திரு நெய்த்தானம்

             

௨ 

திருநாவுக்கரசர்  சுவாமிகள்   அருளிச்செய்த
ஐந்தாம்  திருமுறை 

தகவல் பலகை	விவரம்
தலம்	திரு நெய்த்தானம்
பிற பெயர்கள்
நாடு	சோழ நாடு (வ)
ॐசுவாமி	நெய்யாடியப்பர்
ॐஅம்பிகை	பாலாம்பிகை
பாடியவர்கள்	சம்பந்தர் (1)          மையாடிய கண்டன் (1-15) அப்பர் (5)          காலனை வீழச் செற்ற (4-37)           பாரிடம் சாடிய பல்லுயிர் (4-89)           கொல்லியான் (5-34)           வாகைஎல்லாம் உடைய (6-41)           மெயத்தானத்து அகம் படியுள் (6-42)
ஸ்தல மரம்	புன்னை
தீர்த்தம்	காவிரி
பண்	திரு குறுந்தொகை
குறிப்புகள்	திருவையாறுக்கு அண்மையில் உள்ளது.  ஏழூர் திருத்தலங்களில் ஒன்று. தில்லை ஸ்தானம் என வழங்கப்படுகிறது
பதிக பலன்	வினை நீங்கும்.
வரிசை எண்.	34                                                     52/63

திருச்சிற்றம்பலம் 

வகையெலாம் உடையாயும் நீயே என்றும்
          வான்கயிலை மேவினாய் நீயே என்றும்
மிகையெலாம் மிக்காயும் நீயே என்றும்
          வெண்காடு மேவினாய் நீயே என்றும்
பகையெலாம் தீர்த்தாண்டாய் நீயே என்றும்
          பாசூர் அமர்ந்தாயும் நீயே என்றும்
திகையெலாம் தொழச்செல்வாய் நீயே என்றும்
          நின்றநெய்த் தானாவென் நெஞ்சு உளாயே.  1

ஆர்த்த எனக்கு அன்பன் நீயே யென்றும்
          ஆதிக் கயிலாயன் நீயே என்றும்
கூர்த்த நடமாடி நீயே என்றும்
          கோடிகா மேய குழகா என்றும்
பார்த்தற்கு அருள்செய்தாய் நீயே என்றும்
          பழையனூர் மேவிய பண்பா என்றும்
தீர்த்தன் சிவலோகன் நீயே என்றும்
          நின்றநெய்த் தானா என் நெஞ்சு உளாயே.  2

அல்லாய்ப் பகலானாய் நீயே என்றும்
          ஆதிக் கயிலாயன் நீயே என்றும்
கல்லால் அமர்ந்தாயும் நீயே என்றுங்
          காளத்திக் கற்பகமும் நீயே என்றும்
சொல்லாய்ப் பொருளானாய் நீயே என்றும்
          சோற்றுத் துறை உறைவாய் நீயே என்றும்
செல்வாய்த் திரு ஆனாய் நீயே என்றும்
          நின்ற நெய்த் தானா என் நெஞ்சு உளாயே.  3

மின்னே ரிடைபங்கன் நீயே என்றும்
          வெண்கயிலை மேவினாய் நீயே என்றும்
பொன்னேர் சடைமுடியாய் நீயே என்றும்
          பூத கணநாதன் நீயே என்றும்
என்னா விரதத்தாய் நீயேஎன்றும்
          ஏகம்பத்து என் ஈசன் நீயே என்றும்
தென்னூர்ப் பதியுளாய் நீயே என்றும்
          நின்ற நெய்த் தானா என் நெஞ்சு உளாயே.  4

முந்தி இருந்தாயும் நீயே என்றும்
          முன்கயிலை மேவினாய் நீயே என்றும்
நந்திக்கு அருள்செய்தாய் நீயே என்றும்
          நடமாடி நள்ளாறன் நீயே என்றும்
பந்திப் பரியாயும் நீயே என்றும்
          பைஞ்ஞீலி மேவினாய் நீயே என்றும்
சிந்திப் பரியாயும் நீயே என்றும்
          நின்ற நெய்த் தானா என் நெஞ்சு உளாயே.  5

தக்கார் அடியார்க்கு நீயே என்றும்
          தலையார் கயிலாயன் நீயே என்றும்
அக்காரம் பூண்டாயும் நீயே என்றும்
          ஆக்கூரில் தான்றோன்றி நீயே என்றும்
புக்காய ஏழு உலகும் நீயே என்றும்
          புள்ளிருக்கு வேளூராய் நீயே என்றும்
தெக்காரு மாகோணத் தானே என்றும்
          நின்ற நெய்த் தானா என் நெஞ்சு உளாயே.  6

புகழும் பெருமையாய் நீயே என்றும்
          பூங்கயிலை மேவினாய் நீயே என்றும்
இகழுந் தலையேந்தி நீயே என்றும்
         இராமேச் சரத்தின்பன் நீயே என்றும்
அகழும் மதிலுடையாய் நீயே என்றும்
          ஆலவாய் மேவினாய் நீயே என்றும்
திகழும் மதிசூடி நீயே என்றும்
          நின்ற நெய்த் தானா என் நெஞ்சு உளாயே.  7

வானவர்க்கு மூத்திளையாய் நீயே என்றும்
          வானக் கயிலாயன் நீயே என்றும்
கான் நடமாடி நீயே என்றும்
          கடவூரில் வீரட்டன் நீயே என்றும்
ஊனார் முடி அறுத்தாய் நீயே என்றும்
          ஒற்றியூ ராரூராய் நீயே என்றும்
தேனாய் அமுதானாய் நீயே என்றும்
          நின்ற நெய்த் தானா என் நெஞ்சு உளாயே.  8

தந்தைதா யில்லாதாய் நீயே என்றும்
          தலையார் கயிலாயன் நீயே என்றும்
எந்தா எம் பிரானானாய் நீயே என்றும்
          ஏகம்பத்து என் ஈசன் நீயே என்றும்
முந்திய முக்கணாய் நீயே என்றும்
          மூவலூர் மேவினாய் நீயே என்றும்
சிந்தையாய்த் தேனூராய் நீயே என்றும்
          நின்ற நெய்த் தானா என் நெஞ்சு உளாயே.  9

மறித்தான் வலிசெற்றாய் நீயே என்றும்
          வான்கயிலை மேவினாய் நீயே என்றும்
வெறுத்தார் பிறப்பறுப்பாய் நீயே என்றும்
          வீழி மிழலையாய் நீயே என்றும்
அறத்தாய் அமுது ஈந்தாய் நீயே என்றும்
          யாவர்க்குந் தாங்கொணா நஞ்சம் உண்டு
பொறுத்தாய் புலன் ஐந்தும் நீயே என்றும்
          நின்ற நெய்த் தானா என் நெஞ்சு உளாயே.

திருச்சிற்றம்பலம்