என்று ஏத்தாதார் பேயரிற் பேயரே.  2  

பாம்பரைச் சாத்தியோர் பண்டரங்கன் விண்டதோர்
தேம்பல் இளமதியம் சூடிய சென்னியான்
ஆம்பலம் பூம்பொய்கை ஆமாத்தூர் அம்மான்தன்
சாம்பல் அகலத்தார் சார்பு அல்லாற் சார்பிலமே.  3  

கோணாகப் பேரல்குல் கோல்வளைக்கை மாதராள்
பூணாகம் பாகமாப் புல்கி அவளோடும்
ஆணாகங் காதல்செய் ஆமாத்தூர் அம்மானைக்
காணாத கண் எல்லாம் காணாத கண்களே.  4  

பாடல் நெறிநின்றான் பைங்கொன்றைத் தண்டாரே
சூடல் நெறிநின்றான் சூலம் சேர் கையினான்
ஆடல் நெறிநின்றான் ஆமாத்தூர் அம்மான்தன்
வேட நெறிநில்லா வேடமும் வேடமே.  5  

சாமவரை வில்லாகச் சந்தித்த வெங்கணையால்
காவல் மதில் எய்தான் கண்ணுடை நெற்றியான்
யாவரும்  சென்று ஏத்தும் ஆமாத்தூர் அம்மானத்
தேவர் தலைவணங்குந் தேவர்க்குந் தேவனே.  6  

மாறாத வெங்கூற்றை மாற்றி மலைமகளை
வேறாக நில்லாத வேடமே காட்டினான்
ஆறாத தீயாடி ஆமாத்தூர் அம்மானைக்
கூறாத நாவெல்லாம் கூறாத நாக்களே.  7  

தாளால் அரக்கன்தோள் சாய்த்த தலைமகன்தன்
நாள்ஆ திரை என்றே நம்பன் தன் நாமத்தால்
ஆளானார் சென்று ஏத்தும் ஆமாத்தூர் அம்மானைக்
கேளாச் செவி எல்லாம்  கேளாச் செவிகளே.  8  

புள்ளும் கமலமும் கைக்கொண்டார் தாம் இருவர்
உள்ளும் அவன்பெருமை ஒப்பளக்குந் தன்மையதே
அள்ளல் விளைகழனி ஆமாத்தூர் அம்மான்எம்
வள்ளல் கழல்பரவா வாழ்க்கையும் வாழ்க்கையே.  9  

பிச்சை பிறர்பெய்யப் பின்சாரக் கோசாரக்
கொச்சை புலால்நாற ஈர்உரிவை போர்த்து உகந்தான்
அச்சந்தன் மாதேவிக்கு ஈந்தான் தன் ஆமாத்தூர்
நிச்சல் நினையாதார் நெஞ்சமும் நெஞ்சமே.  10  

ஆடல் அரவு அசைத்த ஆமாத்தூர் அம்மானைக்
கோடல் இரும்புறவிற் கொச்சை வயத்தலைவன்
நாடல் அரியசீர் ஞானசம் பந்தன்தன்
பாட லிவைவல்லார்க்கு இல்லையாம் பாவமே.

திருச்சிற்றம்பலம்