திரு காளத்தி

  

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருக்காளத்தி
ஊர்	காலஹஸ்தி
நாடு	தொண்டை நாடு
ॐசுவாமி	காளத்திநாதர், குடும்பித் தேவர்
ॐஅம்பிகை	ஞானப் பூங்கோதை
பாடியவர்கள்	திருஞானசம்பந்தர்(2),         சந்தமார் அகிலோடு (3:36)         வானவர்கள் தான் அவர்கள்  (3:69) திருநாவுக்கரசர்(1),         விற்று ஊன் (6:8) சுந்தரர்(1)         செண்டாடும் விடையாய் (7:26)
ஸ்தல மரம்	மகிழ மரம்
தீர்த்தம்	பொன்முகலி
பண்	திருத்தாண்டகம்
குறிப்புகள்	பஞ்ச பூத தலங்களுள் வாயுத் தலம் கண்ணப்ப நாயனார் முத்தி தலம் முசுகுந்த சக்கரவர்த்தி, பரத்துவாச முனிவர், சிவகோசரியார் பூசித்து முத்தி பெற்றது
பதிக பலன்	அடியார்கள் பெருமை பெற
வரிசை எண்.	7                                          தொண்டை நாடு -32/19

திருச்சிற்றம்பலம்

விற்றூண் ஒன்று இல்லாத நல்கூர்ந் தான்காண்
வியன்கச்சிக் கம்பன்காண் பிச்சை அல்லால்
மற்றூண்ஒன்று இல்லாத மா சதுரன்காண்
மயானத்து மைந்தன்காண் மாசு ஒன்று இல்லாப்
பொற்றூண்காண் மாமணிநற் குன்று ஒப் பான்காண்
பொய்யாது பொழில் ஏழுந் தாங்கி நின்ற
கற்றூண்காண் காளத்தி காணப் பட்ட 
கணநாதன் காண் அவன் என்  கண் உளானே.  1  

இடிப்பான்காண் என்வினையை ஏகம் பன்காண்
எலும்பு ஆரணன்காண் எல்லாம் முன்னே
முடிப்பான்காண் மூவுலகும் ஆயி னான்காண்
முறைமையால் ஐம்புரியும் வழுவா வண்ணம்
படித்தான் தலை அறுத்த பாசு பதன்காண்
பராய்த்துறையான் பழனம்பைஞ் ஞீலி யான்காண்
கடித்தார் கமழ்கொன்றைக் கண்ணி யான்காண்
காளத்தி யான் அவன் என்  கண் உளானே.  2  

நாரணன்காண் நான்முகன்காண் நால் வேதன் காண்
ஞானப் பெருங்கடற்கோர் நாவா யன்ன
பூரணன்காண் புண்ணியன்காண் புராணன் றான்காண்
புரிசடைமேற் புனல் ஏற்ற புனிதன் றான்காண்
சாரணன்காண் சந்திரன்காண் கதிரோன் தான்காண்
தன்மைக்கண் தானேகாண் தக்கோர்க்குக் எல்லாம் 
காரணன்காண் காளத்தி காணப் பட்ட 
கணநாதன் காண் அவன் என்  கண் உளானே.  3  

செற்றான்காண் என்வினையைத் தீயா டிகாண்
திருவொற்றி யூரான்காண் சிந்தை செய்வார்க்கு 
உற்றான்காண் ஏகம்பம் மேவி னான்காண்
உமையாள்நற் கொழுநன்காண் இமையோர் ஏத்துஞ்
சொற்றான்காண் சோற்றுத் துறை உளான்காண்
சுறாவேந்தன் ஏவலத்தை நீறா நோக்கக்
கற்றான்காண் காளத்தி காணப் பட்ட 
கணநாதன் காண் அவன் என்  கண் உளானே.  4  

மனத்தகத்தான் தலைமேலான் வாக்கின் உள்ளான்
வாயாரத் தன் அடியே பாடுந் தொண்டர்
இனத்தகத்தான் இமையவர்தஞ் சிரத்தின் மேலான்
ஏழண்டத்து அப்பாலான் இப்பாற் செம்பொன்
புனத்தகத்தான் நறுங்கொன்றைப் போதின் உள்ளான்
பொருப்பிடையான் நெருப்பிடையான் காற்றின் உள்ளான்
கனத்தகத்தான் கயிலாயத்து உச்சி உள்ளான்
காளத்தி யான் அவன் என்  கண் உளானே.  5  

எல்லாம்முன் தோன்றாமே தோன்றி னான்காண்
ஏகம்ப மேயான்காண் இமையோர் ஏத்தப்
பொல்லாப் புலன் ஐந்தும் போக்கி னான்காண்
புரிசடைமேற் பாய்கங்கை பூரித் தான்காண்
நல்லவிடை மேற்கொண்டு நாகம் பூண்டு
நளிர்சிரமொன்று ஏந்தியோர் நாணா யற்ற
கல்லாடை மேற்கொண்ட காபா லிகாண்
காளத்தி யான் அவன் என்  கண் உளானே.  6  

கரி உருவு கண்டத்து எம் கண் உளான்காண்
கண்டன்காண் வண்டுண்ட கொன்றை யான்காண்
எரிபவள வண்ணன்காண் ஏகம் பன்காண்
எண் திசையும்  தானாய குணத்தி னான்காண்
திரிபுரங்கள் தீயிட்ட தீயா டிகாண்
தீவினைகள் தீர்த்திடும் என் சிந்தை யான்காண்
கரிஉரிவை போர்த்துகந்த காபா லிகாண்
காளத்தி யான் வனென் கண்ணு ளானே.  7  

இல்லாடிச் சில்பலிசென் று ஏற்கின் றான்காண்
இமையவர்கள் தொழுது இறைஞ்ச இருக்கின் றான்காண்
வில்லாடி வேடனாய் ஓடி னான்காண் 
வெண்ணூ லுஞ்சேர்ந்த அகலத் தான்காண்
மல்லாடு திரள்தோள்மேல் மழுவா ளன்காண்
மலைமகள்தன் மணாளன்காண் மகிழ்ந்து முன்னாள்
கல்லாலின் கீழ்இருந்த காபா லிகாண்
காளத்தி யான் அவன் என்  கண் உளானே.  8  

தேனப்பூ வண்டுண்ட கொன்றை யான்காண்
திருவேகம் பத்தான்காண் தேனார்ந் துக்க
ஞானப்பூங் கோதையாள் பாகத் தான்காண்
நம்பன்காண் ஞானத் து ஒளியா னான்காண்
வானப்பே ரூரு மறிய வோடி 
மட்டித்து நின்றான்காண் வண்டார் சோலைக்
கானப்பே ரூரான்காண் கறைக்கண் டன்காண்
காளத்தி யான் அவன் என்  கண் உளானே.  9  

இறையவன்காண் ஏழு உலகும் ஆயி னான்காண்
ஏழ்கடலும் சூழ்மலையும் ஆயி னான்காண்
குறையுடையார் குற்றேவல் கொள்வான் தான்காண்
குடமூக்கிற் கீழ்க்கோட்டம் மேவி னான்காண்
மறையுடைய வானோர் பெருமான் தான்காண்
மறைக்காட் டு உறையும் மணிகண் டன்காண்
கறையுடைய கண்டத்து எம் காபா லிகாண்
காளத்தி யான் அவன் என்  கண் உளானே.  10  

உண்ணா வருநஞ்சு உண்டான் தான்காண்
ஊழித்தீ யன்னான்காண் உகப்பார் காணப்
பண்ணாரப் பல்லியம் பாடி னான்காண்
பயின்றநால் வேதத்தின் பண்பி னான்காண்
அண்ணா மலையான்காண் அடியா ரீட்டம் 
அடியிணைகள் தொழுது ஏத்த அருளு வான்காண்
கண்ணாரக் காண்பார்க்கு ஓர் காட்சி யான்காண்
காளத்தி யான் அவன் என்  கண் உளானே.  

திருச்சிற்றம்பலம்